SIAHA, 18 Di, 2023, Hriatuanoh – Lunglei liata Mara Tribal Girls’ Hostel sa patlô hapa cha Mizoram sawhkhâ vyuhpa ta Puhpa KT. Beicho, IRAS, Principal Secretary i/c Social Welfare Department ta atamy dawh 11:00 Am kha ta MADC vyuhpa ta adaotuhpa Puhpa K. Chhihrau, Executive Secretary ku liata hlâna a hnei haw.
Hlâna programme he MADC Executive Secretary official chamber liata hneipa châ ta, Puhpa K. Chhihrau, Executive Secretary ta chhihtha ta, Machâ K. Vanlalmawia, Local Secretary, Lunglei Mara Church ta pavaosana thlahchhâna a hnei.
Puhpa KT. Beicho, IRAS, Principal Secretary ta biereina chyupa daihti a hmâpa liata project hluhpi eima tao thei no ta râh he peimawh chai tyh ta, he hawhta Marasawzy ta Lunglei liata râh eima peimawh kaw no ta Lunglei Mara Church nôpawpazy ta amâ Achhyna O râchhôh (compound) liata Mara Tribal Girls’ Hostel châta râh ama vaw donate theipa he arônah tah na ta, ama chô liata alynabie ei reih tah ta, MLA election hlâta liata ahlâ nawpa document peimawhpa pasia hapa châ tarawpa ta election vâta ahlâ thei khao lei pi ta, atanoh liata eimâ hlâpa a châ tahpa a reih. Puhpa KT. Beicho chata hmialâ daihti liata cha Marasawzy ta Thohna apamosapa nata hmo hrohriapa peimawhpa vâta Aizawl eima pangai tyhpa châ, lâhnia viapa tahpa ta Lunglei he eima pangai lymâna daihti a y aw – cha daihti liata he hostel he a phahnai kaw awpa a châ tahpa reih ta, Marasawzy ta Lunglei liata ryutlohpa eima hnei vâta â lyzie a reih.
Puhpa K. Chhihrau, Executive Secretary chhao ta biehmiachhihpa a reina liata Lunglei liata Mara Tribal Girls Hostel eima hnei thei nawpa ta hmalatuhpa Lunglei Mara Church nôpawpazy, Dr. K. Beichhua, MLA nata KT. Beicho, IRAS, Principal Secretary i/c Social Welfare zy hnoh ta MADC nata Mara zawpi vyuhpa ta alynabie a reih.
Lunglei liata Mara Tribal Girls’ Hostel he Pihnô Renuka Singh Saruta, Union Minister of State for Tribal Affairs ta 27.2.2023 kha ta a pahy hapa châ ta, hmoto pasiapanô khaipa a châ tawhta atanoh liata MADC ku liata hlâpa a châ.
He ahlâna lia he ta MADC officials thokha ahlao ei ta, Lunglei Mara Church tawhta Machâ K. Vanlalmawia, Local Secretary â hlao thei hra.
PRESS RELEASE NO.149/2023, ISSUED BY:
Information & Publicity Department
Mara Autonomous District Council
Siaha.