SIAHA, 12 Thlarâh, 2023, Hriaheinoh – Atanoh dawh 11:00 Am kha ta MADC Local Administration Department (LAD) ta Siaha RD Block ôna liata VC zy châta ama pachhuapanohpa Capacity Building Training, E & F Conference Hall, MADC Complex liata hneipa liata Puhpa K. Chhuabei, Hon’ble EM i/c LAD cha khichhai laipa châpa ta 1st session programme a hmâkhei ei.
Pihnô S. Lalmuanpuii, Sr. LAO ta welcome speech reih ta, Puhpa Joshua Chozah, Under Secretary, LAD ta devotion a hmâh. Puhpa Henry PL. Hnaily, SO ta Dustbin hmâ dâh reipasiana hnei ta, Puhpa John Beizachhi Phuto ta mo pakha hlasana a hnei.
Programme he chhaih 2 lâ ta pachhaihpa châ ta, chhaih 1-na liata Training pahyna nata Dustbin rai awpa pahyna hneipa châ ta, chhaih 2-na liata Puhpa F. Lalremchhunga, DPM, Siaha nata Pihnô Heizi Solo, TA, Siaha zy hmâpa ta (1) Geo-tagging of works under 15th Finance Commission during 2021-2023, nata (2) Preparation of GPDP plans during 2023-2024 Training hneipa a châ.
Puhpa K. Chhuabei, EM zachhihpa chata biereina ahneipa liata atanoh liata daihti phapa a pietuhpa Khazohpa hnoh ta alynabie reih ta, VC zy châta hmo peimawh kawpa Training apachhuapanohtuhpa MADC LAD ry liata officers and staff zy hnoh ta alynabie reih ta, programme hlaotloh thei nawpa ta avaw hlaotuhpa VCP nata VC Secretary zy hnoh ta anaohna hlâ ta, alynabie a reih.
“Ryureina nata biehneina cha Khazohpa eih a châ; chavâta khitlâh ryureituh awpa ta atlypatlohpa VC nôpawpazy ta Khazohpa khozie ta ryu nama reih awpa a châ; Khitlâh Ryureina dyuchhai liata miah patyutuhpa cha Khazohpa a châ vâta VC zy ta Khazohpa khozie hawhta rai eima hria ma hria vei ma tahpa eimâ mohpakia tyh awpa apeimawh kaw.”
“VC nahzy ta cha 15th Finance Commission ry liata nama rai hria awpa anoeih tlai ta State sawhkhâ siepahliepa ta piepa châ ei chi ta, he he sôh a y ha chiehpa châ ta, he tawhta scheme zy tao tah, nama hmâ phahnai vei khiata cha khitlâh hmahsiena hluhpi a y thei awpa cha y thei aw vei tah na a châ; VC maophaohna a sâh kaw ta, tiama papua lymâ awpa apeimawh. Work proposal taona daihti liata ataopathohpa a y lei nawpa ta VC zy ta biatuhpa MDC zy nahta asaohiah veichâh raihrie awpa he apeimawh kawpa a châ.”
“VC liata nama hria chhôh ta khâpa ma khitlâh châta tao hra aw na ta, ei vaw châ khao lei ti ta lôbô ei tao thei hra aw tahpa palôh phaoh si la, rai phapa hria achhuah chyu suh u” tahpa a reih.
Puhpa K. Chhuabei, EM chata sawhkhâ ry liata Housing for all nata insurance schemes zy a peimawhna reih ta, VC zy ta zôpha kawpa ta ama area chyu liata siekhei awpa ta â haw. Chahleikhô ta MADC ta hmah lana nano nanopa a hnei ngâhaipa liata ama theina hawhta VC zy nahta Mararâh châta rai phapa hria awpa amâ chhuah tahpa reih ta, eima vaih chyu pathaihna kyh liata hmah la tah, sweeper zy ama y leina su liata a vaih hneituhpazy ta eima vai chyu kyhpachâ tah, pathai tyh awpa ta zawpi lâ ahawna tao awpa ta VC zy pasyu ta, zawpi ta ama complaint tyhpa VC raihria pha leipa châ leipa ta ngâchhihna nata tiamana chhao ta ama VC area chyu liata rai phapa hria achhuah chyu awpa ta khokheina nata pasyunabie pha kawpa a reih.
EM zachhihpa chata biereina a hnei khai tawhta VC zy ta ama vaih chyu liata ama rai awpa apuapa thyna byh (Dustbin) chi 3-zy cha palâhâhna a hnei pâ hra.
(Source: MADC I & P Deptt. PRESS RELEASE NO.131/2023)