SIAHA, 30 Thlazoh, 2023, Pakhynoh (MNN) – Atanoh he ta Siaha liata a sâ 2 nawpa Immanuel Filling Station, Meisavaih West liatahpa cha Rev. N. Beihrokhai, ECM Meisavaih Biatuh Pastor ta zawpi hmâ thei awpa ta a pahy haw.
He daihti he Puhpa Lalmaka Tluangnel ta chhihtha ta, Pump hneituhpa Pihnô Hani Syhly, New Colony, Siaha ta Pump bô thei awpa ta hmahlana ama vaw siekheina dâhzy report pie ta, rairu kawna chô ta pahy thei awpa a châpa vâta â lyzie a reih.
Puhpa R. Lalnghakliana, Asst. Controller, Legal Metrology, Siaha nata Puhpa HC. Lalthanzuala, DCSO, Siaha zy ta Pump thiehpa pahypa a châpa aly âchhih ama tahzie reih ei ta, dâh nata phôh deikua apha kawpa ta zyh lymâ awpa ta amâ haw hra.
He Pump he NH54, Don Bosco School mathi tawhta Meisatlâh pangaina lâpi chachâh lâ liata ypa châ ta, my dawh 6:00 Am tawhta zâlâ dawh 6:00 Pm chhôhta pahypa a châ aw.
Hetana he ta Siaha District liata Filling Station sâ 3 (Siaha lia sâ 2, Tipa lia sâ 1) eima hnei ha bâ.
(Admin, MNN. Source: M. Baithai, Editor, Chhim Aw)