Pahrâna maih liata Khazohpa châta ngâchhih awpa – Rev. Dr. Laiu Fachhai
Biehmiachhih:
Zawsi he Zakaw saw pahrawhleinopazy hry liata a hawti chaipa Benzamin a pazipa a châ. Saw pha kawpa châ ta, a paw Zakaw ta kyh a pachâ kawpa vâta nata a mâsapa (a uhtazy nata a nô nata a paw chhao taih ta a hmia liata a bôhpa ta amâ naohna daihti a vaw tlô awpazie) vâta, a uhtazy ta chhyh thai leipa ei ta. Nohkha cha a uhtazy lyurâhpa liata sahroh ama vaina lâ a paw Zakaw ta mo awpa ta tuah ta; ama o a kei tlôpa na ta, a uhtazy chata thieh awpa a chhuah ei ta, châhrasala ama hry liata thokha ta ama heihnawh pilâh hmeihseihpa thie thlâh ha awpa cha a phapa ta pahno leipa ei ta, chatanachata Midia chyhsa sôhpaliepazy hnohta ama zuah haw. Midia chysazy heta Izi râh Phiraoh abeina râh liata hyutuhpa pakha, a moh Potipha, hnohta Zawsi cha ama zua pachhuah. Châhrasala, a yna maih na ta a hmotaopa maih liata Zawsi cha Khazohpa china chôta y lymâpa ta tao lymâ ta, châvata Khazohpa chhaota Zawsi hnohta y hra ta, a hmotaopa maih liata thlaohchhipa ta a y lymâ.
- ZAWSI A NÔ NATA PAW O LIATA A YNA DAIHTI (Joseph at his parents’ house) (Âthaona bo 37):
Zawzi cha a paw rei a ngia ta, a paw Khazohpa Jehovah chhao chipa ta â chhy hra. Âthaona 37:2 liata eima hmô theipa hawhta, a uhtazy ta thathipa nata haiphiapa ta sahroh ama vaipa cha pha tah leipa ta ama paw Zakaw hnohta a chho tyh. He he ta a paw hmo hneipa cha ano hmo hneipa hawhta khâ a pachâ ha hrana zie a palâsa. He he ta maniah a pachupa cha, saw nata nawh Khazohpa lâ chhihthana kyh liata nô nata paw maohphaona a lai zie nata â sâh zie maniah a pachu. Eima nô nata paw ochhôh liata eima y nota Khazohpa eima pahno ha khiata cha, khataih su lâ eima siepa chhaota eima ngiapana â i laih lymâ aw. Saw nata nawh zy hry liata kyhpachâ eih viapa nata khokhei eih viapa hnei lei awpa chhao maniah a pachu hra. Zawsi uhtazy moleina cha kao nanopa ta soh chy si la, ama paw Zakaw he ta, a saw hry liata Zawsi he a khokhei eih viapa vâta a uhtazy heta ama hao pachai viana chhao a châ thei aw.
Atanoh Mara Krizyhpa thokha cha, eima râh liata eima y no ta ngiapatuh pha kawpa lyu pi ta, châhrasala eima râh hawka eima zo ti ta, eima Krizyna viahpakao pahluhpa ta, khizaw viahpakao tlao eimâ ky ha tyh. Eima yna maih liata Khazohpa châta ngâchhih awpa he Zawsi hro ta maniah a pachu.
- ZAWSI PAWTIPHA O LIATA A YNA DAIHTI (Joseph at Potiphar’s house) (Âthaona bo 39):
A uhtazy ta Midia chysazy hnohta zuah ei ta, Midia chyhsazy ta Pawtipha lâ ama zua pachhuah hapa vâta Zawsi cha thyudyupa kô 17-pa a châ nota Pawtipha o liata sei ta a y pathao. Sei châpa hro nata raihria he hmo naopa châ leipa ta, châhrasala Zawsi cha a sei rai cha tiama kawpa nata ngâchhihh kawpa ta hria lymâ ta, chavâta a zibeipa Pawtipha he ta Zawsi cha ngâ ngâsâ thlâh ha ta, a o liata raihria nata maohphaona zydua Zawsi hnohta a hlâ khai haw. Zawsi cha kaw pitloh via laihpa ta Satlia pôhraoh pha kawpa nata chhithai kawpa kaw châ ha ta. Chatanachata Pawtipha lapinô ta Zawsi cha khoh kaw ta, ykhei awpa ta a reipasao tyh. Zawsi deikua cha paryhsa ngai leipa ta, “Ei zibeipa ta na ngâpa ta he o liata hmoto zydua keima ku liata soh khai ta, nâma deikua cha a lapinô na châpa vâta keima ku ry liata y va chi, chavâta he hmo na pahruapa he ei zibeipa ta kho leipa aw ta, kheitama he tlupo ta nâ ngâpa ei zibeipa kho leipa he ei tao thei aw!
