SIAHA, 8 Pamih, 2024, Chutynoh – Atanoh my dawh 10:30 AM pa ta Siaha Tlyliah liata pathaopa ta Marasawzy ta Cha-ypi eima hneipa LYUVA KHUTLA cha arônah kawpa ta ahmâpa a châ.
Laihsa Ornella Khithie nata Puhpa HC. Vahmo zy ta pahnie kawpa ta Programme he siekhei ei ta, Council Vaih MTP Branch zy ta pahyna hla ama sa.
Atakô Lyuva Khutla liata Azipa châta Puhpa Elaisa Vahnie, Executive Director, Burmese American Community
Institute (BACI), Indianapolis State, United States hruapa châ ta, Guest Artiste Laihsa Fiefie Mara, Actress & Artiste, Myanmar hruapa châ ta, ama pano ta amâ vaw hlao thei raihrie.
Session sâ 2 lâta pachhaihpa liata 1st session liata Rev. K. Laichhua Azyu, Moderator, ECM Assembly ta daihti ziehpa hmâh ta, Puhpa K. Vanlalliana, Chairman, Lyuva Khutla Organising Board ta alypangiana hnei ta, Azipa ta Chaypi poh raina nata biereina hnei ta, Laihsa Shebby BP. Hlychho ta hlasana a hnei. Puhpa Lalhmunsanga Hnamte,
DC, Siaha chhao bierei pachhohpa daihti a hmâh. 2nd session liata Puhpa M. Laikaw, Hon’ble CEM ta biereina hnei ta, MTP Gen. HQ, Sabyh tawhta Puhpa Beili Chozah, Sr. Vice President ta Greeting reina a hnei. 2nd Session liana he ta MTP Siaha Town branch zy tawhta Cultural item nano nanopa palâsapa châ ta, MCHP Siaha town zy ta Custom Parade ama palâsa hra.
Puhpa Elaisa Vahnie, azipa ta bie a reipa liata Chief Guest châta hruapa a châ vâta alynabie reih ta, Marapazy pi he anoeihta râh ahneipa eima châ tahpaz y, reih tlohpa – Written form of literature – ahneipa eima châ tahpa zy, chin-kuki-zo chipho liata reihchâ ahnei liata hmiah asahpa eima châ tah ta, chipho reihchâ pabohsa lymâna liata Thyutliazy maophaohna eima hnei tahpa a reih.
Ano a yna USA lia chhao kô 2017 tawhta Lyuva Khutla eimâ hmâh pathao haw tah ta, Lyuva Khutla he Mararâh khito liata ahmâ awpa ta Khokheina nata Ahawna a tao hra.
Puhpa Elaisa chata Marasawzy nata Mararâh hmahsie nawpa châta hmiasai (vision) pha kawpa eima hnei a byuh tah ta, cha liata râh achhihthana politics phapa hnei awpa zy, sôhpaliena phapa nata achuna liata thaina sona tlua awpa a peimawh tahpa a reih.
Chahleikhô ta Notla Marasawzy ta Nochhi Marasawzy, râh buana vâta azâ râpazy mohôh phana kyh liata alynabie reih ta, Lyuva Khutla Chaypi zawhzi ta East nata West Maraland ataozaona hleidy eima dao pathao lymâ tahpa reih ta, Marasawzy Global partnership phapa chhao a y lymâ awpa vâta âlyzie reih ta, atanoh Siaha Tlyliah liata Lyuva Khutla 2024 a vaw hmâhpazy nata Online ta a vaw hlaopa zydua hnoh ta khokheina bie a reih.
Puhpa M. Laikaw, Hon’ble CEM, MADC ta biereina a hneipa liata zawpi hnoh ta Lyuva Khutla 2024 anaohna bie reih ta. Lyuva Khutla he Siaha lia dei châ leipa ta Aizawl nata Tipa lia chhao ahmâ tyhpa a châ tah ta, kô 2017 tawhta USA liata Marasaw a ypazy ta ama hmâh pathaotahpa a reih.
Marapasawzy pi ta Krizyhpa eima vaw châ hlâ via cha Chaypi he avaw hmâh tyh pi ta, Krizyhpa eima vaw châ tawhta Mara Chaypizy cha eima Krizyna nata â hmie leipa ta pahnopa a châ vâta vâro achalihsai pi ta, a tlia via tawhta Lyuva Khutla he vaw hmâh pathao heih pi ta, aly’pa a châ kaw. Eima mahnô mahpaw chei-o nata taoziezy he sawtliapazy ta eima pabohsa lymâ awpa a châ taha reih ta, Drugs nata Paritheipa zy tawhta eima râh a vaw free thei nawpa ta tiama papua chyu awpa ta ahawna tao ta, atakô Lyuva Khutla he alypa nata palôtlâh kawpa ta hmâ awpa ta zawpi avypazy khokheina a hlâ.
Atakô 2024 Lyuva Khutla ahmâna liata Saliah Beipaw nata Saliah Beinô hleikhô ta Chhivaw nata Khydi atlyna hnei pâ heihpa a châ.
Saliah Beipaw nata Saliah Beinô atlypazy:-
Saliah Beipaw – M. Paul, S/o Beihmotaothei, Meisavaih
1st Runner up – PB. Junior Hlychho, S/o Reuben Hlychho, Siahatlâh
2nd Runner up – Upner Thaisa, S/o Steven Thaisa, College Vaih
Saliah Beinô – Asenath Khithie, D/o K. Malsawma, College Vaih
1st Runner up – Abigail Nongia, D/o S. Beihrokhu, Siaha Vaihpi
2nd Runner up – Sarah Beidaorili, D/o Calvin Beiphasa, Meisavaih West
Chhivaw nata Khydi atlypazy:-
Chhivaw – Lizy Azyu, MTP Siahatlâh Branch
Khydi – William Khuhly, MTP ECM Vaih Branch
Best Costume:
Chapaw – A. Sunday, MTP Siaha Branch
Chanô – TT. Jacquiline, MTP ECM Vaih
Atanoh liata Live ta hlasapa ta zawpi a palysapazy:-
- Young Stoney (Rap Icon 2023)
- A. Chhualai
- Rovina Khaimeichhô
- Jessica Ngôdy Hlychho
- Clara K. Melita
- J. Ruby
- T. Merisa
- FC. Nipari
- Jeremy BD Hlychho
- Alfina LC. Ngopawsia
- Mezzoford
- Suzerain
Daihti chhâna liata Puhpa Phiki Solo, Secretary, Lyuva Khutla Organising Board alynabie reina hnei ta, Puhpa K. Vanlalliana, Chairman, Lyuva Khutla Organising Board ta Cha-ypi poh lona a hnei khai tawhta atakô Chaypi he apalâ kawpa ta pachhâsapa a châ.
PRESS RELEASE NO.30/2024, ISSUED BY:
Information & Publicity Department
Mara Autonomous District Council
Siaha.