“Manô Hmaumai he, Tari July 11, 2013 (Thurs) liata Interview tao hawpa châ taraw ta, Thi khai hnoh lâ ta zawpi lâ palâsapa awpa ta Manô Hlaumai (Timawthy manô) ahawna hawhta, Media rai ei hria khaolei taraw leipa ta keima chô liata ano inverview bie he a ypa vâta ahmâ ei vaw palâsapa a châ” Achhâna taih vaw reih bei muh vy.Thi khai hnoh lâ ta zawpi lâ palâsapa awpa taManô Hlaumai (Timawthy manô) ahawna hawhta atahmâ ei vaw palâsapa a châ”
Biehmiapa
Ậda hmiatuapa chipathlazy chhâ (daihti) khai tawhta chyhsa hrona kô he 70 nata 80 likah a châ ba aw tahpa ta Biehrai pathaihpa Hlazy 90:10 ta a reih. Kô 70/80 chô lâta ahro patlua theipazy he byhna ato eihrâh viapazy ama châ tah lei theipa châ vei. Khazohpa ta byhna apavaosapa chyhsa zy he anano chyu. Thlapa lâ hmosai piepa ahlao leipa ta byhna a hneipazy hry ta, “Machâ” nah he byhna ahnei eihrâh via chaipazy châ eita, eihviapa ta keimo thlyutliazy pita Machâ nahzy he eima paso thai ngaita awpa nata eima pachônôsa thai ngaita awpa apei mawh kaw. Biehrai pathaihpa 1 Pity 5:5 ta, “Cha hawhna hra chata namo satlia viazy sai u, machâ hnota angiari te u” tahpa ta a reih hra. Machâ nahzy palyupalina nata pasopadei thaina he byhnâ tona lâthlôh pha chaipa sâkha a châ hra tahpa he marasaw ta eima mylei awpa nata machâ nahzy pasona kyh liata eima tiama chyu awpa ta kho kheina sâh chaipa eima cha hlâ. Atahma Maraland Media Group@maralandnews.com vyupa ta Meipaw Vatlô Fachhai (Joint editor) nata eima Manô@Nanao Hlaumai (Timawthy manô) apakyhna thâtih cha ary liata vaw palâsa pita vaw reih hra la nâthôh khei cheingei aw. Maraland Media Group ta Manô Hlaumai he eikhâna interview eima vaw taona a châ.
(Vatlô Fachhai right nata Manô Hlaumai left apakyh nga hainopa nothlahpa)
Apakyna
Manô Hlaumai (Timawthy manô), ahmiatuata Maraland Media Group nata apakyhna daiti hnei thei awpa ta eima châhawna hlao maniah patloh chita na daiti sôh kawpa miah napie theipa vâta nachô liata eima châ ly hmeiseih. Atahma bie hiahrina lâ angia ei sila:
MMG: Hmiatua chaita na vaw thyu laina dâh, Nôpaw moh, Na kô, khih moh, pilâhzy moh nata na saw nahzy moh miah chhothei la eima châ ly kaw aw.
Hlaumai: Hmiasatua chaita MMG lâtaalyna bie ei cha hlâ ei. Namo MMG nata apakyh awpa ta pasaina keima dyutlai leipa hnota hiapa ei cha noh tawhta thla ei vaw chhâ chhihli haw tahpa ei vaw palâsa tua chai. Keima thyuna châ, Vytu khabo, Liesaih@Leisaih râh tawhta Teina khih azu pa châ pita Chatawhta Chali khih azupa eima châ. Eipaw@eipah moh cha Puhpa Bieteh (Thlalau Paw-Vytu chhôh) & eino@einah moh cha Pinô Sido (Thlalau Nô-Nohro Choza) châ eita, atahma he kô 82-na ei sie hai. Ei khih moh cha Nochhi Mara Châli khih a châ. Pilâh he pa 5 châ pita:- 1. Pupa Thlalau (Vapauh Paw), 2. Pinô Ngôzai (Zaiso Nô), 3. Puhpa Hiekhu (Rachô Paw), 4. Keima-Hlaumai (Thlamâ Nô) nata 5. Puhpa Hramau (Ngôzei Paw) zy eima châ. Ei saw nawh mo 10 pha ei ta, mo 7 he ama hâtino tawhta khizaw miah ama khôsai khai haw. Atahma mo 3 deita ama hro. 1. Puhpa Thlamâ (Khaizi Paw), 2. Rev. Vabi (Timawthy Paw nata 3. Pinô Fiesôh (Mawnika Nô) zy ama châ.
