SIAHA, 27 Khihpa, 2023, Pobienoh – Atanoh kha Puhpa T. Seido, Hon’ble EM i/c Sports & Youth Services, MADC, Puhpa JH. Beihnai, S&YO, MADC nata ama hrialâhpa staff thokhazy ta Vocational School of Education, College Vaih liata amâ chuna su ama tly.
He daihti liata Puhpa Thatha Khaimeichho, Principal, Vocational School of Education nata a hrialâhpazy ta programme pha kawpa vaw pachhuahpanohpa ei ta, achuhaipazy nahta apakyhna daihti pha kawpa chhao ama hnei thei hra.
Puhpa T. Seido, EM zachhihpa chata achuhaipazy hnoh ta biereina chyupa daihti hmâh ta, “Atanoh liata nâmozy hawhta vâhnei patluapa he chyhsa to châ leipa ei ta, he liata Youth Skill programme ta thyutliapazy châta achuna a patohpatiapa liata achuna pha kawpa nama to theipa he nama vâhnei tah na ta, a pha kawpa ta namâ chupa patlô chyu awpa ta cha khokhei ei na ta, atiamapazy châta rai he sôh leipa ta, athatipazy ta rai hria awpa ama pahno lei no ta nâmo deikua chata hmialâ daihti lia chhao ta nâmo nata nama chhôhkhazy châta nietluana tlâh hriapapua khai awpa chhao ta tiama kawpa ta achu lymâ awpa ta ei cha pasyu ei” tahpa ta khokheina nata pasyuna pha kawpa a reih.
Puhpa JH. Beihnai, S&YO chhao ta “atahmâ chhâ tawhta cha châ achupa ngâlâh châ khao leipa ta ku zôzâh thaina tawhta nie tluana hluh kaw bâ ta, namâ chu khai tawh chhao ta nâmo châ nata nama chhôhkha châta phahnai kaw awpa ta hria chyu awpa ta ei cha khokhei ei” tahpa ta pasyuna bie a reih hra.
Source: I & PO, MADC