SIAHA, 12 Nawh, 2024, Chutynoh – Atanoh my dawh 11:00 Am pa ta Local Administration Department, MADC ta Siaha Town chhôh liata Village Council zy liata VCP zy CEM’s Conference Hall, MADC Complex liata awpakhypa ta 15th Finance Commission tawhta sôh akhypazy hmâ nawpa dâh reipahmaohna nata apachuna hleikhô ta hmâ chiehpazy reipahmaoh awpa ta meeting hneipa a châ.
Meeting he Puhpa K. Chhuabei, Hon’ble EM i/c LAD etc. MADC ta chhihthana ry liata hneipa châta, Puhpa Joshua Chozah, US, LAD ta pavaosana thlahchhâna a hnei. Official tawhta Pihnô S. Lalmuanpuii, Sr. LAO nata a hrialâhpazy ta amâ hlao hra.
He daihti liata VC to ta pathaihna kyh liata hmahlana dâh zy, i (dog) papua lei awpa ta sawhkhâ bie a ypa kyh liata vaichhôh amâ mohôhna dâh zy, O asapazy ta lâthlôh pabua leipa ta O chhaichhi amâ paso thei nawpa dâh zy nata apuapa thyna kyh liata vaichhôh ahnykhaw leipa ta apathaih kawpa ta kohkipa a châ thei nawpa ta hmahla lymâ awpa a byuhna kyhzy cha VC nahzy tawhta reina nata nahthliena hneipa châ ta, officials lâ tawhta abyuhna liata achhyna nata chhopasiana hneipa a châ hra.
Puhpa K. Chhuabei, Hon’ble EM chata Siaha town chhôh liata VC nahzy hnoh ta pasyuna biezy reih ta, pathaihna vâta chyhsa hnatlâna vaw pha via laih ta, eima hro chhao a pahsi via lymâ ha bâ tah ta, VC nahzy cha ama vaih chyu liata pathaihna kyh liata ama hriapasanazy liata alynabie reih ta, he hlâta thapi viapa ta hmahla via lymâ awpa a peimawh tah ta, he kyh liata khitlâh liata NGOs nata Awnanopazy hriaparaoh awpa a peimawh tahpa a reih. VC nahzy cha ama vaih chyu mohôhna kyh liata maophaohna lai kawpa ama hnei tah ta, vaihto liata Sanitation Board padua awpa ta sawhkhâ bie a ypa hawhta apadua hmâ mâh leipazy chhao padua para tah, vaihto liata pathaihna kyh liata hmahla lymâ awpa ta ahawna a tao.
Puhpa K. Chhuabei chata atanoh liata VC nah avy theipa zydua hnoh ta alynabie reih ta, 2024 kôthieh anaohna nata khokheina a hlâ chyu ei.
He meeting liata vaihto liata i (dog) ypazy cha Nawh (January) 2024 chhôh liata registration tao khai tah, LAD liata list pangia khai awpa ta VC nahzy hnoh ta pahnosapa ama châ.
Meeting he Zisu Krista thlahchhâ pachupa reiparaohpa ta pachhâsapa a châ.
PRESS RELEASE
NO.4/2024, ISSUED BY:
Information & Publicity Department
Mara Autonomous District Council
Siaha.