SIAHA, 29 Khihpa, 2023, Pachynoh – Atanoh dawh 12:30 Pm kha ta Siaha District Football Association (SDFA) Tlyliah, Siaha liata SDFA Cup 2023 Closing Ceremony ahmâpa châ ta, he liata Puhpa T. Seido, Hon’ble EM i/c Sports & Youth Services, MADC cha khichhai laipa châta hruapa a châna hawhta a khawna daihti a hmâkhei ei.
Puhpa TT. Vabeichhuakhu, Sr. Vice President, SDFA ta programme chhihtha ta, Puhpa KT. Hnaikha, Vice President, SDFA devotion a hmâh.
Asrtites Laihsa FC. Suna Chanô nata Laihsa Rovina Khaimeichho zy ta hlasapa ta zawpi palôhpahawh ei ta, laihsa T. Cassidy, Treasurer, SDFA & MC ta tournament pachhuapanohpa kyh âkichochâ kawpa ta report a pie. Daihti chhâna liata Puhpa Martin V. Beiralai, Finance Secretary, SDFA ta alynabie reina daihti a hmâh hra.
Atanoh liata Chief Guest Puhpa T. Seido, Hon’ble EM bierei tlâhpi viapazy:-
“Atanoh ta SDFA ta tournament a pachhuahpanohpa he a ly â chhih ngâsâ. Kô hro nahta â lyu leina cha Senior (veteran) nahzy châta ano eihta tlai ta nama pachhuah panohpa he châ ta; kô hro a vaw sie chiehpa liata a y beih leipa achâpa vâta a ly â chhih ngâsâ.”
“Kô khachâ rakha ma a sie hapa tawhta eima râh liata Drugs ta miah a ngiahnao ta, thyutlia hluhpi hrona eima pahlei haw. Eima râh thyutliapa, pari theipa iahzai hapazy pachhapapuana chhaichhi pha kawpa cha Sports he a châ; atanoh liata SDFA Cup 2023 football tournament he ta thyutlia hluhpi a phahnaikhei cheingei nahta ei hnabeiseih.”
“Siaha he Mizoram liata district uhthei chaipa sâ 3-na châ ta, chavâta kao to liata ahnai viapa nata hnôhkhaw viapa hawhta eimâ pachâ awpa châ vei. Daihti asie chiehpa liata moh phana chhao vâro eima vaw la haw hrapa a châ. Ama daihti liata cha Zodingtluanga, Marasaw he Bhaichung Bhutia hlata Football a thai via. He he ta Marasaw he ahnai ma pi tahpa a palâsa kaw. Chavâta eima thyutlia nahzy, nama theina kao chyu liata tiama papua lymâ awpa ta ei cha pasyu ei.”
“Atanoh liata eima thyutlia nahzy chhao ei chi, hmeiseihna chô ta namâ khaih khia nie tluana taih nama tlô thei tahpa pahno u la, tournament a chhâ tawh chhao ta diathlâ lei awpa ta ei châ haw ei” tahpa khokheina nata pasyuna bie pha kawpa reih ta, final akhaih awpazy cha apathaih kawpa nata mo ngia kawpa ta akhaih chyu awpa ta khokheina a hlâ ei.
Atakô SDFA Cup Football Tournament 2023 Final he Meisavaih FC nata FC College Vaih zy ta akhaih ei ta, 2-1 ta Meisavaih FC ama tlô. Veteran liata Meisatlâh FC nata Council Vaih FC zy ta Final akhaih ei ta, Meisatlâh FC zy ta 1-0 ta ama tlô hra.
Source: I & PO, MADC