SIAHA, 4 Hmypi, 2023, Pachynoh (MNN) – MTP Branch: New Colony-III zy ta ama Opi sana rai ama vaw hria hnôlô tyhpa cha atanoh he ta Puhpa Pakhaw Chozah, President, MTP General HQ. Siaha ta a ly ngaita kawpa ta hmâ lymâ thei awpa ta a pahy haw.
He Opi pahy khai tawhta alyna daihti hmâ pazaopa châ ta, Puhpa K. Dohmu, President, MTP Branch, New Colony-III ta he daihti he a chhihtha/siekhei. Revd. NC. Vabeilua ta Bible bie tawhta pasyuna bie pha ngaitapa reina hneihpa ta Abeipa lâta pavaosana thlahchhâna a hnei.
Syna Opi pahyna liata Puhpa Pakhaw Chozah, President, MTP Gen. Headquarters, Siaha bierei tlâhpipa zy:
“Marasawzy eima khihpi chaipa Siaha liana heta HIV/AIDS vâta a tlâhleipa 4,000 rahchhôh y ei ta, paritheipa/drugs eima papai vei khia, Marasaw eimâ pahlei rili aw.”
“Drugs/Paritheipa adyuhna liata MTP he eima peimawh chai. Achalih sai awpa chi châ mapi. Drugs papai awpa ta MTP Branches zydua hleikhôta, Awnanopa zy, MADC nata Police, Excise Deptt., zy chhao hriaparaohna phapa eima peimawh chyu. Nô nata Paw zydua chhao heta Drugs he adyuh hmeiseih sih la, Drugs eima papai thei aw.”
Achhâna liata, Zawpi a puapapakhypa zydua hnota Drugs a dyuh lymâ bâ awpa ta MTP Gen. HQ. President heta a hrua hra ei.
Syna Opi pahyna liata Town Branches tawhta Puhpa N. Beirasia nata Puhpa Goldie J. Lailyma, New Colony zy, Puhpa Mokhai Khithie, Council Vaih zy tawhta bie pha ngaita kawpa nahthliepa a châ.
Puhpa Lungmuana Hrahu, Board Chairman tawhta report nahthliepa châ ta, he Opi he New Colony -III Congress Mahila zy hmalana nata Puhpa CL. Ruala, MP a châ daihti liata MP Fund tawhta pathaopa vaw châ ta, daihti reipi tlai pazao leipa ta a vaw y.
He khô lâta, New Colony-III MTP Branch ta, Board zy paduapa ta Opi he sa pazaopa châ heih ta, mopakha zy tawhta phusâ tâkâ zy chhao thyu pakhypa ta, SYNA OPI he Board nata MTP Branch, Colony-III zy ta ama theina zydua papuapa ta ama vaw sa pazao hnôlô lymâ pa a châ.
Puhpa K. Dohmu, President nata a hrialâhpa manôh zachhihpazy ama hriapasa zie â vaw lâ ngaita kaw.
Puhpa Dr. K. Beichhua, MLA zachhih kawpa tawhta MLA fund ₹ 6,50,000/- hryuhpa ta he Syna Opi he sa patlôpa a châ. MLA zachhihpa Puhpa Dr. K. Beichhua chô liata New Colony-III, MTP Branch zy ta amâ ly ngaita kaw.
Syna Opi he 35 sq. ft. area rachhôh ta a kawhpa a châ.
Laihsa HC. Florence nata NT. Vabeido zy ta pyungia ngaita kawpa; Mara hla sikuapa ta, zawpi ama palypa-ua sa hra. Daihti thapha kawpa ta a hmâpa a châ.
Achhai tlâhpa Opi pha kawpa nata hmâh tlâhpa châ lymâ awpa nata, Marapa zy châ ta Syna Opi heta byhnâ châ ri mawh sy, tahpa he eimâ hnabeiseihna a sâh chaipa nata khokheina chhao a châ.