SIAHA, 14 Patôh, 2017 – Mararâh Missionary Revd. RA. Lorrain ta pastor ordination a piepa nata Kross Pheisaih hnôhchaipa Rev. C. Thalai, Mara reih sermon he vaw reih la, a vaw thôhkhei cheingei mah y.
Hlâno Israel sawzy thâtih eimâ chu khiata cha pho maisâh he a lâluah ngâsâpa a châ. Cha hawna chata, zôpha viapa ta eima sai khiata cha Maisâh eima hmôtuapazy cha chhôhkha Maisâh he a vaw châpa a châ. Naw chhôhkha nah kha Ti pa –ua tlô khai tawhta Leilô ama tly tua nota ama tao tuachaipa cha chhôhkha Maisâh Abeipa châta ama taopa a châ. Abaraha chhaota Maisâh tao ta cha liata a sawchapaw Aisika chhao hlâ a chhuahpa a châ. Zakaw chhaota Maisâh a padua lymâ hra.
Zawba chhaota a sawzy ta hmo ama parao lei n’awpa ta mydi ta thyu ta Maisâh liata a hlâ khai tyh ei, cha vâta a sawchapaw 7 nata chanô 3, nokha liata ama thi khai no chhaota Zawba cha Abeipa lâta nô –u na hnei leipa ta bie rônah ngâsâpa tlao a reih. Zawba sawchanô 3 penawh chhochhi cha Uz râh liata chanô hmipha chaipa ta reipa ama châ. Zawba ta he hawhta a vaw reih “Einô chhi tawhta thluahruapa ta ei vaw pua, thluahruapa ta ei kua heih aw, Abeipa chata pie ta, Abeipa chata ala lilaw ha heih. Abeipa moh cha reithaipa ta y mawh sy” tahpa ta.
He hmo zydua liana heta Zawba cha molei vei, rairuna chi nanopa a chô liata atlôpa chhaota Khazohpa rai reipachhie beih vei. (Zawba 1:21)
MAISÂH YZIE
Maisâh cha Khazohpa nata a chyhsazy bie a chhona su a châ. Chavâta Abeipa Khazohpa ta, “Su Pathaihpa na taopa ei se, ama hru liata ei pahrâ thei n’awpa ta” tahpa ta (Puasaina 25:8). Nama hry liata ei chhyna byureih cha pa ysa aw na ta, ei hrona chata châ hei sai aw veih ei. Nama hry liata y aw na ta nama Khazohpa châ aw na ta nâmo chhao ei chyhsa nama châ aw. (Theithaina 26: 11–12) Maisâh cha Khazohpa nata a chyhsazy a kaokhona su peimawh ngâsâpa, su Pathaihpa theithai bei chaipa deita ta Kô 1 liata thisaih chhaota ama ngia theipa ‘Skena’ ama tahpa a chô.
Chavâta Maisâh cha Khazohpa pahrâna su a châpa vâta eima za awpa a châ. Fellowship hawhta Khazohpa Achhyna – O cha a paly –pa uasana zy hawhta hmâpa châ vei. Khazohpa Achhyna – O Pathaihpa su liata ku chabaih ngâpazy he Khazohpa za leina a châ.
“Khazohpa cha thlahpa a châ, a chhytuhpazy ta thlahpa nata hmeiseihpa ta amâ chhy awpa a châ” (Zawhana 4:23 – 24).
KRIZYHPA CHHÔHKHA PAKHYNA A SÔHZIE
A sôhnazie a pahnotuhpa ta cha amâ cheipa chhaota chhôhkha pakhyna ama hnei khopa a châ. A sôhzie a pahno leipazy deikua cha amâ piepa chhao hmahta chhôhkha pakhyna hoh vei ei. Chhôhkha pakhyna khoh kaw hra ei sala, a hluhpi ta eima hnei thei leina chhâpa cha keimo ryhpaohna maihta hmâ thlâhpa a châpa vâta chhôhkha pakhyna hnei pazao thei leipa a châ chai. Keimo ryhpaohna maihta hmâ eima chhuah khiacha kô 100 hmah hroh ei sihla chhôhkha a pakhyna hnei thei beih aw ma pi.
Hla taotuhpa ta, “Hrochhôh khihsa pachâ ta ei thlahpa viavi” tahpa he â do ngâsâpa a châ.
Chhôhkha pakhyna a hnei hmeiseih penawhzy cha a tlâhpipata adaihti fix thei hawpa nahzy ama châ. Zâ pati nie hlâta ama hnei tyhpa a châ. cha hawpa nahzy cha chhôhkha Maisâh a hnei penawhzy ama châ. “Maisâh liata mei ia ngâthlâh ha aw ta, a thi awpa châ vei” (Tht. 12 – 13).