CHHAOLO, 11 Pachawh, 2024, Pobienoh – Atanoh my dawh 10:30 AM kha ta Mara Students’ Organisation (MSO) General (Gen.) Conference 2024 noh 1-na cha S. HIATO BYUREIH, Chhaolo tlyliah su liata ahmâ pathaopa châ ta, Chhaih 1-na, myrâh ahmâpa liata Puhpa K. Vanlalliana, Executive Secretary (ES), Mara Autonomous District Council (MADC) cha khichhai laipa châta hruapa a châna hawhta programme â hlaokhei.
Khichhailaipa Puhpa K. Vanlalliana chata biereina daihti a hmâna liata ary liata atlâhpipa palâsapa hawhta pasyuna bie a reih:-
“Mara Students’ Organisation (MSO) he eima chi nata pho, Culture nata Tradition pabohsana nata hmah pasiesana liata thata hmah vaw la tyh ei chi ta, chadei châ leipa ta eima râh chhôh liata nata eima râh khôtho Marasaw yna maih liata social work Marapa sawzy châta thata nama hria tyh. Chavâta, MSO raihriapa he a rônah kaw.”
“Achuna kyh lia chhochhi ta cha nama contribution he â sâh ngâita. Nâmo hmahlana vâta achuhaipa hluhpi ta thaina sona hmeiseih hnei ei ta, chazy cha eima râh châta chyhsa phahnâipa ama châ. Eima râh liata Achuna environment thata tao ei chi chi ta, awareness campaign zy hnei tyh ei chi ta, eima râh achuna ta thata a thôhkhei ta, lypa a châ ngâsa.”
“Achuna (Education) liata hmahsiena ngâlâh he hmahsiena hmeiseih a châ. Eima ti nata râh hmahsie sala eima tah khiatala Education liata hmah eima sie awpa châ ta, chavâta râh hmahsiena maih liata Education pachâ peimawh ei ta, Education pachâ peimawhpa râh maih liata râh a hmahsie hra. Education heta hmialâ eima khihsa tôhbôna nata eima hri-iah pathaih nawpa kyh lia taih ta bie reih ta, education eima pachâ peimawh nata peimawh leipa liata eima râh hmahsiena nata hmahsie leina liata yzie a hnei hra.”
“Chavâta eima râh laiseih sala hma a vaw sie via lymâ thei nawpa ta Education he pachâ peimawh chyu ei suh u.” tahpa ta achuhaipazy hnota pasyuna bie pha kawpa reih ta, General Conference 2024 nata General Election apha kawpa ta nata ziza pha kawpa ry liata hnei patlô awpa ta khokheina bie a hlâ ei.
Puhpa K. Vanlalliana, ES he a lahpinô Pihnô M. Rosemary, Pihnô K. Nari, College Vaih, Puhpa Jeffrey Khara, Editor (Moonlight), Puhpa FC. Minela, Cameraman zy ta ama chakaochahlâh.