SIAHA, 29 Pachawh, 2022, Chutynoh – Atanoh dawh 12:00 Noon liata Mara Autonomous District Council (MADC) eima vaw hmô tawhta kô 50 a tloh-na – Golden Jubilee cha MADC Complex liata arônah kawpa ta ahmâpa châ.
Puhpa KT. Beichô, IRAS, Commissioner & Secretary, Excise & Narcotics and Transport, Government of Mizoram cha Chief Guest châta hruapa a châna hawhta alyna programme â hlao thei hra.
Satlia MC. Beihrohmô, Asst. Audit Officer, MADC nata Laihsa Dr. HC. Joane Mary, VO, MADC Official zy ta Comperes châpa ta programme chhihtha ei ta, Puhpa K. Chhihrau, Executive Secretary, MADC ta Welcome Speech reih ta, Rev. VL. Ngaia Hlychho, Sr. Executive Secretary, ECM Assembly ta pavaosana a hnei. Chief Guest hleikhô ta Dr. C. Zohupa, College Vaih ta biereina chyupa a hnei hra.
MTP Branch: Siahatlâh zy ta Sawlâkia pamosa ei ta, MTP Branch: New Colony zy ta Awkhypa lâ ama pamosa hra.
Laihsa Damary P. Hlychho, Laihsa B. Priskily nata Puhpa John Beizachhi Phuto zy ta mo pakha hlasana hnei ei ta, Laihsa Jessica B. Khuhly ta mo pakha ta Golden Jubilee Theme Song a sa hra.
Daihti thaona nata chhâna liata ECM Assembly Choir zy ta Hallelujah Chorus hla ama paryh.
Puhpa KT. Beichô bierei tlâhpi viapazy:-
- MADC Golden Jubilee Organising Board Chairman Puhpa K. Chhihrau, Executive Secretary nata a hrialâhpazy, CEM, EMs, Chairman & Dy. Chairman nata ama hrialâhpazy, atanoh liata MADC Golden Jubilee alyna ahlao awpa ta avypa MADC hyutuh parohpazy, State Government officials, NGOs nata Media chyhsazy, nama zydua hnoh ta nata Mararâh zawpi hnoh ta MADC Golden Jubilee anaohna nata zana Samaw ei cha hlâ ei.
- Kô 1945 liata USA ta Japan râh Hiroshima nata Nagasaki khih zy ama bomb pa athei thlâhna nata liata athipazy taokheina vaw hnei tyh ei ta, râh hropazy ta taokheina daihti ama hmâ no ta keimo deikua Autonomous District Council (ADC) eima hmôpa alyna daihti eima hmâ theipa he arônah tah na ta, palôru hmeiseihpa ta aly na ta, ei ngiahma ngâsa.
- President of India A. P. J. Abdul Kalam (L) ta “LIFE and TIME are the world’s best Teachers” – Hrona nata Daihti he Pachutuh pha chaipa ama châ tahpa ta za reih ta, âdo kawpa ta ei pahno. Atanoh he liata avypakhypazy pi, kô 10 tawhta kô 70 taih chhao ta eima y. Daihti eima hmâ chiehpazy kha a kaw chu si la, eima kaw hmâ dâh pha leipa hluhpi y aw ta, eima hmâ dâh pha kawpa hluhpi chhao a y aw. A pha leina eima kaw hmâna daihti liata apha viapa ta eima kaw hmâna dâ miah pachu tuhpa cha daihti he a châ tahpa ei reih khoh kaw.
- Atanoh MADC kô 50 a tlohna avaw ly pi ta, kô 50 chhôh zydua liata miah chhihthatuhpa nahzy kha kheihta ma daihti ama kaw hmâ ma, ama kaw hmâ dâh – Autonomous District Council a châna dâh hawh tlaita eima kaw hmâh tly ma? Achâna dâh hawhta eima kaw hmâ leina daihti chhao ahluhpi a y thei aw; a pha ngâsapa ta eima kaw hmâna daihti chhao a y thei aw. Atahmâ ta ahmâh ngâhaipazy he – ama term chhôh liata ama hmâna dâh pha kawpazy y aw ta, ama hmâna dâh pha âh kaw leipazy chhao a y hra aw. Chavâta daihti he peimawh ngaita ta, daihti he miah pachutuh phapa a châ tahpa eima President (A. P. J. Abdul Kalam) ta a reipa kha âdo ei tah ngaitapa a châ. Daihti he ta hmoto zydua he miah chhopasia ta, daihti he eima papeimawhsa awpa na a châ tahpa ei reih khoh ngâsâ.
