SIAHA, 15 Khihpa, 2022, Chutynoh – Atanoh dawh 1:00 PM pa ta Siaha College Vaih liata Village and Small Enterprises (VSE), Siaha ry liata paduapa International English Language Testing System (IELTS) Coaching Centre cha Puhpa JH. Beihnai, Sports & Youth Officer (S&YO), MADC ta a pahy.
Pahyna Programme he Satlia Franky Ngiachai Azyu, Principal, VSE ta chhihtha ta, Puhpa A. Thazi, Instructor, Sports & Youth Department, MADC ta pavaona a hnei khai tawhta khichhai laipa Puhpa JH. Beihnai, S&YO, MADC biereina hnei awpa ta hruapa châ ta, ary liata palâsapa he a bierei tlâhpi viapazy a châ:-
“Atanoh liata Principal nata a hrialâhpazy hleikhô ta VSE hneituhpa Puhpa Thatha Khaimeicho, Chairman, VSE hnohta alynabie reih na ta, Khichhai laipa châta apahawhpa Puhpa ST. Vanmalsawmliana, EM i/c Sports etc. rai peimawhpa a hnei vâta â vy thei vâta ano vyuhpa ta avypa châ na ta, eima EM zachhihpa vyuhpa ta pachâthaina ei châ haw ei.”
“VSE hmahlana he Sports & Youth Services Department ta eima theina hawhta eima deichhy lymâna hawhta a chhôh liata ahriapazy chhao ta tiama kawpa ta hria lymâ u la, eima theina hawhta eima cha mokhei lymâ aw.”
“IELTS liata Mongyuh reih avaw chupazy, Principal nata Pachutuh hropazy ta apha kawpa ta vaw pachu u la, hlaotlohna ama to cheingei thei nawpa ta tiama nama papua khei awpa ta ei châ haw ei.”
“VSE, Siaha siepahliepa ta he Mararâh thyutliazy byhnâ to cheingei awpa ta eimâ khokhei vâta Mistiri Training chhao Sports & Youth Services Department ta VSE siepahliepa ta ei 2 tlai eima vaw pachhuahpanoh hapa a châ hra. Chairman Thatha Khaimeichho nata a hrialâhpazy, ama hriapasana zydua vâta ama zydua hnoh ta, Sports & Youth Services Department, MADC ta alynabie eima reih.”
“Trainees zy, he Training namâ vaw hlao daidao tawhta cha hlaotloh cheingei tah, nietluana khi taihta, mo pakha, chhôhkha nata Mararâh châta phahnai cheingei awpa ta namâ chu awpa cha khokhei ei na ta, viapapa tly ma, tao awpa hnei lei vâta class vaw kia chakhyhpa tlyma châ leipa sa la, ‘he training tawhta ei dua papua cheingei hra awpa na a châ’ tahpa palôhru zydua ta achhuah awpa ta ei chakhokhei ei.”
“Cement Mistiri Training eima pie chiehpazy, Training ama patlô tawhta atanoh taihta apahâ leipa ta rai hria awpa hluhpi hnei ei ta, noh kha chhao rua khao vei ei tahpa eima vaw pahnopa cha, ei mâ ly ngaita. Thyutliapazy nietluana phapa ama hnei awpa he eimâ ly chaina nata Training zy eima pachhuahpanohna chhâ chaipa a châ.”
“Eima thyutliapazy duahmo pha khao leipa ta, he hawhta eima sie lymâ khiah chi hro pho hropazy ta eima râh liata ryu ama vaw reih thyuna aw tahpa eima palôh liata a y pathao. Mara thyutlia chapaw hluhpi miah thi sai ei ta, ahroh tlakaihpa, raihriana châh chhao pahno leipa ta a y chakhyhpazy he eima Mara laihsa nahzy ta avahpa tlâh ta hmô khao vei ei – âmo chhao ta lahpinô hnei awpa ta apachâ thei khao hra vei ei. Khazohpa bie hawhta nôvah ta atao tah, chi kaw papôh tah, Mararâh ti nata leilô phapazy kaw nie tah, kaw laiseih awpa he ama palôhru ta apha khao vei. He hawhta eima râh thyutlia duahmo a châ vâta kheihawhpa chhâ lia he ma Mara thyutlia zy eima pachha papua thei aw tahpa pachâna hneipa ta phusâ taka, sôh nata piah zy a y leina chô ta, eima hyutuhpazy lâ ta ku daopa ta he hawhpa Training programme zy pachhuahpanoh awpa ta eima hia papuapa laihpa a châ. Thokha pachâ liata cha he hawhpa sôh hluhpi pahryuhpa ta Training zy tao ngâ kaw hra si la, hlaotloh hmeiseihna y aw vei tahpazy a châ – anodeikua eima tao theina kao liata pakha pano chhâ – ama hro a rao awpazy, lâthlôh dopa liata amâ chhih theina awpa nata nietluana lâpi eima pahmô awpa zy he VSE liata nôpawzy, râh ryureihtuhpa nôpawzy nata Department zy maoh châ vei ma tahpa ta eimâ phana rakha liata hmah eima la laih ngâkawpa a châ. Tahmâno Marasaw duahmo he pha lei kaw ta, he hawhta eima kaw sie laih lymâ khiah, thokô châ mawh sala, ama ngie pahru hapa, â khophie ahroh chypa hawhta eima kaw châ pathlei aw tahpa chi â chhih hmeiseih.”