Chahleikhô ta, keima cha Khazohpa hrohpa a chhypa châ na ta, ahy hmahta na hmô vei hra ei sa la, Khazohpa hrohpa ta na hmô ta, chavâta kheihta e, he tlu ta moleina lai ngaitapa he Khazohpa hnohta ei tao thei aw!” tahpata a chhy ha tyh. Nohkha cha o liata ahy hmahta ama y lei nota, Pawtipha lapinô ta Zawsi cha reipasao heih ta, châhrasala Zawsi ta a pa-ei ha heihpa vâta Zawsi cha patupakhi a chhuah ta, Zawsi deikua chata â râsai syulyu haw.
He he ta moleina cha â râ ta a râsai awpa a châna zie maniah a pachu. Zawsi heta he moleina reipasaona su tawhna heta a râ leipa ta avaw y hapa châ sala, kha moleina kha pahnie leipa ta a y thei aw. Â râ hapa vâta, kha molei reipasaona kha a pahnie haw. Paritheipa niedona su tawhtazy, chanôchapaw châna reipasaona su tawhtapazy, atu adaina su tawhtapazy, kyhchhie thâhia reina su tawh tahpazy he a râsai lymâ awpa a châ. Chahleikhô ta eimâ chu thei heih awpa cha, chanôchapaw châna (sex) he Khazoh hmosaipiepa hmo pha kawpa châ ta, anodeikua nôpi-nôvah likaw lia deita ta hmâ awpa ta Khazohpa ta a pasai.
Eima lapinô nata avahpa a châ leipazy liata eima hmâ khiata cha moleina lai ngaitapa a châ. HIV/AIDS hehawhta atanoh khizaw liata a pôh chahra kawna chhao he, chyhsazy ta “sex” he Khazohpa kho lei zie hawhta ama hmâ tu hapa vâta a châ. Eimâ chu thei awpa a y via heihpa cha, moleina zydua he Khazohpa hnohta moleina a châ khai. Chyhsa ta maniah hmô vei hra ei sa la, eima moleina chhao pahno vei hra ei sa la, Khazohpa ta hmô khai ta, a pahno khai. Khazohpa tawhta eima nyu thei awpa khâpahmâh y vei. Eima vaw molei tlamaw hapa a châ khiata cha, eima moleinazy cha ano liata palâhâh ta â (…Page No. 1 tawhta Sermon bie pazaona) ngiathaina a haw awpa he eima tao theipa a y chhôhpa cha a châ.
- ZAWSI LÔ-O LIATA A YNA DAIHTI (Joseph at prison) (Âthaona 39:20-41:40):
Pawtipha lapinô chata a noza bie nata Zawsi ta Pawtipha hnohta hmo yzie a chho aw tahpa a chi vâta, Pawtipha cha haipa bie chho ta, Zawsi ta ano cha patuhpakhi awpa â chhuahna zie Pawtipha hnohta chho ta. Chatanatachata Pawtipha cha a pathi-iapa ta Zawsi cha lô-o liata khô ha ta. Zawsi cha lô-o liata a ypa chhaota a pha kawpata y heih ta, chatanachata lô-o biehneituhpa ta Zawsi cha ngâ ngâsâ thlâh ha ta, lô-o liata biehneina zydua cha Zawsi hnohta a soh khai haw.
He he ta maniah a pachupa cha, mosiapazy chhao he riethei ama tao thlâh ha tyh hra. Pity eikhana bo 3:17 ta maniah a chhopa hawhta, “Hmo moleipa taopa vâta pasa taopa hlâta cha Khazohpa â ryh a tahna zie a châ khiata cha, hmo pha taopa vâta pasa taopa he pha via tlôh ta.” Châhrasala, hmo pha taopa vâta pasa a taopazy cha achhâna liata cha cheihchalopa ta ama y tyh. Zawsi chhao he achhâna lâta cha cheihchalopa ta a y haw. He he ta maniah a pachu via heihpa cha, lô-o liata atâhpa nata ahropa duahmo chhiena daihti eimâ tyhpa chhaota Khazohpa liata ngâchhih lymâ awpa a byuh.