MNG: Manô Timawthy manô y, nâmo daihti liata py khazi tai e châ nâ vaw chu hmâ, miah na chho thei aw tly ma?
Hlaumai: Aw! Ado tlaina, keimo daihti no he Saku akia thei pe’nawh he mohnao sawzy, O chaki-chapa sawzy nata o liata chapawsaw a hlupazy deita saku kiana daiti chhâ vaw châta, chakhai tawhta tlapi rai ahria theipa sawzy kiatheipa châ heih ta chadaiti nota keima he kô 2 saku kia thei awpa a châ. Pachutuhpa Lehu (Ngotlai Paw) Hakha pai lâta chyhsa, ta kô 4 nama kia awpa a châ tah ta, kô 2 deita kia awpa la kho vana pua haw te u maniah tah ta, noh 2 dei kia hmâ na ta a noh 3-na liata ei pati baokau@baoky chhaota ei vaw pua haw. Pychhaih hmâ ta kia hmâ vana. Mara châ dei he private ta a chu nata Hlabu Biehrai mothaina hrakha lâ ei thai.
MNG: Yangon he kheita e na vaw tlô dâh a châ? Atahma Yangon liata na yna â rei mah mâ?
Hlaumai: Keima sawchapawpa Rev. Va Bi (Dr.Candidate), khazohpa rai chakaona vâta Yangon azâtlôpa châ nata atahma Yangon liata ei yna he â rei haw ba. Kô 21 a pha haw.
MNG: Eima châ ly kaw. Yangon liata na ypa he na ngia achâryh thai ma? Mara râh navâ thai tyh ma?
Hlaumai: Ei zatlô duano cha, eima O tlôpa he a hlâpa châta O chhao Ochyhpata a châ hlei khota eima niedo zy achhie ngâsâpa vâta eisapa pachâ ta lâ ei ngia naryh thai vei. Châhrasala khapa vâta ma Yangon khihpi eiz atlô tahpa pachâ sualua na ta ei khibôhpi lâ vâ hlei vana,angiapachhi hra leipa nata lopi phao lymâna chôta daihti varo avaw sie khai tawhta Khazopa ta byhnâ miah pie via lymâ ta atahma lâ eingia ei nâryh kaw ba.
MNG: Aw! Cha tlai chu. Atahma he kô 82 na, sie haw ba chita na bierei dâh liata soh/fei kaw chita, napachâna memory chhao apha kaw, machâpa chhao nalyu leipa hawhta ei chahmô dâh a châ. Pati niena kyh liata napakah apahâpazao lymâ tyh ma? Na niedopazy nasapa rie a châpatheipa a y tyh ma?
Hlaumai: Pati niena kyh liata eipakah pahâpazao leipa ta kô 60 chôlâ nawh madopa Vitamin he American lâ tawhta navaw paphao eita cha châ ei do tawhta eipakah apahâpazao lymâ ba. Atahma kô 4 asie hai. Ei niedopa liata ei rie napatheipa lâ y hrao taraw leipata a châhta ei thisaih atlapahnai tyh. Ei luh azohna daihti a y tyh hra.
MNG: Aw! Tlai chu. Manô (Timawthy manô) y, na hnatla a phakawpa ta chapahno pita ti nâsi dâh, ti nado dâh, na niedo kyh nata nâ pasipathai dâh he kheita e a châ? Miah na chho thei aw tly ma?
Hlaumai: Châli Khih liata ei y no, rai thata ei hria daiti no cha ti asi leipa ta ykho tyh leipa na ta noh kha ta ei (2) lymâ ti ei si tyh. Atahma ei machâ tawh deikua rai ei hria thei khao leipa vâta nata ti he asipazao awpa ei hohpa khao tyh leipa vâta nohkha ta eikha deita ei si tyh. Ti dopa he vaw do khothai tyh lei kha nata atahma luzohpa hri ei hnei tawh heta noh kha ta 1 ltr eidoh lymâ. Ochhôh liata ama chhopa zydua he ei nie lymâ. Keima raokhohpa (niedo) ei chaleisapa lâ, y tu vei. A châh ta tah ei niekhohpazy rei nata eina cha leipa tyh ei.
MMG: Nâmo chhâ daihti liata thyutlia hrozie nata atahma chhâ (keimo chhâ) daihti liata thyutlia hrozie he khatlu ta e anano/âhlei dâh a châ? Nama hmô dâh tawhta miah chho thei bei teh?