“Hlaotloh, pitloh cheingei awpa ta Student zydua khokheina cha hlâ ei na ta, VSE lâ liata nama rairuna pahno khei awpa ta Sports & Youth Services Department, MADC he ta eima theina hawhta eima cha deichhy lymâ aw.”
Puhpa JH. Beihnai, S&YO achakaochahlâ tuhpa Puhpa Beirôkhu Beitâ, I & PO, MADC chhao biereina hnei awpa ta hruapa châ ta, students hry liata Foreign lâ sie achhuahpazy hnoh ta pasyunabie reih ta, Japan liata a vaw y chiehpa a chânazy reihpa ta Experience ahneipazy a reih hleikhô ta, Student zydua ta hmo amâ chhuahpa focus tah, hmo hropa apabuasa lei awpata pasyu ta, Khazohpa ta khizaw liata tao awpa miah â hnawpazy pahno achhuah awpa peimawh ta; Khazohpa ta ano achhytuhpazy zyh awpa dâh miah apiepa â ronah bu “Khazohpa Biehrai Pathaihpa” (Holy Bible) he eima pahno thei nawpa ta reih hluh ta, avao awpa ta pasyuna ta, hlaotlohna miah pie thei tuhpa Khazohpa hmiah pasah awpa ta pasyu ta, student zydua, hlaotlohna khochhihpa to chyu awpa ta khokheina a hlâ.
IELTS Coaching Centre lia he ta students 31 châta seat y ta, he liata student zydua he Sports & Youth Services Department, MADC ta a sponsor khai. Atahmâ he seat full ha ta, târi 18.7.2022 tawhta Class pathao achhuahpa a châ. IELTS course he thla 3 châta a châ.
Sports & Youth Services Department, MADC he ta manôh 60 tlai sponsor pa ta, VSE Siaha siepahliepa ta Cement Mistiri Training ei 2 vaw pachhuahpanoh ha ta, atahmâtahpa chhao ta ei 3 a vaw sponsor nawpa a châ.
Daihti chhâna lâ liata Puhpa Thatha Khaimeichho, Chairman, VSE ta VSE ama vaw padua laihna thâtih nata IELTS taihta ama kaw padua theina thâtihzy reih ta, atanoh liata pahy thiehpa IELTS siepahliepa ta eima Mararâh thyutlia nahzy, English ama vaw thai thei nawpa hleikhô ta Foreign lâ taihta ama sie thei nawpa ta hmah la lymâ awpa ama khohzie reih ta, hlaotlohna to cheingei awpa ta student zy hnoh ta a pasyu. MADC liata nôpawpazy hnoh ta alynabie reih ta, a eihpachaipa ta Puhpa ST. Vanmalsawmliana, EM i/c Sports & Youth Services Department hnoh ta alynabie reih ta, ato liata VSE Siaha amokhei lymâ tuhpa nata atanoh liata a daihti sôh kawpa paruapa ta Pahyna avaw hmâ kheituhpa Puhpa JH. Beihnai, S&YO nata a hrialâhpazy hnoh ta alynabie a reih.
Puhpa JH. Beihnai, S&YO nata Puhpa Beirokhu Beita, I & PO zy ta hmosaipiepa – Mara pohsapa angia kawpa – avaw pie tuhpa Puhpa Thatha Khaimeichho, Chairman, VSE, Siaha nata a hrialâhpazy hnohta palôh hmeiseihpa ta alynabie ama reih.
(Source: I & PO, MADC)