CHAKHEI, 4 Di, 2011 (MNN) – Mararah liata Missionary hnohchaipa Rev. Violet Louisa Annie Mark (Freddie No), rohna kawpa ta Chakhei khihsawzy ta ama dypa chata Chakhei Vaihpi liata ECM Local Church: Chakhei Achhyna-O thiehpa cha Pahanoh, 4th December 2011 khata kyhchhina chhaota a rohna kawpa ta a pahy haw.
Mararah liata Missionary hnoh chaipa (the last missionary to Maraland) he a vahpa Rev. L. Mark ta kaw deichhy ta, 3rd December 2011 Pachyhnoh ta Chakhei khih kaw tlo ei ta, Chakhei Local church yna Chakhei Vaihpi liata kaw tlo ei ta Zawpi hlupi ta ama dy.
Mararah liata missionary hnohchaipa ta Chakhei Local Church Achhyna-O thiehpa a pahypa he a khihsawzy ta aly hmeiseih ei ta, amo a chareipa chie leipa ei ta, amo kuta ei khata a chibai awpa angiatiah leipa chhao ama hluh ngaita. Eima missionary zy cho liana heta khihsawzy ta ama ly ngaita. Nothlah a lakheituhpa chhao ama hluh ngaita hra.
Chakhei Local Church Achhyna-O thiehpa sana daihti he ko 10 ro tlai a ryu vata, he hawhta patlopa cha ta, Khazohpa achhyna byuryh pathaihpa ama hnei thei heihpa vata Abeipa Paw Khazohpa cho liata chhao alyna bie thata ama reih.
Chakhei khih liana heta ECM Local Church sathoh (3) y ta, chazy cha Nazareth Vaih Local Church, Chakheitlah Local Church nata Chakhei Local Church zy a cha. Chakhei Local Church he Local church hlo chaipa a cha.
He Achhyna-O thiehpa pahyna liana heta Chakhei leilosaw khi hrola ta a ypa hluhpi chhao vaw tlo ei ta, MDC biatuhpa Puhpa K. Hrahmo, EM (Edu.) novah zy chhao ama hlao hra.
(Admin, maraland.net)