Hlaumai: Keimo chhâ daihti liata thyutlia hro châ: pheinâ (slipper) hnei leipa pita vao-ie, sei-ie he eima phei liata miah âbai tyh. Tho eima la daihti liata chhao pheinâ leipa a châpa vâta ahloh miah achho kaw tyh hra. Ochhôh eimâ ngia hlata vao-ie, seiie he tita eima pasipathai tyh. Kô 5/6 ry lâ, hâti zy he ama thlekalypa ta ama y tyh. Eima chysia ataodâh he eima râzoh kaw. Parupangapa nata chanô chapaw hro (sex kyh) he apha kaw. Hmoda aparupazy he ama soh kaw. Novah ahneina kyh nata azaopa ta arakheipa (paru) zy he y lilâ thai tu vy. Atahma chhâ thyutlia sawzy hrozie he keimo chhâ daiti nahta anano. Paruna kyh, Sahmie-sahma nata chanô chapaw (sex kyh) liata ama hro a chhie via ngâsâpa ta ei pahno. Krizy na kô 100 chôlâ pha haw taraw pita Krizyhpa kô 100 awnanopa hrozie nata amâ hmie thai leina a hlu kaw. Novah ahneina kyh liata chanô chapaw aparupa ta ahneipazy ama hlu kaw. He he keima hmôna dâh a châ.
MNG: Ado tlaina! Mara bieso na pahno thei chhohpazy miah chhothei lâ eima châly kaw aw?
Hlaumai: 1. Tihryti cha, ava avawsua nota alai kaw. Châhrasala noh avawsa nata akua khai haw heih. 2. Abei saw (pho siapa) cha, anonai ta, pho sia leipa abei saw lei saw pachâpa cha âhrâ hrao kaw@âpalaipatei kaw. 3. Atahma chhâpa cha naita, Bie zy rei chakhypa y vei, machhiepa na abei a châ e! (keimo zy no ta phipa hla a châ). 4. Chhohna hropa zo ta, chhohna raohpa âpangieh. 5. Tilih ry ta vei hra la, na veiro hawkho apua aw. He hrakha he ei vaw pachâpazi theipazy a châ ba.
MMG: Aw! Eima châ ly kaw. Bie hro lâta avaw ngiah hei sala, na saw hneichhôhpa mo 3 hryta mo 2 zy he chipho hropa (lahpi + vahpa) ahneipazy châ eita he kyh liata nama khokheina ahlaopa ta ahneipazy ama châ khai ma? Chipho hropazy he Marapa nata amâ nanona ama y hlei ma? Khazohpa bie tawhta aduapa ta chipho hropazy he keimo Marapa nata pôhkha eima châpa ta pahnopa a châ. Anodeikua nama tawhta Marapa nah amâ hnei vei tahpa pachâna/palôhphao na vaw hnei tly ma?
Hlaumai: Ei saw pa 2 pe’nah ahneina kyh liata keima khokheina a y tah ngâh vana, y vei tah ngâh hra vana, ei kho khei ei tah ngâh hra leipa na ta, khokhei vei yna tah ngâh hra vana. Amo khotlyna liata kei chhao palôtlâhna ei hny khei khai ei. Mara saw hryta asopa nata aso leipa ama y chyupa hawhta chipho hropa zy chhao cha hawhta ama châ khai hra. Keima saw pa 2 pe’nah, chipho hropa ahneipazy kyh chhao ama pha khai ta hlei leipa nata ama chhie tah awpa chhao rei n’awpa hnei hlei vana. Keima maono (Timawthy Nô) lâ eina pasô-pakhe tu haw, ei saw hlâ hmâta eina dao via. Khazohpa bie tawhta chhao apatluana y hra vei. Châhrasala keima tawhta pachâna lâ Marapa ama hnei awpa he ei vaw saduthliena a châ. Achô lâta ei vaw rei chiehpa hawhta amo kho atlyna a châpa vâta ei ly khei kaw thla ha ei. Eisaw nah mo 2 chipho hropa ama hnei khai tawhta Satu khih liata ei viasa heihpa nôpy liata ei vaw chakao hnai pe’nawh mo pa 3 tawhta (veiseihna bie) “Bie ei navawpaphaopa ei châ: ‘khih liata na y no kha nasoh navâh kaw chatah pita atahma na machâsa ta namao kaw bah e, nasaw nah he chipho hropa na pahneisa hôlô’ tahpa thâtih ei daopa a châ”. Keima ta bie ei chhypa (reply) ei châ, Aw ei viasa sai u, nama reipa châ âdo tlaina, châhrasala Khazohpa bie ta “zu chyhsa y vei, krikapa y vei, zenitaipa y vei …atahma lâ ahlapa he ahniapa ta chatao bâ aw ei nata pôh nopa kha pôhkha ta ei chatao ha ba ei., Khazohpa bie ta areipa vâta keima chhao ta palôtla ei paoh ngâsâ tahpa ta bie ei ta hra ei.
