Mara saw Doctor of Law eima hnei ha ba

E-mail Print PDF

Bloomington, Bangalore: Mara saw Dah 'Law' la chhata Doctorate degree eima hnei ha ba hra. Puhpa Ngo Cho Le, atahma ta United States liata a y nga haipa chata Indian University School of Law, Bloomington tawhta tawhta Doctor of Juridical Science cha Pato (May) 5, 2007 pa khata avaw dao haw.
Dr. Pawcho nata a viasano
(Dr. Ngo Cho Le nata aviasano Pihno Ango zy Doctorate degree ala nota)

Mara rah Thatihpha avaw tlona tawhta Ko 100-na liata he hawpa thaina asahpa eima vaw hneipa he aly achhih hmeiseih. Ano mo pakha cha, chhokha cha ngala chalei pata Mara rah cha nata zawpi zy cha acha hmeiseih.

Dr. Ngo Cho Le he Paw Chocho, Paw Cho, tahpazy ta aw tyhpa a cha. Chyhsa talent a hneipha kawpa chata, hlaphipa zy chhao athai kawpa a cha. K. Saidi album sakhana apua no chhao khata ano hlaphipa ahlao holopa a cha.

Mara sawzy cha nata Chin chyhsazy cha ngala chhaota chalei pata Myanmar(Burma) chyhsa Democracy akhoh haipazy chata chyhsa phahnai kawpa chahna hlupi patu haipa chata, Myanmar rah Democracy lata avaw palie thei khiah rah Constitution a draft-tuhpa hry liata a y hra awpa hawta pachapa a cha.
Puhpa Ngo Cho Le thatih tlahpipazy(Short Biography):

Rev. Ra Hu Chhaihlo nata Pino Ngo Thai Fachhai sawchapaw u thei pa Ngo Cho Le he Matupi khi liata pih ta, Matupi, Tawnggyi, Lialaipi, Satu Ngephe, Teina, Taubu, nata Rangoon khi zy liata apaw raihriana va nata achuna ky zy vata avaw y pa acha. U naw pa 7 hneita chapaw papali nata chano patho ama cha.

Ko 1988-ta siku hawtizy ta Burma rah liata democracy a y thei n'aw pata lapi achhina liata Matupi khi liata uthei acha hra vata, patu awpata chata, Mizoram India lata aviasa thokhanata amara. October 1, 1988 liata Siaha liata Mizoram Police nawta patu ei ta, Lobo lata pushback ama tao. Police Officer pata angia achhi va ei ta, Lobo tawta asisai pata nata Siaha la ama kua nota Assam Rifle nawta patu hei eita, Siaha la ama si khei. Assam Rifle camp, Siaha liata daiti varo ama so tawta, Magistrate lata ama pua khei. Central sawkha ta Refugee Camp liata so awpa ta patopatia pa ta, Siaha Refugee camp liata daiti khacha ma a vaw y.

Dr. Pawcho nata chhokhazy
(Dr. Chocho viasano nata No nata Pawzy chhaota)

1988 November thla liata Chin National Front (CNF) liata angia. 1995 liata tlaleina vata Delhi liata y ta, United Nations High Commissioner for Refugees (UNHCR) office ta Refugee ta recognized tao ama tao. UNHCR Office liata interpreter rai hriata, Delhi University Faculty of Law liata siku kia awpata Entrance tao ta, atlo hra pavata Lalmuanpuii (Siaha), Masungi (Lawngtlai), Buanga (Lawngtlai) zy nata Delhi University Faculty of Law Main Campus liata first year avaw chu.

