Târi 2 September 2026 kha ta Mara Thlyutlia Py (MTP), General (Gen.) Headquarters (HQ), Siaha liata eima nôpaw chaipa Puhpa N. Solomon Beihlotha, General Secretary cha Office peimawhpazy adaohpa ta Delhi liata a châh khai tawhta Bangalore zatlô ta, MSO Sub HQ: Bangalore chhituhpa manôh pa 8 tlaita ta Bangalore Airport liata va y dypa châta, Bangalore liata Office adaoh awpa peimawh pazy â dao khai/patlô tawhta, târi 4 September 2026 zâ ta MSO Sub HQ: Bangalore ta Mararâh châta a theina zydua papua tah, keih chakâ lymâ tuhpa Puhpa N. Solomon Beihlotha, GS, MTP Gen. HQ châ heta dinner taopa a châ hleikhô ta apakyhna nata pasyupalina pha kawpa maniah a hnei khei.
Dinner hneina su he Pihnô K. Celia Lalruatsangi (Sangi) Regional Manager, Canara Bank, Bangalore na O (Richmond Town) liata Puhpa Solomon Beihlotha, Gen Secy. MTP Gen HQ, Siaha châ heta a special kawta MSO Sub HQ: Bangalore ta a taopa.
He eima programme he Ls. Roseline Solo, MCF Chairman ta chhihtha ta, Puhpa N. Solomon Beihlotha General Secretary, MTP General Headquarters, Siaha tawhta Bangalore Marasaw zy châta pasyuna/bietana pha kawpa nahthliepa châ ta, he hawhna heta Puhpa Solomon ta Bangalore liata Marasaw a ypazy maniah a pasyu:
“Marasawzy pi ta mahnô mapaw bieso a-icha kawpa hnei pi ta, cha cha ‘Tôhki tôhkâ, tôhtlavaih; Sydie sydâ, sytlavaih’ tahpa bie he a châ. Atahmâ he Mararâh puasaipa ta Bangalore khihpi lâ ta châ a chu awpazy, raihria awpazy ta keih za chakâpa ta za tôh ha ei chi ta, nama tôh papua cheingei awpa ta Mararâh ta eima cha vaw hnabeisei chyu aw. Bangalore liata y ei chi ta, nama hmo taopa namâ sy-sai hei tlôh khiatala Marasaw châta nohzaohna nama châ tlamaw thei. Chavâta, eima hmo taopa chyu liata tiama papua chanei sih la, eima tôh hapa daidao la, tôh pathlah cheingei awpa ta riahphana hnei u la, Khazohpa pahnona chô nata Marasaw nama châpa zakheileina chôta hlaotlohna tôh papua chyu awpa ta ei cha pasyu chy ei” tahpa ta pasyuhna bie riahpha kawpa ta Marasaw students nahzy mania a pasyuh.
He dei châleipa ta Puhpa N. Solomon Beihlotha heta Mara manô mapaw taozie phakawpa ‘tlômo’ pha kawpa he a ry liatanazy hno heta a hlâ hra.
1) Pihnô K. Sangi, Regional Manager, Canara Bank, Bangalore hnohta Mara Bag pha kawpa a hlâ.
2) Ls. Rosaline Solo, MCF Chairman hnoh chhao ta Mara bag a present hra.
3) Puhpa Amon Lawda, Present MSO Sub HQ: Bangalore hnohta Marasaw athei ngâthlâhna châta present châta Mara bag a present.
4) Puhpa TK. Rôna, Advisor MSO Sub HQ: Bangalore hnoh chhaota present Mararâh souvenir pha kawpa a pie.
He zâ daihti lia heta MSO member manôh 30 hlei tlai pua pakhy ei ta, MSO Sub HQ: Bangalore ta zâpati pahâh kawpa Puhpa N.Solomon Beihlotha. GS (MTP Gen HQ) pasôna palâsana châta a pachhuahpanohpa dôh(nie) khohna hnei pâpa a châ.
He eima programme zy a hlaotloh thei n’awpa ta Pihnô Celia Lalruatsangi Gayary (Pihnô Sangi) nata a chhôhkha zy ta, ama O miah ama pahmâ hleikhô ta ato eima ngiahpa to rai i leipa ta pasai kawpa ta miah pahmâ sa ei ta, ama chô liata MSO Sub HQ Bangalore ta alynabie eima rei hmeiseih; MSO Sub HQ: Bangalore châta ama hmopha taopa he keimo ta thô thei vei hr’aw sila , eima BEIPA ato taotheituhpa ta alie hluhpi ta byhnâ vao hri mawh sy.
Sd/- GENERAL SECRETARY
MSO Sub HQ : Bangalore
(Edited & Published by Admin, MNN)