MMG: Byhnâ tona lâpi zy he na theina hra khata miah chho thei bei lâ, eima châ ly kaw aw.
Hlaumai: Keima hmôna dâh liata byhnâ tona lapi zy cha: 1. Khazohpa achizahpazy he byhnâ ama to lymâ aw. 2. Ariesipa nata apanawhpa chyhsa zy ta byhnâ ama to lymâ aw. 3. Nôpaw chizana hro ahneipa nata nôpaw zy apasahsapazy cha byhnâ ama to lymâ aw, nô nata paw tahpa liana he ta nôpaw asa-avao hmeiseihpa deita he reikho na châkhai leipa ta maniah asa-avao leipa nôpaw zy chhao he chizah ta paso awpa a châ hra. 4. Mâ haw (Chanô mâ) a chahra leipa zy he byhnâ ama to lymâ aw. 5. A chipho kyh apachâpa nata anoh (personal) phana hlâta mophropa phana atlua lymâ tuhpazy he byhnâ ama to lymâ aw.
MMG: Mara chanô mâ he leiba se! na tah ma? lei kha se! na tah e?
Hlaumai: Mara chanô mâ he lei haw ba sala ei tah kaw. Eima sawchanô/sietano zy azuapa (hmodâh zuadâh hawhta azuapa) eipa lyusa kaw. Mara saw he khei hawhpa chhâ nata daihti lia ta ma châ, sietano azuapa , saw chanô, tunô nawhzy azuapa eima châ tahpa ama vaw pahno daiti a y thlyu aw tahpa ngiapâna ei hnei. Chati ta mara chanô mâ he a vaw lei khai thlyu aw.
MMG: Khizaw râh to, su to liata apahrâpa marasaw zy hnota bieta khona na hneipazy a y ma?
Hlaumai: 1. Rev. R.A Lorrai chi hiepa Maraland liata eima ngiapâna kha râh to, su to liata a ypa marasaw zyta vaw my pathlie lia pi tahpa ei rei kho. 2. Eima Marapa he Khazohpa ta Izarel sawzy âtlypa hawhta Rev. R.A Lorrai vâta keimo marasaw he Khazohpa ta miah âtly haw hra tahpa pachâ nata chavâta Khazohpa ta Mrasaw kyh miah apachâna he marasaw ta eima mylei awpa ei khoh tahpa he ei rei kho chaipazy a châ.
MNG: Maraland Media siepahliepa ta khizaw kaoki, râh to, su to liata a ypa Mara thyutliazy hnota ryuhi bie miah na chho khopa a y ma?
Hlaumai: Namo MMG zy ta ryuhi bie rei awpa ei nah tapa vâ ei chita thata ei châ ly ei. Mara Centenry hlapy kha tape tawhta vaw nah thlie hra nata “Lorrai chhôhkha mothli vâta Mara râh a khai haw” tahpa ei vaw thei bao chalâ, ei palôh ei na chahria kaw. Chavâta Mara thyutlia zydua ta Lorrai chhôhkha mothli hawhta chipho hropa thlahmipa pachha n’awpa châ ta thapasana hnei hraw’pa ta ama râh pakhaisa awpa he a vaw chhuah chyu bei muh vy. Pôhpa ta asiethei leipazy ta, hneina sôh nah piah ta nahta thlahchhâna ta râzohpa râh cha vaw pakhaisa hra ma y tahpa zy he ryuhi bie ta ei reikhohpa a châ. Keima cha kô hlupi hroparie thei khao lei kha aw nata he ei ryuhi bie he ta, hmôtao theina vaw châ lymâ bei sala tahpa ei khopasa kaw.
MMG: Na ryuhi bie he mara saw châta lôsôhpa hawhta moto pathipalôh liata bie rei lymâ mawh sy.Amen. #Ngiachhipa ta Maraland Media Group/www.maralandnews.com châta nata chakaotuhpa nawh zydua châ pita byhnâ eima to via lymâ thei n’awpa ta thlahchhâna nata byhnâ awna miah hneipa thei bei la, eima châly kaw aw.
N: Cha tah tlai sy. Maraland Media Group liata hriatuhpazy nama yna su alyu leipa vâta Interview nâ taotuhpa nâma luh ei chahnaopa ta byhnâ awna ei tao awpa he, na hrialâhpa zydua châ chhao a châ tahpa naw pachâpa khai bei mawh ei se. Atahmâ byhnâ awna hnei suh vy.