Ko 1996 liata United States Information Agency (USIA) ta Burmese Refugee Scholarship Program (BRSP) chata chysa a tly papua pa hry ta atlypa acha hra vata, United States lata October 25, 1996 noh-ta asi. USA atlo nata Indiana University liata Intensive English Program (IEP) kia pathao ta, Valparaiso University http://valpo.edu/ liata entrance yzana zy atao khai tawta International Economics and Cultural Affairs major ta achu pathao ta, 1999 August ko liata B.A. degree avaw la. Indiana University School of Law – Bloomington liata Master of Laws (LL.M) achu thei naw pata abyupa zy atao khai nata admission pie pa chata, LL.M degree avaw tao pathao. Professor David P. Fidler supervise tao na ry liata Human Rights in ASEAN: Problems, Progresses and Prospects tapa thesis rota LL.M cha 2000 August liata avaw la.

Doctor of Juridical Science achu thei naw pata, “Ethnopolitical Conflict, Constitutional Crisis and Discords over Federalism in the Union of Burma” tapa Dissertation Proposal ropata, Indiana University Faculty of Law liata pieta, Prof. David C. Williams ta supervise tao aw pata apy vata SJD admission piepa avaw cha. Course works tao pathao ta, chakhai nata research tao pazao hei ta, dissertation paper he faculty ta ama py khei vata May 5, 2007 no ta Doctor of Juridical Science degree cha pie pa acha.

Doctor of Juridical Science research atao ngala nota, Indiana University School of Law – Bloomington ta Dr. Earl A. Snyder Scholar ta atlypa chata, Lauterpatch Research Center for International Law Cambridge University liata thla 6 chho research avawtao. University of Pennsylvania liata a y pa Solomon Asch Center for Study of Ethnopolitical Conflict liata Summer Visiting Fellow ta avaw y hra. Atahma he Center for Constitutional Democracy in Plural Societies liata Research Fellow ahria ngala nota acha.

Mara Peoples party (MPP) liata Consultant chata, Chin National Front (CNF) liata Central Committee Member chata, Organization Department liata Secretary nata Chin National Front, Regional Committee USA liata Regional Committee Chairman acha. Chin Human Rights Organization liata Legal Consultant chata, Chin Forum liata Managing Board Member acha hra. Mara rei, Matu rei, Azao rei, Hiakha rei, Maw rei, Burmese rei, Monyu rei, nara Japanese achyta athai. United States liata siku akiachho ta atlypa ra zy cha, Canada, South Korea, Japan, Thailand, Indonesia, United Kingdom, Germany, Norway, Denmark, nata Guam zy acha.

Pihno Ngo Tei Te (Ango), General Manager, Fairfield Inns and Suites of Indy Marriott East nata March 2000 liata a hnei eita, Indianapolis liata ama y nga hai.

Dr. Pawcho graduation
(Dr. Chocho alykhei pata keimo la sawzy chhaota)


Note: Dr. Ngo Cho Le thatih -ta achuna maniah apiepa cha Mara sawzy khataih liarai y ei sila, tiama eima papua khiah cha Khazohpata byhna maniah apie lyma aw. Tiamana eima tahno heta Cha achuna liahe eima tiama via heih abyuh hmeiseih. Cha eima thaivei khiah deikua alu (head) chalei paw pita, achaomahli (tail) eima cha thlah awpa cha.

Maraland.net Staff-zy ta he hlaotlohna khochhih kawpa ama daona kyh liata Pihno Ango nata Dr. Ngo Cho Le zy eima ly khei hmeiseih. Hmiala liata Mara sawzy chata byhna ama vaw cha lyma awpata eima khokheina eima hla.

Comments (0)
Only registered users can write comments!
 

Maraland.net chhoh liata tluana

Maraland on Facebook



Maraland.Net

About Us
Contact Us
Company Info
Maraland Blog
Maraland

Mara History
Map of Maraland
Maraland at a Glance
Tourist Spots
Programs

Advertising
Partnerships
News Contribution
Article Competition
Help

How to Register
How to Comment
How to Submit News
How to Submit Link
Policy

Terms of Service
Privacy Policy
Copyright Notices
Comment Guidelines
© 2002 - 2013 Maraland.Net - The Home of Mara people on the Internet - All Rights Reserved
RSS Feed