AIZAWL, 27 Chhiepa, 2022, Hriatuanoh – Atanoh dawh 12:00 Noon kha ta MADC nôpawpa Pu HC. Lalmalsawma Zasai, Dy. CEM nata Puhpa S. Lalremthanga, EM (PWD), MADZ zy ta Raj Bhavan liata Puhpa Dr. Hari Babu Kambhampati, Governor of Mizoram ahmôpa ta District Council rairuna nano nanopazy nata peimawhpazy ama tlôkhei.
Atanoh liata ama tlôkheipa peimawh viapa thokhazy ary liata palâsapa a châ:
- Indian Constitution ta District Council he Sixth Schedule ry liata paduapa châ pi ta, eima hlao zy, eima management zydua he keimo sasyh ta pachhuapanoh hra awpa châ ta, chahawh ta Bill taopa ta MADC Session liata pass tyhpa châ ta, chahawhpa Bill cha Governor assent hmô tlôh lei, MADC lâ Bill paphao paliepa y tlôh leipa ta Bill a yna su chhao eima pahno khao leipa y ha tyh ta. A eihpachaipa ta Sixth Schedule ta miah a pasaipa hawhta MDC Salary bill nata Staff salary bill, VC thiehpa tao awpa nata eima bill nano nanopazy he keimo sasy ta Session liata atao pi ta, eima pass byuhpa châ ta, cha cha Governor assent la awpa ta paphaopa a châ tyh. Cha bill cha azâhkô Budget Session liata eima passed hapa, atanoh taihta achhyna, MADC ta a hmôleizie na ta, Mizoram Gazzette liata chhao a pua hawh kaw tyhpa liata rairuna ama hneizie zy Governor hnoh he ta tlôkheipa châ ta, House bill he, khataih su lia hmahta pahawhpasâh theipa châ leipa ta, Competent Authority ta a assent nata assent lei liata â pahniehpa a châ.
- District Council chhihthatuhpazy, atanoh taihta Protocol List, Main Warrant liata pahlao leipa a châ hleikhô ta, Status â hnai pâtu hapa he Council zachhihna pahnaina châ ta, Governor hawhta hmahlakhei a peimawh tahpa zy,
- District Council, a eihpachaipa ta achuna (Education) lâ liata hmahsie nawpa ta Bank nata Company nano nanopazy tawhta CSR fund hmô thei nawpa ta tiama papuakhei awpazy,
- District Council liata Law & Judiciary tha patlô nawpa ta Separation Judiciary, a hmeiseihpa ta siekhei apeimawhzie nata Law Graduate, arâh leilô zawsy eima hnei hôlô bâ vâta Judiciary System he thatlô kawpa ta hmahla nawpazy ama rei khei.
Mizoram Governor chhao ta, District Council nôpawpazy bie tlôkheipa he apha kawpa ta vaw nahthlie ta, Sixth Schedule he sasyh biehneina ahneipa a châ vâta nama peimawhpa, house liata nama passed hapa momaih cha Governor assent awpa ta vaw paphao aw ei chi ta, Dâh ta a pasaipa rakha hawhta Governor ta a châ vaw pykhei ei khiatala Legislative, Executive nata Judiciary (three tier Govt.) nama châ vâta biehneina sâh kawpa hnei ta, Sixth Schedule ta biehneina a cha piepa ei he apha kawpa ta nama hmâ awpa cha khokhei ei na ta, Rai thiehpa lapa liata nama pachâna hmâh leipa u la, Development lâ liata zawpi châta thapi nama phia byuh ta, rairuna nama hneipa maih liata châ hmâpa ta navaw chho aw ei chi ta, ei theipa maih ei cha vaw bao lymâ aw ei tahpa ta aly kawpa ta amâ pakyh.
(Source: I & PO, MADC)