SIAHA, 22 Pachawh, 2022, Chutynoh – Atanoh dawh 12:15 PM kha ta MADC Complex liata State Bank of India (SBI) Automated Teller Machine (ATM) Booth thiehpa cha Puhpa Lalsangliana, MCS, DC, Siaha ta zawpi hmâ thei awpa ta a pahy.
Pahyna programme he MADC Complex tlyhmia liata taopa châ ta, Puhpa Mac Donald Lalropui, Chief Manager, SBI Branch, Siaha ta chhihtha ta, Rev. Pheitha Lava, Executive Secretary i/c Mission, ECM Headquarters ta Biehrai Pathaihpa reina nata pavaosana thlahchhâna a hnei.
Puhpa LP. Lalchangkima, Regional Manager, SBI, Regional Business Office, Aizawl ta Introductory Speech hnei ta, SBI ATM booth pahy awpa ta tao awpa hluhpi siepahlie byuh ta, SBI chhôh liata sôh lâta apachâpa department hleikhô ta engineer nano nanopazy nata a buakhei awpa chyhsa hluhpi byuh ta, chavâta hmahlana vaw rei kaw hra sala, a chatliena lâta tao awpa ta hmo theipa a châ lei zie reih ta, atanoh liata he hawhta MADC Complex liata ATM patyupa a vaw châpa he ano nata a hrialâpazy ta amâ ly zie a reih. Hmialâ daihti liata cha Siaha liata ATM bôh via lymâ awpa amâ chhuah zie reih ta, DC office complex lia chhao ATM so amâ chhuah zie a reih hra.
Puhpa K. Chhihrau, Executive Secretary ta biereina chyupa hnei hra ta, atanoh ATM Booth pahyna liata a vaw hlaopa zydua hnoh ta alynabie reih ta, Puhpa LP. Lalchangkima nahta viasa pha kawpa ama châ hleikhô ta châ â chu lâhpa vaw ei châ ta, he hawhta ano daihti liata MADC Complex liata ATM booth pahypa a châpa he â ly zie reih ta, Puhpa LP. Lalchangkima hnoh ta alynabie a reih hleikhô ta Puhpa Mac Donald Lalropui, Chief Manager, SBI Branch, Siaha nata a hrialâhpazy hnoh ta alynabie a reih.
Puhpa K. Chhihrau chata SBI Siaha Bazar liata nôpi pawpipazy ta Machâ hlao la awpa ta amâ patlâh tyhpazy a pachâ nahta MADC Complex liata ATM booth so awpa he a peimawh kawpa ta a pahnozie nata he hmo vâ he ta biehneituhpa lâ ta thapi phiapa ta hiana nata ahawna a tao chanei ngâ thlâhpazy reih ta, atanoh liata he hawhta hlaotlohna a vaw y hapa vâta â lyzie a reih.
Puhpa Lalsangliana, DC, Siaha ta ribbon chakiepa ta ATM Booth pahyna a hnei khai tawhta biereina chyupa hnei ta, Siaha District DC a châ chhôh ta a theina hawhta Mararâh châta rai hria â chhuah zie reih ta, Mararâh liata khih moh zydua, ama bina chhâpazy pahno khai ta, atahmâ he Mararâh khih, a theina hawhta tly lymâ â chhuah zie reih ta, khi thokhazy cha a tly ha tahpa a reih. Siaha Town chhôh liata Office zy tly papua khai ta, Office nano naopazy tawhta ano hnoh ta rairuna ama tlôkheipazy ta biehneituhpa lâ ta hiana châ chhao a pangia lymâzie a reih.
He dei châ leipa ta, New Colony (Puhpa N. Khumtira O kiah) liata lei a tlapahnaipa liata lâpi taopathi byuhpa su cha ano pôhpa tlai ta a su moh ta, atahmâ tawhta thla 1 chhôh liata DRDA, Siaha ta ama vaw tao patlô awpa ta ahawna taopa a châzie reih ta, ‘DC hropazy ta ama vaw moh ngâthlâh na, tao hlei vei ei’ tahpa social media liata ama reipa vaw pahno ta, ano daihti liata cha tao cheingei â chhuahzie a reih hra.
Puhpa Lalsangliana chata ATM booth, MADC complex liata pahypa a vaw châpa cha â lyzie reih ta, zawpi châta hmo phahnai kawpa châ hleikhô ta Mararâh châta hmahsiena ngiatlâh châ kawpa a châ tahpa a reih. Mararâh NGO nahzy, atanoh liata ama hmia a hmôpa vâta ama chô liata alynabie a reih hra.
Daihti chhâna lâ liata Puhpa Mac Donald Lalropui, Chief Manager, SBI Branch, Siaha ta vote of thanks reih ta, Rev. Pheita Lava ta thlahchhâna na ATM booth pahyna programme he pachhâsapa a châ.
He programme liata MTP Gen. HQ, MSO, Gen. HQ nata MCHP Gen. HQ hruapa ama châna hawhta ahlao ei ta, MADC liata HoDs nata Group ‘A’ officer zydua hruapa ama châna hawhta amâ hlao hra.
ATM Booth atanoh tawhta hmâ thei lymâpa châ aw ta, a yna su he MADC main complex angiana chavei lâ liata Mahatma Gandhi nohthlahpa kiahpâ liata a châ.
Source:
PRESS RELEASE NO.37/2022, ISSUED BY:
Information & Publicity Department
Mara Autonomous District Council
Siaha