- Kô 2008 pa liata MNF sawhkhâ vaw tla ta, Puhpa Zoramthanga cha Lunglei Newspaper liata ama tla chhie kawna chhâpa hiahri ei ta, â chhyna cha “ti lo tur tam tak kan ti a, ti tur tam tak kan ti lo vang a ni” tahpa ta â chhy. He hawh tlai he ta MADC kô 50 eima vaw tloh hapa daihti lia he ta amohpakia si la, eima râh chhihthatuhpazy chhao, keimo mo pakha lia chhao a zâ moh si la, kô 40 zy, kô 50 zy, kô 60 a tloh hapa ta uhtheipa eima y – eima tao awpa tao leipa hluhpi y thei ta, eima tao lei awpa eima taopa chhao hluhpi a y thei aw.
- Eima râh chhihthana kyh liata nata keimo mo pakha lia chhao ta kô 50 eima tlohpa khô lâ he cha ataopathina nata amopakiana ta hmâ awpa ta ei khoh ngaita. Atahmâ ta Term a siekhei ngaihaipa (11th Term MADC) liata chhihthatuhpazy chhao, ama term chhôh liata ama taochheipa hluhpi a y aw, ama taophapa hluhpi a y aw.
- MADC kô 50 khô lâ he cha tao awpa hluhpi eima tao leipazy, atahmâ daihti tawhta apachâ pathi heih si la, tao awpa hluhpi eima tao leipazy tao â daih ha na tahpa ta eima chi nata pho pabohsana, hmahsiena nata laiseihna daihti liata he ADC biehneina hluh vei hra sala, bie eima hneina chhôhta lia he ta apha ngaitapa ta eima tao leipa hluhpi zy kha tao bâ si la, eima taopa hluhpi ado leipazy chhao kha bâsai si la tahpa he ei rei khoh ngaitapa a châ
- Hmahsiena nata râh chhihthana kyh liata ei papeimawhsa chaipa cha achuna – Education he a châ. Education he râh hmahsiena, mo pakha hmahsiena, khinah râh nata chi nata pho pabohsana kyh liata knowledge – pahnothaina – idea maniah pie tuhpa a châpa vâta Education phapa eima hnei leipa ta a châ khiah eima râ chhihthana kyh liata hnôh eimâ sy thlyu’na tahpa he ei palôh liata a y tyhpa a châ. Eima Education system he apha kawpa ta mohôh si la, eima vaw mohôh tyhna kyh liata â do leipa hluhpi y thei ta, atanoh Golden Jubilee alyna daihti liata ataopathi nawpa ta hmâh si la, future leader a châ awpazy cha eima tusaw nahzy ama châ awpa a châ. Atanoh he âmo châ nata eima râh châta pachâpa ta Education system apha kawpa ta tao si la, eima education system â dopa ta a châ khia cha, châ thaipazy vaw y (hluh via) aw pi ta, châthaina tawhta novâhna, pahnothaina nata râh chhihthana dâhzy vaw pahno thai laih aw.
- Eima chheihpâh râh Myanmar zy he râh dyhpha kawpa châ ei ta, Leadership â do lei vâta ama râh y zie za hnei thei vei. Singapore zy la ama leadership apha vâta ti do awpa zy ama hnei leina chô ta education vâta tilaipi ti zy do awpa ta tao laih ei ta, ama râh hmahsie ngaita. Chavâta hmialâ Mara chi nata pho kyh pachâpa ta eima Education system he apha kawpa ta taopathi si la tahpa he ei khoh ngaita.
- Achhâna liata ADC biehneina hnei pi ta, eima râh chhihthana awpa ta eima palôh eima pakawh awpa peimawh ta, Mahatma Gandhi zy, Nehru zy, Ambedkar zy kha Constitution Drafting ama taona liata India râh he chi hluhpi nata reih hluhpi yna a châ tahpa ama pahno vâta Constitution pha ngaitapa vaw tao ei ta, atanoh keimo zy chhao taihta aly kawpa ta eima hmâh tahpa pahno pi ta, âmozy hmotaopa mopa ta Marasawzy chhao pi ta, eima hmialâ daihti – future pachâ awpa apeimawh ngaita.
- Hmialâ daihti eima kaw tlô awpa pachâna chô ta eima Autonomy biehneina chhôhta liata apha ngaitapa ta eima siekhei awpa he apeimawh ngaitapa ta ei pahno.
- He biehneina he â do leina lâta hmâ leipa ta, palôh pha leipa nata palô siechheina lâ ta hmâ leipa ta, keimo mo pakha nata chhôhkha châ ngâlâh pachâ leipa ta ti nata râh nata chi nata pho châta hmahsiena nata laiseihna pachâpa ta eima ADC biehneina chyh ngaita kaw hra sa la, hluh vei hra sa la, lai vei hra sa la, a pha ngaitapa nata â do ngaitapa ta hmâh thai si la tahpa he atanoh liata ei rei khoh ngaitapa a châ.
Daihti chhâna lâ liata Puhpa K. Vanlalliana, Secretary to District Council, MADC ta Vote of Thanks reina a hnei khai tawhta MADC Golden Jubilee alyna programme he Bei Zisu thlahchhâna pachupa reiparaohpa ta pachhâsapa a châ
(Source: I & PO, MADC)