SIAHA, 20 Nawh, 2019 – Marasaw tawhta Kross Pheisaih a châpa hry liata miah hrolâhpa y tlakaihpa Rev. C. Thalai sermon rohpa he vaw reih hra rua mah y.
“Atahmâhlâ hmo yzie nama pahnopa vâta nata amôpa thyu âdaih haw hmeiseih tahpa nama pahnopa vâta cha cha ei reih, atahmâ cha eimâ ngiapâ tuano hlâna khata eima pachhana cha ahnia via haw tlôh ta; zâ he chhâ daihmâ ta khih a deih daihmâ haw. Chavâta zohna liata hmotaopa cha thy ei sih la, khaihna atobina ta atobi ei suh u. Nohchhô ta ypa hawhta ângia ngaitapa ta y ei suh u”. ( Rawma. 13:11-13)
Atahmâhlâ khizaw akaw nano lymâpa liana heta moleina rarôh yzie cha hlâno Sawdawma nata Kawmawra khih moleina, chanô chapaw kyh liatazy, khizaw tâkâ sôh tlaichhaina kyh liatazy hlâno Sawdawma nata Kawmawra moleina cha eima khô syulyu ha bâpa a châ.
Abeipa Khazohpa palôhrupa cha khatluta pasa aw vâ ma??? Sawdawma nata Kawmawra moleinazie cha a rarôh y ngâsâ. Sawdawma nata Kawmawra rao n’awpa kyh zikyu arâtuh penawh Vâlyuhchâpa chhao taihta a ziakhei’pah achhuah thlâhpa ama châ. Chavâta, Lawta ta pakhâ achhuah ta, châhrasala pakhâ thei khao leipa ta, Vâlyuhchâpa ta ama mo a pachaosa khai ha ei tahpa eima pahno. Khazohpa kho leipa taopa he chi â chhih hmeiseihpa a châ. (Athaona 19:10).
Lawta râh atlypa cha Zawar bypi khizaw sôhnawh puana su pha ngâsâpa châ ta, khizaw huasua phana zydua aki khai thlâh hapa a châ. Lawta lahpinô cha vâlyuhchâpazy ta khih khôtho taih puakhei ei ta, hnôhlâ a heih ta, chavâta chyhsapa thi zie chhaota thi leipa ta, alôh tlo lâ ta â lie haw !!!!! A rarôh y hmeiseihpa a châ. ( Athaona 19:26).
Zuda Iskari chhao kha Apostol hry ta ngâchhih chaipa sôh avaotuhpa châ ta, châhrasala khizaw sôh ta vaw zy haw hra ta, Abeipa a chakaotuhpa cha Tâkâ sythôh (30) ta a zuah haw tahpa eima pahno. (Mt.26:14-16). Chavâta a thizie chhao a rarôh y ngâsâ; ‘Âkhu lâ ta pao ta, a liahlia a patlaw ta, a rih zydua pua khai ha ta’ tahpa a châ (Hmt 1:18)
Lyuhchâpa Pawla chhaota Tâkâ sôh tlaichhaina cha moleina thabypa a chânazie 1Tim 6:9-10 liata maniah a chho. Tâkâ sôh he chyhsa hluhpi thlahpa mo a pachaosatuhpa a châ. Dema cha khizaw sôh tlaichhaina vâta Abeipa chakaona a siesai tahpa 2Tim 4:9-10 liata eima hmô. Atahmâ chhao he chyhsa hluhpi Dema siena lâthlôh liata ama sie ngâhai!!! Nâ nata kei chhao khâpa lâthlôh ma eimâ chhih ngâhai, a pasia chyu ei suh u. Khizaw sôh liata palôhtlâhna a yzie he hawhta Bible ta maniah a chho; “Tâkâ sôh a pachâtuhpa cha Tâkâ liata a palôhtlâh leipa aw ta, hneirôna a chadaituhpa chhao chata a khopa hawhta a thôh hlei vei, hrao leipa a châ”. Tahpa Biechhotuhpa 5:10 liata eima hmô.
Khizaw tâkâ sôh ta chyhsa a parao theizie:
Khizaw Tâkâ sôh hmô thei n’awpa a châ khia cha chyhsa momanôh hrona sôh ngâsâpa chhao pahlei awpa pei tahna y khao vei.!!! Thohna pha leipa nata chichhihpa châmaihzy taihta sôhpalie n’awpa ta hmâpa a châ haw bâpa a châ.
