Biehmiachhipa: Tahmâ hlâ eima pahrâna râh liata reipasaona thlipi apathli haipa nata eima saw nawzy chô liata hmopha leipa atlô haipa zy tawhta eima boh thei nawpa châta atao pathina lâpi he acharô khai bah suh vy. A ei via pachaipa ta kô 12-18 likaw liata eima saw nawzy he apha pata eima khasia lymâ bei aw. Eima chô liata tlôthei aw vei tah thei awpa châ vei. Cha vâta eima saw nawzy lei diana khaotlô tawhta ama pua pakhua thei nawpa châta nô nata paw zyta tiama papua khai ba suh vy.
~A ei chaihpa ta râh (3) na râh liata pahrâpa Marasaw zydua ta eima saw nawzy chô liata eima tao pathi awpa ta eima khokheipa nawzy.
- Râh (3) na râh eima tlôpa he keimo taotheina nata hneina vâta atlôpa châleipa pita, Abeipa zawngiahna vâdeita a tlô theipa eima châpa vâta Abeipa he khâ a thei thlana chôta eima daihti zy he pasô thai chaimah pata saw nawzy châta eima taovyu awpa zy a daihti liata tao lymâ ba suh vy.
- Râh (3) na râh eima tlôpa he, o phapa zy, Motor phapa zy, rai phapa zy, achuna phapa zy eima hnei nawpa châta dei a daih ta leipa ta, hro pahâ kawpa ta eima ythei nawpa châta nata eima saw nawzy lâpi dohpa liata ama y thei nawpa nata bie hmeiseipa liata ama laisei thei nawpa châta eima tlôpa a châpa hawta, eima saw nawzy dua he apha pata khasia khai ba suh vy.
- Râh (3) na râh eima tlôpa he, sapa lôhra tlô nawpa châta atlôpa eima châleina zie he apasia hawba suh vy. Ahneirôhpa zy, athai asohpa zyta cha lôhra tlôna châta ama tlô thei aw. Keimo deikua cha, châ tiara mapi.
Cha vâta Abeipa bie liata khâ aduapa ta eima chhôkha nata saw nawzy he ama leidia lei nawpa ta apha pata khasia lymâ ba bei suh vy. - Raih liata zy, o kyh liata zy, achuna kyh liata zy nata Awnanopa kyh zy liata eima palôh he pachhâ khao leipa ei sila, eima chhô tawhta apuapa eima saw nawzy châta eima palôh he 100/100 pachhâ khai ba suh vy.
- Eima saw nawzy he kô 12 ama pha hlâta Zisu kyh pachâna nata pachhâna he pahnosa thei a chhuah khai ei sila, kô 12 tawhta achôlâ cha amo ta tah ama siethai thla hawba aw. Anodeikua kô 12 taih liata apha pata eima pachu thei khao lei khiata cha, eima khona hawta pachu thei khao aw mapi. Cha vâta ama leidia hlâta apha pata saw nawzy pachuna kyh liata tiama papua khai ba suh vy.
- Awnanopa zy, Vaitlâ achhithana zy liata eima saw nawzy he ama pha aw tahpa pachâna he pachâna ado leipa a châ. Eima saw nawzy cha chhôkha (Family) tawhta ama pha tua awpa abyu. He khyu tawhta Awnanopa nata Vaitlâ zy liata ama pha lai awpa a châ. Cha vâta chhôkha liata tlâna phapa he eima saw nawzy chô liata patlôsa thei a chhuah khai bei suh vy.
*He ary liata eima palâsapa nawzy tawhta asohsi kawpa ta saw nawzy chôta eima tao cheingei awpa nawzy.
- Eima saw nawzy he phone palaosa tu lei awpa.
- Eima saw nawzy ta viasa ama hneipa nawzy he eima pahno pasia cheingei awpa a châ.
- Eima saw nawzy he amo khota khôtho eima papuasa tu lei awpa apha.
- Eima saw nawzy o chhô liata amâ pielyu dâh nata ama taopa hmozy he nô nata pazy ta eima pahnokhei lymâ awpa a châ.
- Eima saw nawzy hmo ama hneipa he khei hawpa mah a châ apha pata pahno khei cheingei awpa.
- Nô nata paw zy ta eima chalei tlâ leipa chhaichhi nata hmobao ama ku chô liata eima hmô khiata cha, apha pata alai chadai cheingei awpa a châ.
- Eima saw nawzy khôtho ama pua titah, ama palao tyhna su nata ama khie tyhna su eima pahno cheingei awpa a châ.
- Eima saw nawzy hla ama nathliepa nata games ama pahlaopa zy he, khei hawpa nata azaopa mah a châ apha pata eima chu lymâ awpa a châ.
- Eima saw nawzy Sunday school nata Hlapy zy liata ama y nata y lei a chu lymâ awpa a châ.
- Eima saw nawzy zâcho ta pua ahmâpa nata zâcho ta phone achhy ahmâpa zy ama châmah apha pata achu lymâ awpa a châ.
- Eima saw nawzy nôpaw pahno leipa ta, ama ku liata zy, ama pôhpa liata zy lothlapa (tattoo) amâ chômah apha pata achu lymâ awpa a châ.
- Eima saw nawzy school ama bah tawhta ama school back nata ama chhaichhi zy apha pata checking taopa lymâ awpa. Eima pahno leipa ta hmo pha leipa zy ama pôh chô liata a y pathlei lei nawpa châta.
- Eima saw nawzy daolâ amâ khie titah, dao ama siekhona su zy he khei hawpa dao zy mah a châ apha pata a chu lymâ awpa a châ.
- Eima saw nawzy ama school kiana liata ama pachutuhpa nawzy nata kô 1 liata ei (3) chhâ atyhna hnei cheingei lymâ awpa.
- Eima saw nawzy thâti nata a zaopa ta, Sunday school nata Hla ama chuna su zy liata ama chhithatuhpa zy hnota ama hrozie a chuna hnei lymâ awpa a châ.
Achhâna liata cha, Biesozy châbu chhô liata eima hmôpa hawta eima saw nawzy he ama hawtino tawhta apha pata ama sie nawpa lâpi zy cha pachu lymâ bah suh vy.
-Biesozy 22:6
Hawtipa cha a siena awpa lâpi liana chata pachu ula, a machâ tita chhao siesai aw vei.
Abeipa ta he eima khokheina nawh kawpa he eima zydua châta byhna pie mawh sy. Amen
Eima leidia hlâta atao pathi khai ba suh vy
~ By: Z. Eric Notlô