AIZAWL - Eima hnoh la ta eima vaw palasa chiehpa hawhta written liata a tloh khaoh ta atahma interview result vaw pua ta, Satlia M. Misael S/o Puhpa Jeff M. Sanga, New Colony, Siaha cha service sohna kawpa Mizoram Police Service (MPS) liata a tloh haw.
Di (Dec.) 3rd nata 4th pa khata interview he hneipa cha ta, result cha atanoh 5th Di ta papuapa a cha. Written exam kha 12th - 27th Thlâzoh (August), 2008 liata hnei ha chiepa cha tari noh 12th Phiapi (November), 2008 zâlâ liana khata Result papua hapa a châ.
Mizoram Police Service (MPS) rai ruapa post- 10 lâna awpa liata written exam a pie theipa he ama zydua ta maluh 217 cha ei ta, Personality Interview awpa ta ama awpazy cha maluh 24 zy dei ama cha.
He zy hry liana heta Satlia Misael he ranking 8th liata ala ta, Mara saw police officer state chhoh liata post laichaipazy apatu theipa duasu liata a panona chata eima vaw hneichhipa a cha.
Marasaw hry tawhta Mizoram Police Service (MPS) eima hnei tua chaipa nata eima hnei chhôhpa cha Puhpa K. Amon MPS (Super Cop) cha ta, ano he tahma he Aizawl liata Crime and Anti- Corruption Bureau Dept liata ahria hai.
Mizoram Public Service Commission (MPSC) liata Marasaw Member pakha, Puhpa H. Siku eima hnei hai hra. MPSC ry liana he Member patho yna awpa liata Mizoram Sawhkha ta Member panoh (2) ngâla a so thei hai chy. Chatanachata, Chairperson Pihno B. Sangkhumi nata Members panohna zy chhithana ryh liata MPS written exam liata atlo thiepa zy cha Personality Interview hnei kheipa amâ cha.
Stp. M. Misael he Taxation Department, Gov`t of Mizoram, Zemabawk, Aizawl liata Inspector of Taxation raih a hria haipa a cha. Ko 2007 liata Mizoram Public Service (MPSC) ta MCS Exam apachhuahnoh hapa liana khata Stp. M. Misael he Written exam liata tlo ta, Personality Interview liata a vadua ta atlo khao leipa a cha. MPSC ta College Lecturer rai la awpa ta ko 2008 kô thaona la liata exam apachhuahnohpa lia chhao ta written exam liata tlo heih hra ta, interview liata a vadua ha heih. Chatanachata, Kô 2008 lia pyly ta Taxation Dept. Gov't of Mizoram liata Ispector of Taxation rai liata tlo heih ta, he suh liana heta tahma cha ahria hai.
Ano he Ami/Amie tahpa ta aw tyhpa cha ta, Satlia M. Lalrammawia, IDBI Bank liata officer eima hneitua chaipa Delhi tawhta rai hmota Chandigarh lia posting hneitua chai ta, cha tawhta Aizawl la ta akaw pasie hapa zy, Puhpa M. Chakhu, MSO Sub-Hqrs. Shillong President parohpazy he a uhtazy ama cha.
A Paw Puhpa Jeff M. Sanga (Chakhu Paw) he Siata khih tawhta cha athai tuapa pakha cha ta, MADC liata officer pakha eima hnei ngahaipa a cha. Cha hawhta, Misael zy chhao he Vytu reih chhao thai kaw ta, Mara dialect hropazy chhao a thai kaw.
Satlia Amie tawhta achu awpa pha kawpa eima hneipa cha, eima chhuahpa liata eima tloh hlalei cha hnabeidyleipa ta tao hualua lyma awpa he a cha, eima tah thei aw. Achhuahparuna ahneina bahsai leipa ta palohchao kawpa ta ahriapasana zydua byhna a cha hmeiseih.
He hawh ta hlaotlohna avaw hneipa he Maraland.NET ta eima ly khei hmeiseih. Mara hrophapa, ngachhina raihriaphana zy ta arai hriana liata byhna ato lyma awpa ta eima khokheina chhao eima hla hra.
Dallas,Texas
USA