- ZAWSI ABEI-O LIATA A YNA DAIHTI (Joseph at the palace) (Âthaona bo 41-50):
Zawsi lô-o liata â tâh chhôh kha Izi râh bei rôhnapa Phirao chata mâ no-âh chhih kawpa nata rarôh y kawpa sa ta. Chacha ahyta hmahta chhopasia thei tlâ leipa ei ta. Phiraoh ry liata raihriatuhpa pakha lô-o liata patâh hapa, ahnôhlâ ta papua heihpa chata Zawsi ta lô o liata â tâh nota a mâsapa a chhopasiapa â do ngaitapa ta a vaw tlô hapa thâtih a kaw thei ta, cha kyh cha Phiraoh hnohta chho ta. Chatanachata Phiraoh ta Zawsi cha lô-o tawhta abei-o lâ a vaw chhi awpa ta biepie ta.
Zawsi ta Phiraoh mâsapa cha, kô sari chhôh kôvei pha aw ta, cha khai tawhta kô sari chhôh chakâhna rarôh ypa a vaw tlô awpa kyh a châna zie a chhopa nata kô sari kôvei pha chhôh ta a phapa ta chakâh daihti kô sari châta pachô awpa â ngiahna zie a chhopa cha, abei palôh tlâh kaw ta, chavâta Zawsi cha Iri râh liata “Prime Minister” rai piepa a châ haw. Biehneina lâta Phiraoh a pazipa, biehnei a sâh chaipa a sânona (number two) a vaw châ haw. Kô sari khai tawhta chakâhna thata a tlôpa vâta Kana râh tawhta a uhtazy nata a hnôhla ta a paw chhao deichhy thei hapa ta, Izi râh lâ a zâ paih chy awpa ta ryh a raokhei thei ha hra ei.
Zawsi he ano a sapa kô 30 a kaw tlohna daihti liata Iri râh biehneituhpa kaw châ ta. Cha yzie cha kô 17 a châ nota a mâsana daihti tawhta Izi râh bei a kaw châna daihti likaw he kô 13 a châ. Kô 7-pa kôvei pha daihti khai tawhta, chakâh tlôna kô 2-na liata a uhta zydua nata a paw chhao chhôhkha zydua Iri râh lâ a zâ paihpa ta Zawsi biehneina ry lâ amâ zâ ngia. Zawsi he ta a mâsapa a vaw tlô n’awpa daihti he kô 22 chhôh tlai a hâ. He he ta hmo pha to awpa nata a chhuahna hlaotloh awpa ta hâ hoh â ngiahna zie maniah a pachu.
Keimo Marapasaw thokha cha, atanoh ta eima hmotaopa cha mylâ ta a theilâpa hmô pâ ha awpa eima khoh. Chavâta, kô hluhpi khô lâta a theilâpa hmô thei awpa hmo nata rai zy hria hoh mapi. Hmo pha hmô awpa ta hâ hoh awpa â ngiah hmeihseih. Ano a zuah hapa a uhtazy chô liata Zawsi cha viari thô khona palôh phao leipa ta â ngiathai ha ei. He he ta, viari a thô leipa ta a ngiathai veichâh ha awpa a châna zie maniah a pachu hra. Zawsi he biehnei a sâh ngaitapa liata a ypa chhaota, a palai leipa ta, nie paru hra leipa ta, a nawh ngaitapa nata kyhpachâna nata adona chôta râh cha a chhihtha. A mopâtlâh a châ hmeihseih.
Biepachhâna:
Zawsi thâtih eimâ chuna liata eima rei chanei ngâ thlâh ha pa cha, “Khazohpa cha Zawsi hnohta y ta” tahpa he a châ. Hehawhta a châ theina chhâpa he, Zawsi ta Khazohpa cha a thei ta, ano liata khâchâ â pahnieh hapa vâta a châ. Chavâta kyhpachâpa Marapasaw zydua saih u, khâpa su liata nama ypa chhaota, kheihhawhpa rai nama hriapa chhaota, Khazohpa khozie hawhta y lymâ u la, Khazohpa chhaota nama hnohta khâ a y lymâ hra aw. Zawsi ta tovyuh chhie chaina, sei nata patâhpa ta a yna daihti nata tovyu chôchhâh, abei ta ayna daihti zydua liata Khazohpa khozie hawhta a hro lymâpa hawhta, nâmo chhao kheihawhpa duasu liata nama ypa chhaota Khazohpa khozie hawhta vaw hroh lymâ u la, Khazohpa ta a cha bao lymâ hra aw ei.
Abeipa ta a Bie chyuhta eimâ châhkhei theipa cha eima zydua châta byhnâ maniah piepa se. AMEN.