BANGALORE: Mara saw theology liata Ph.D eima hnei ha ba. Notlala liata Mara saw hry liata Ph.D doctorate degree theology la liata ala tuachaipa a cha hra.
Khazohnoh Phiata (Oct.) 21, 2007 pa khata Dr. John Hamlet Hlychho cha Acts Academy of Higher Education ta Convocation rohna kawpa Bangalore liata ahneina liata Ph.D he piepa puapa a cha haw.
(Dr. John Hamlet Hlychho Ph.D piepa acha nopa)
A dissertation cha, 'The impact of Christianity on the social, cultural, political and religious life of the Mara tribe in Mizoram' tahpa a cha. (Mara chyhsa thatih a cha vata notla dei chalei pata nochhi chhao apahly pa pyly tahpa kha pahno sila).
Dr. John Hamlet Hlychho thaina he M.A, M.Div, M.Th, D.D, Ph.D (History & Mission) cha ta, ano he NEHU tawhta BA patlota M.Div he Union Biblical Seminary, Pune tawhta patlo heihta, MA he Bangalore tawhta patlota, M.Th he SAIACS, Bangalore tawh pyly, D.D he USA tawhta piepa chata, Ph.D he rei chiehpa hawta Acts Academy of Higher Education, Bangalore tawhta a vaw dao heipa a cha.
A thatih chyupa:
Dr. John Hamlet Hlychho he Pami (March) 30, 1968 pa khata Laki khih liata Elder H.C Vahlei nata Pihno H. Nochhi zy tawhta vaw pita, a hawti kaw chy nota Ko 7 a cha hai no Ko 7 acha no khata Ko 1975 pa khata Tipa 'V' la akaw paih khei eita, PUC a passed pataw na ta Ko 1986 liana khata kyuna sia kawpa a pahno vata chakaona liata a hro zydua avaw pie khai hapa (full time ministry) chata; chakaona liata a yna chota achuna he atao pazao lymapa a vaw cha.
(Dr. John nata Mara sawa aly kheipazy chhaota)
A viasano Pihno L. Deli nata saw pano Joseph Beiduakhei Hlychho Ko 16 pa nata sawchano Esther Beihruasoh Hlychho Ko 15 zy chhaota ECM Bethel Local Church, Siaha liata ama y nga hai. He degree adao no heta alapi nata saw aza hlao thei vei ei.
Ano he cha apakawpa chata, M.Div achunga nota apatlopa pata USA tawhta University sakha tawhta a charopa (thesis) vata Doctor of Divinity (D.D) ama vaw pie hapa kha a cha. Chasala, achuna cha basai lei pata pazao via lyma ta atanoh ta Ph.D he avaw hmo pa a cha. A uhta Rev. H.C Khaicho B.D chhao atahma he Shillong liata M.Th atao nga hai hra.
Mara saw zydua chata acharopa chhaota ryuh (treasure) a cha hmeiseih. He achabu rohpa he khati tama chalei thei awpata publish pa a cha aw tahpa he pahno thei mahpa cha mahvei.
(Dr. John nata Ls. Vicky Azyu narozy chhaota)
Dr. John he KTP Headquarters liata angia tua tawhta avaw chakao lyma pa chata, Ministry experience cha ko 20 hlei tlai a vaw hnei. Pune liata a y nota Mawsaw (Mizo) nata Marasaw zy chata chhituhpa ama phahnai kaw tyhpa kha chata, Bangalore liata a y tawh chhaota Mara Christian Fellowship: Bangalore adua tawhta President chana avaw patuh tua chaipa Khazohpa cha nata Mara sawzy chata avaw hma tyhpa kha a cha.
Mara saw Centenary avaw chapana liata byhna eima dao hmeiseih. Secular lata Law liata Doctorate Dr. Ngo Cho Le vaw hnei pita, History la liata Dr K. Robin vaw hnei heih pita, atahma he Puhpa Paul Pai U chhao D.Th final US tawhta thlai a vaw patlo hra aw, byhna thata eima dao.
He hawpa degree asachaipa Ph.D a vaw dao thei pa he Gospel Centenary ko vaw chapa heina liana he ta, Dr. John Hamlet Hlychho nata achhokhazy Maraland.net ta aly khei hmeiseih pita, Mara saw zydua chata byhna a cha lyma awpata eima khokheina eima hla hra.
Note: India lia Mara saw hryta Theology la liata doctorate achu papua tua chaipa a cha. Apie ta piepa lia cha ano chhao he D.D a vaw daona kha arei kaw ba hra.
-
|2009-10-03 20:19:18 GoodExternal nata Correspondence ta degree hlupi, doctorate taihta anaosia kawta hmo theipa chata aly a chhi kaw hrapa cha. A hnoh chaita adaopa PhD degree khila eima lykhei hmeiseih tlai maw!
-
|2009-10-03 21:25:20 HehepawGood tah awpa a cha tly ma? Correspondent nata External tahpa ta na reipa duama ei pahno thai vei. Dr. Hamlet he corres. or external ta a patlopa a y rai ma i?
-
|2009-11-25 18:39:32 Laiu Fachhai
Dear Duadua Paw,
Eima paso ngaita kaw saipa, maraland.net liata alykheina ei cha hla hma leipa vata atahma ei vaw tao. Ei cha ly khei kaw, a eihpachaipa ta, eima awnanopa tawhta earned doctorate (PhD) tua chaipa naw vaw cha theipa vata. Beipa ta nama nata na thainazy rah nata awnanopa chata cha hmah via lyma se!
Na research chhao he a pha kaw. Rei byuh a chhih kaw. Publish cheingei mah y!
Vanoh Paw