SIAHA, 5 Thlarâh, 2023, Hriaheinoh – Atanoh my dawh 10:00 Am kha ta Siaha Vaihpi Comprehensive School zy ta Teacher’s Day 2023 nata Inauguration of Platinum Jubilee Year programme pachhuapanoh ei ta, he liata Puhpa MH. Tiabi, Hon’ble EM i/c School Education (Middle School) cha khichhai laipa châta hruapa châ ta, noh y ta programme a hmâkhei ei.
Programme he Puhpa Zokhai Khuhly, Teacher ta chhihtha ta, Rev. K. Laichhua Azyu, Moderator Elect, ECM Assembly ta devotion a hmâh. Chanô hawtipa Biak Tha Hoi, Class-VIII student ta English ta Welcome Speech reih ta, Class-I & II student-zy ta “Khazia ei reih ei pahlei aw” tahpa Mara phohla sapa ta Opening Song ama sa.
Puhpa C. Ruben nata Pihnô Alfina LC. Ngopawsia zy ta mo pakha hlasapa ta zawpi ama palôpahawh. Chief Guest ta Siaha Vaihpi Comprehensive School Platinum Jubilee milestone (lôbô) pahy ta, biereina daihti a hmâh pazi.
Puhpa MH. Tiabi, Chief Guest chata biereina chyupa daihti a hmâpa liata, “Siaha Vaihpi Comprehensive School zy ta kô 75-na (Platinum Jubilee) nama vaw tlô thei pa cha a rônah tah na ta, ei châlykhei hmeiseih ei. He school a vaw pathaopatôtuhpa pachutuh hmiatuapazy – Puhpa S. Mokia, Puhpa A. Phodia, Puhpa Z. Tumluaia, Puhpa C. Tailuaia, Puhpa Lianzama zy zana Samaw hlâ ei na ta, âmo zy zawhzi nata Teacher a hriapazi lymâpazy reiraohna nata hriapasana zawhzi ta he school he School pha chaipa ta a tlypa zy vaw châ ha ta, chahleikhô ta he school tawhta kao nano nanopa liata hlaotlohna avaw to hapa hluhpi ama y haw hra tahpa pahno na ta, aly â chhih ei tah hmeiseih” tahpa a reih.
Chief Guest chata, “Hmialâ daihti liata eima râh duahmo achhie nata apha awpa cha atahmâno ta studentzy ku liata apahnieh ta, cha studentzy chyhsa phapa nata hmâtlâh a châpa a kaw papua thei tuhpa cha Teacherzy nama châ; studentzy ta pachuna ama dao cheingei thei nawpa ta sawhkhâ nôpawpazy ta nâmo Teacherzy siepahliepa ta pachuna eima pie, chavâta Teacher nahzy maophaohna he â sâh hmeiseihpa a châ.”
“He hawhta thaina sona miah pachutuhpa nama châ hleikhô ta eima hrozie aphapa nata pitlohpa a châ thei nawpa ta miah pachutuhpa nata miah achhituhpa nama châ vâta atanoh Teachers’ Day noh liata Teacher nah zydua, châ naoh ei na ta, zana ei cha hlâ hmeiseih ei.”
“Studentzy chhao ta nama pachutuhpazy rei namâ ngiah kaw awpa a châ. Tiamana leipa ta hlaotlohna y thai vei tahpa pahno u la, namâ chuna liata tiama kaw myh vy” tahpa ta pasyuna bie pha kawpa reih ta, Siaha Vaihpi Comprehensive School he hmahsie lymâ mawh sy tahpa ta khokheina bie a hlâ ei.
Guest of Honour Puhpa KT. Sema, Dy. DPC nata Puhpa TA. James Riatha, biatuhpa MDC zy chhao biereina chyupa hneipa ta pasyuna bie pha kawpa reih ei ta, Pihnô K. Zoki, Headmistress ta School thâtih report a pie. Puhpa L. Vanlalliana, Teacher ta Presentation of Mementoes & Special Gifts daihti hmâh ta, he khai tawhta pachutuhpazy palyupalihna châta siku hawtizy ta ama teacher nahzy pawpi hlâna daihti ama hmâh hra. First Session daihti khaw nawpa ta Puhpa Thasia T. Azyu, prominent citizen ta thlahchhâna a hnei.
Second session liata Puhpa AZ. Beichhuahmo nata Pihnô B. Roseline zy ta host-pa ta programme ama chhihtha. Second session lia he te Entertainment lâchhâh ahmâpa châ ta, student zy ta lâpa nata special item nano nanopa pamosa ei ta, teacher nahzy chhao student-zy palysa nawpa ta special iterm ama pamosa hra.
Ary liata palâsapazy he, atakô liata he School chhôh tawhta Award hlâpa ama châ:-
Best Student – Chanô hawtipa Biak Tha Hoi, Class-VIII
Best Teacher (MS) – Puhpa L. Vanlalliana
Best Teacher (PS) – Puhpa N. Beichhualy
Daihti chhâna liata Pihnô Siavaw Thlana, Senior Teacher ta vote of thanks reih ta, Chairman ta a raopa Puhpa MH. Tiabi, EM zachhihpa ta thlahchhâna ta programme he pachhâsapa châ ta, he khai tawhta Platinum Jubilee kyhchhi amâ chhuanohpa ta aly kawpa ta dôh chyupa a châ.
Siaha Vaihpi Comprehensive School he kô 1948 liata paduapa châ ta, moh nano nanopa bipa ta vaw y laih ta, Saikao liata Missionary nahzy ta School ama paduapa rei leipa ta cha Mararâh liata school avaw duah tua chaipa a châ.
Puhpa MH. Tiabi, Hon’ble EM he Puhpa Beirokhu Beita, I & PO, Puhpa Israel R. Chozah, CEO, Puhpa Jeffrey Khara, Editor (Moonlight), nata Puhpa K. Nehemiah, Cameraman zy ta ama chakaochahlâ.
PRESS RELEASE
NO.123/2023
ISSUED BY:
Information & Publicity Department
Mara Autonomous District Council
Siaha.