SIAHA, 1 Thlarâh, 2023, Chutynoh – Atanoh kha Mizoram liata Autonomous District Council (ADC) sâthôh – Mara Autonomous District Council (MADC), Lai Autonomous District Council (LADC) nata Chakma Autonomous District Council (CADC) liata Chief Executive Member (CEM) zy ta Mizoram Chief Minister (CM) Puhpa Zoramthanga amâ pakyh tahpa Puhpa Beirôkhu Beitâ, I & PO, MADC tawhta biedaopa a châ.
(Photo courtesy: I & P Deptt. MADC, Siaha)
He apakyhna daihti liata MADC vyuhpa ta Puhpa M. Laikaw ahlao ta, LADC tawhta Puhpa V. Zirsanga, CADC tawhta Puhpa Rashik Mohan Chakma zy amâ hlao.
Mizoram liata Autonomous District Council zy ta rairuna nano nanopa amâ tyhpazy Chief Minister hnoh ta tlôkheipa a châ.
Autonomous District Council sâthôhzy ta Salary Bill House liata ama passed pa cha, achatliena lâta hmâ theipa a châ thei nawpa ta hmahla khei awpa ta amâ haw. CM zachhihpa he ta DC & MA Department tawhta file â khy pataw nahta approval a vaw pie aw tahpa ta â chhy ei.
Order of precedence chôchâh chhao reikheipa châ ta. Mizoram Sawhkhâ ta ADC sâthôhzy châta, order of precedence a vaw tao ha tarawpa ta, entitlement deikua GAD tawhta taopa a châleipa vâta order rie tao awpa ta ahaw ei ta, Chief Minister ta order a vaw tao awpazie ta â chhy hra ei.
Chief Minister Puhpa Zoramthanga ta Autonomous District Council vyuhpa ta CEM zy cha râh chakaona kyh liata lôraoh kawpa ta siekhoh awpa ta a haw ei ta, ADC zy ta rairuna amâ tyhpa mai pathlâkhei awpa â mâzie zy chhao reih ta, he hawhpa apakyhpasiana zy he hnei lymâ awpa a pha a tah zie a reih.
Puhpa M. Laikaw, CEM, MADC he, a tour programme liata cha mylâ târi 2.8.2023 he ta Aizawl tawhta â kaw lie noh a châ taraw no ta Council hmo byuhpa nano nanopazy pathlâ awpa ta Official zy ahmô via awpa a hneipa vâ ta, Aizawl liata a vaw châh via chy aw. He daihti chhôh liata Governor chhao â hmô pâ awpa a châ.