SAIKAO, 2 Hmypi, 2022 (MNN) – Kô 55 a khô hapa, târi 24 September, 1967 pa ta Aizawl liata eimâ chhaihpa Puhpa Peter Richard (L) rureih cha atanoh târi 2.2.2022, dawh 2:48 PM kha ta a mahnô & mahpaw RA. Lorrain nôvah nah Aziana thlâpipa, Saikao liata pabupa a châ.
Puhpa Peter Richard he 20th January, 1929 liata vaw pihpa ta vâdua chhih kawpa ta kô 38 uhtheipa a châ hai no ta Aizawl liata a thina chhâpa pahnopasiapa y leipa ta miah â pahâ sai. Ano dairy liata cha châmaih (poison) ta a thipa hawhta ano ta a roh.
A ri he Puhpa PP. Zalena, President, MTP Gen. HQ ta Aizawl Chhinga Veng thlâsu (Hmialâ liata cha Armed Vaih thlâsu tahpa bipa) liata pachha/pahâ awpa ta za buakhei ta, he liata Aizawl Mar Welfare Committee nôpawpazy ta member zy chhao ta ama vaw buakhei khai.
Atanoh târi 2 February, 2022 (RA. Lorrain thi noh atyheihna noh) liata Saikao su liata pabu awpa ta ryraona taopa hawhta apalâ kawpa ta pabu theipa a châ.
Dyna Programme Maraland hawka, Kolodyne River Gate, Kaochao ESt avaw tlô daihti liata Huhâ/vâhla pathluahna Puhpa S. Beisâ, Tipâ ta hnei ta, Chiahmie, Dawkhoh nata Meithei ei hluhpi kapa a châ khai tawhta Rev. NC. Vabeilua Sr. Adviser, MTP Gen. HQ,
Siaha ta thlahchhâna hnei ta, he khai tawhta Saikao lâ palâh kheipa a châ.
Saikao tlô kheipa a châ tawhta Lorrain Ville waiting Shed liata alapihnô Pihnô Sapai Lapi (L) rureih thobyh ta vaw y dy ta, MTP Gen. HQ OB ta Peter Richard rureih thobyh he asy ei ta, Pihnô Sapai Lapi rureih thobyh he a samohpazy ta asy hrapa ta Mission Compound Gate taihta amâ sy.
Mission Compound Gate tawhta Missionary Bungalow taihta MTP Sub-HQ: Saikao zy ta amâ sy hra.
Missionary Bungalow liata buakha paziapa châ ta, Mc. A. Raikô, Awnano hyutuhpa CCI(M) Lorrain Ville ta thlachhâna a hnei khai tawhta a sawchapawpa Puhpa Ernest Richard O lâ zu kheipa a châ.
He su liata Puhpa Ernest Richard ta alynabie nata biereina chyupa daihti hmâh ta, Puhpa N. Zakhai, CEM, MADC chhao biereina chyupa hnei awpa ta daihti piepa a châpa hawhta chhôhkha lâ vyuhpa nata Mararâh zawpi vyuhpa ta biereina chyupa nata alynabie reina a hnei hra. He su liata daihti khaw nawpa ta Revd. K. Vâbeinochô, CCI(M) Saikao biatuhpa ta thlahchhâna a hnei.
He khai tawhta Khairie kô thaby tlyhmia liata Pabuna Programme ahmâpa châ ta, Puhpa PP. Zalena, President, MTP Gen. HQ ta programme chhihtha ta, Mc. HC. Rochungnunga, Chairman, Assembly CCI (M) ta pathao thlahchhâna a hnei.
CCI(M) KTP Branch: Saikao Hlapy zy ta arônah kawpa ta Hallelujah Chorus ama paryh. Puhpa Pakhaw Choza, General Secretary, MTP Gen. HQ ta Puhpa Peter Richard rureih la nawpa ta MTP Gen. HQ ta â patohpatiana dâh report tlâhpipa reina a hnei.
Chhôhkha vyuhpa ta St. Delson Nôtlia ta Peter Richard thâtih tlâhpipa reina a hnei.
Revd. JR. Sanga ta chaphôhtuna reipapuana hnei ta, Rev. AZ. Beirona, General Secretary CCI (M) HQ: Saikao ta pathliena & pabuna programme a hmâh.
Daihti chhâna lâ liata Revd. Dr. T. Laikai ta biereina chyupa nata thlahchhâna a hnei.
He khai tawhta nohthla lana hneipa châ ta, Thlâpipa lâ pabu awpa ta ngaikheipa a châ.
Thlâsu liata Rev. VL. Ngaia Hlychho, Sr. Executive Secretary, ECM HQ ta thlahchhâna a hnei.
Atanoh liata programme zydua he sawhkhâ SOP taopa zyna chô ta siekheipa châ ta, COVID-19 hripipa daihti a châ vâta hruana tao tlâ leipa châ ta, lei thei leipa ta ahlao khohpazy cha amâ rypaohna hawhta amâ vaw hlao chyu hra.
Peter Richard sapa nata thisaih, Mararâh liata a vaw ngia thei vei hrasala, a rureihpa, Marapa râh leilô, RA. Lorrain nah nôvah thlâsu lia cheingei ta pabupa a châpa he Mararâh châta sapa nata thlahpa liata eimâ pôhkhana nata eimâ dyryhna dei châ leipa ta byhnâ hluhpi a vaw tlô khei tuhpa a châ thei nawpa ta atanoh liata biereihpa nata thlahchhâpazy ta Abeipa eima Khazohpa lâ ama hiah chyu.
Atanoh liata Khichhai a vaw tlôpazy châta MTP Sub-HQ: Saikao ta niedo vaw patohpatia hleikhô ta hmoto zydua, apha kawpa ta ama vaw patohpatia khai thei vâta MTP Gen. HQ chata alynabie a reih.
Sd/- BEIROKHU BEITÂ
Secretary
i/c Information & Publicity
MTP Gen. HQ: Siaha.