(MMG liata hriatuhpazy he râhto suto liata eima y patlahpa vâta Meipaw Vatlô Fachhai luhchahnaopa ta byhnâ awna Manô Hlaumai ta ahneipa he MMG liata hriatuhpa zydua vyupa châhta a châ. Palorupa mothlaw ta vaw hmô pazi thai bei muh vy.)
MMG: Amen. Eima châ ly ngâsâ. Na byhnâ awna he eima to khai cheingei aw tahpa 100% ngiapâna eima hnei. Manô (Timawthy mahnô) na hro pareih mawh sy.
Note: Maraland Media Group ta Satlia he ‘St’ ,tahpa ta nata Laisa he ‘Ls’ tahpa ta hmâh pita, kô pitlôh kaw taraw ta machânô+machâpaw hmeiseihpa a châ kaw leipazy he Pinô & Puhpa tahpa hmâ pi ta, kô hâti hrasala lahpi+vahpa hny hawta saw asa hawpazy chhao Pinô & Puhpa hmâh hra pi ta dy a châ leipazy he ama kô siezie mopa ta ‘St/Ls/Pinô/Puhpa/Manô/Mapaw’ ta eima hmâh hra, Machâ pitlohpa he Manô & Mapaw tahpa ta eima hmâh.
***********************************************************************************************
Manô Hlaumai (Timawthy manô) thâti âki viapa:
Manô Hlaumai (Timawhthy manô) he Puhpa Bieteh (Thlalau Paw) -Vytuchhôh & Pinô Sido (Thlalau Nô)-Nohro Choza saw chanô a châ. Amo he Vytu-Khabo, Liesai/leisaih râh tawhta Teina khih (Nochhi Mara râh) azupa châ eita, Pilah pa (5) pha eita:- 1. Puhpa Thlalau (Vapauh Paw), 2. Pinô Ngôzai (Zaiso Nô), 3. Puhpa Hiekhu (Rachô Paw), 4. Interview taotuhpa Manô Hlaumai (Thlamâ Nô) nata 5.Puhpa Hramau (Ngôzei Paw) zy ama châ. Teina khih liata anôpaw zy he apahapa (khzaw akhôpa ama châ). . He daihti nota Teina khih he Ody 140 khihsana châta (atahma châ dyh 70 rylâ ama châ haw ba). Teina khih liata alaisa nota Saikao khih tawhta thâtih pha akaw chhopa pastor pa 4:- 1)Vase Paw, 2) Laihlau Paw , 3) Ngoma Paw nata 4) Sielai zy kaw tlô eita he daihti liata ano he Kri vaw zy ta Teina khih liata Sunday school chhithatuhpa ta kô 2 a hria hai nota dy vaw châta a vahpa moh châ Puhpa Neitha (Thlamâ Paw) Khule, Burma pheisai pa a châ. Âvahpa he thlapa lâ kyh abôchhâpa nôpaw pakha vaw châ hrata khih Hyutuhpa ta chahnaopa châta Châli khih liata thlapa lâ râzohpa chakao awpa ângiapa vâta Rev. Mathao (Saukô Paw) patopatiahpa ta Châli khih lâ he azupa ama châ (He daihti nota Châli khih he Odyh, dyh 8 châ eita atahma he Odyh 60 khihsa ama châ haw ba). Saw byhnâ he mo 10 to ei ta, mo 7 he ama hâtino (kô 7 rylâ) daihti liata khizaw ama vaw kho khai haw. Atahma mo 3 deita ama hro.1) Puhpa Thlamâ (Khaizi Paw), 2) Rev.Vabi (Timawthy Paw) (Dr. Candidate) nata 3) Pinô Fiesôh (Mawnika Nô) zy ama châ.
Atahma he sapa kô 82 asie haina daihti châta, ama pahrâna Châli khih liata avahpa apaha saita asaw liapa Rev. Va Bi (Khule) he Church Planting Institute (CPI) nata People Evangelical Church founder châta Khazohpa rai chakaona vâta Yangon khihpi liata a vaw ypa ama châ. Manô Hlaumai he, Khaizi manô tahpa ta aw tuapa châta, asawta uthei chaipa sawchanô moh Khaizi he khizaw akhô hawpa vâta asaw liahpa saw, Timawthy moh hmâpa ta Timawthy manô tahpa ta aw via bapa a châpa vâta zawpi aw viana zie hawhta awpa tlao a châ.
Note: Maraland Media Group website he athi hawpa vâta or update khao leipa a châpa vâta interview ataotuhpa ahawna hawhta Maraland.net liata eima vaw palâsapa pâ a châ.