Chavâta thyutlia hluhpi cha nie nata do nata paritheipa vâta thyutlia sâh hluhpi cha thina thlâkhaoh lâ ama ngai khai haw.!!! Ngiachhi amâ chhi hmeiseih. Ti loh ta hnôhlâ a kaw kua thai khao leipa hawhta, khizaw liata vaw kua heih khao aw veih ei.!! Salem Beipa hmiakô liata kheihawhta châ sualuah aw vâ ei ma.!!!!
Haipa a pha leizie
‘A haihthaipazy cha Vârâh khôtho lâ ta y awpa ama châ aw,’ tahpa ta Bible liata maniah a chho. Hai a khopa nata hai hmâhpazy maih cha Vârâh a ngia lei awpa list liata pahlaopa ama châ haw !! Chavâta chyhsa a haih thaipazy cha ngiachhi amâ chhi ngâsâ, vârâh ama to lei awpa vâta. Haipa a pha leizie cha biedopa ama reih leipa vâta rairuna a taotuhpa ama châpa a châ, ama bie chhao chyhsa ta zo hra veih ei, biedopa ama reih tlakaihpa chhao ahyhmah ta zo thai khao leipa ei ta, chyhsa ta âmo lia ngâna hleikhô ta vârâh amâ ngia lei awpa vâta ngiachhi amâ chhi pachai heih. ( Bph 22:15)
Hmo do leipa liata chhôhkha a khokheina pha lezie:
Anania nata a lahpinô Saphira cha khizaw sôh ama tlaichhaipa vâta a reiparaoh ei ta, ama lei su zy ama phihpa vâta Khazohpa ta kho leipa ta noh nokha liata a ma r cha pabu khopa ama cha!! Khazohpa thlahpa pathaihpa cha chyhsapa hawhta dôvei thei’pa châ vei.
Anania nata Saphira thâtih tawhta keimo chyuta eimâ duana su a pasia chyu hra suh vy, chhôhkha, sanawh-rinôpa ama châpa vâta hmo do leipa kyhzy liata a khokheina he moleina papôhsatuhpa a châ. Hmo do leipa kyhzy liata sanawh chhôhkha bie a paraohpa he hmopha lei ngâsâpa a châ, a pha leizie cha khihtlâh ta tao ta, Awnanopa ta tao ta, mo pakha nata chhôhkha ta a tao!!! Hehawhpa hmo pha leipa, achâkheina nata akhokheina he Awnanopa liata â ngia ngâhai, chavâta Awnanopa ta rairuna â tyh lymâpa a châ.
Bie do leipa kyh liata bie a paraohpa a pha leizie cha Anania nata Saphira chô liata hmo a tlôpa liata hmô theipa ta a ypa a châ. Biehrai thiehpa liata a y beih leipa rarôh y ngaitapa ta thina cha ama chô liata a tlôpa a châ. “Anania chata cha bie cha a theipata nahta pao ta thi ha ta, atheipa maihta chi ngaita ei ta, satlia sahlaozy cha thyu ei ta, pahly ei ta, asy ei ta, pabu haw ei ta, Chahawhna hra chata Saphira chhao cha Pity ta ‘ moh teh na vahpa a pabutuhpazy phei cha chhikao thaby liata a vaw y haw.
Nâ chhao amâ châ sy aw’ tahpa, sôkhata a phei thaby liata pao ta, thi ha hra ta. Chatawhcha satlia sahlaozy cha a vaw ngia ei ta ano cha a thipa ta vaw hmô ei ta, a sy ei ta a vahpa kiapâh liana chata pabu haw ei ta. Awnanopa sahlao zydua nata cha kyhzy a theipa maihzy chata chi ngaita ei ta,” tahpa ta Bible liata mia a chho.(Hmt 5:1-11). Bie do leipa nata hmo phaleipa kyh liata aparaohna nata akhokheina he hmo phalei ngâsâpa a châ.
Awnanopa ryureina kyh lia chhao hmiamo viapa nata molei viapa hneipa he Khazohpa mohmô liata pasichhihpa a châ. Abeipa bie ta “Ryureina cha ti zy hawhta nata Siana cha Vahpi hawhta loh mawh sy” a tahpa a châ. (Amosa 5:24).