SIAHA, 18 Chhiepa, 2025 – Puhpa K. Hrahmô, MLA, 40-Palak (ST) A/C ta Agape Home (Amôbyuh Vaihthieh) châta abyuhna lia maih hmâ awpa ta Motor a chaleipa cha târi 12.06.2025 kha ta Siaha su liata hlâna Programme ahmâpa a châ.
He daihti liata Puhpa K. Hrahmô, MLA zachhihpa chata biereina chyupa daihti hmâh ta, “Zawpi vyuhpa ta atlypatlohpa châ na ta, zawpi ta eima peimawhpa eima reipa cha eimâ phana rakha hawhta eima tao lymâ awpa he eima maohphaohna a châ; zawpi eih eima châna hawhta motor liata moh arohpa he a byuh ei tah leipa vâta moh roh leipa châ ta, Fund ta â hnawna hawhta MLA tahpa nata Constituency moh deikua palâsapa a châ” tahpa a reih.
Hlâna su he Lorrain Hall, ECM Assembly, Siaha Vaihpi achhaipa châ ta, ahlâna programme chyupa taopa liata Chairman Rev. Az. Beirakaw, Executive Secretary (Social Mission & Development), ECM Assembly ta chhihtha ta, Rev. Z.Hrohmô, ECM Assembly Secretary (Sr.) ta Thlahchhâna a hnei.
Rev. Chhuakhu Khithie, Executive Secretary (Edu.), ECM Assembly ta biereina chyupa daihti hmâh ta, Rev. T. Beipathai, Manager, Agape Home ta alynabie reina nata report chyupa piena daihti a hmâh.
Puhpa K. Hrahmô, MLA ta Motor (Maruti Suzuki Eeco Van), Agape Home châta a chaleipa cha Agape Home Manager vyuhpa ta aduahpa Rev. Chhuakhu Khithie, Executive Secretary (Edu.), ECM Assembly hnoh ta motor châbi nata document zy hlâna a hnei.
Rev. K. Vabeinochô, Moderator, ECM Assembly ta Motor thiehpa hlâna thlahchhâna hnei ta, Ellen Hlycho, Coordinator, Social Mission, ECM Assembly ta Vote of thanks reina hneipa ta ahlâna programme chyupa he pachhâsapa a châ.
Puhpa K. Hrahmô, MLA he Puhpa T. Seido, EM i/c Sports etc. MADC ta chakaochahlâh ta, Agape Home Management Committee Member nata MADC EM i/c Puhpa K. Chhuabei chhao â hlao thei hra. BJP District HQ tawhta L. Vabeihlathie, Media Cell ta zi ta, chhôhkha lâ tawhta Machâ AZ. Chokhai, Hyutuhpa, ECM College Vaih North, Puhpa K. Machhua, EO (MS), MADC nata Puhpa Beirôkhu Beitâ, RSO, MADC zy ta ama chakaochahlâh thei hra.