SIAHA, 22 Hmypi, 2022, Hriaheinoh – Atanoh dawh 2:00 PM pa ta Laihsa Zirsangpuii Syuhlo, Miss Mizoram 2020 cha Puhpa N. Zakhai, CEM ta ano Official Chamber liata programme chyupa taopa ta COVID-19 SOP & CAB zyna chô ta alykheina nata thopi dokheina a hnei.
He Programme he Puhpa K. Chhihrau, Executive Secretary, MADC ta chhihtha ta, Puhpa T. Seido, Dy. Chief Whip, MADC ta pavaosana thlahchhâna a hnei.
Puhpa N. Zakhai, CEM zachhihpa ta beireina chyupa hneipa ta pasyupalina bie reih ta, Marasaw tawhta Mizoram pôpalôhpa liata Miss title eima châ theipa he aly â chhih tah ta, he hawhpa duahmo tlô thei awpa ta a mohôh tuhpa a Nô nata Paw zy reithai tlâh ama châ zie a reih. Alykheina châta programme lai viapa tao awpa ama kho kaw no ta COVID-19 hripipa a charei daihti a châ vâta he hawhta chyhysa chyhta ta alykheina taopa a châna kyh liata Miss Zirsangpuii nata a chhôhkha lâ pachâthaina â haw. Miss Zirsangpuii he Marasaw a châna hawhta Marapa châna zakhei leipa ta hmialâ a sie lymâ nawpa liata hlao tlohna phapa to via lymâ awpa ta MADC vyuhpa nata Marasaw zydua vyuhpa ta khokheina sâh chaipa a hlâ.
Chhôhkha lâ tawhta Miss Zirsangpuii paw Puhpa Beila Syuhlo ta alynabie reina nata ama chhôhkha thâtih pahnosana chyupa a hnei. Miss Zirsangpuii chhao bie reina chyupa hnei ta, CEM zachhihpa bietapa hawhta khataih su lia rai Mara a châna a za khei leizie nata Mara a châ tahpa a reih tyhpa reipalâhna hnei ta, he hawhta palyupalihna programme ama taopa he â phuh lei zie reih ta, ama chi nata heih lâhpa nohâh taopa ta apasô tuhpa CEM nata a hrialâhpazy hleikhô ta, Mararâh zawpi zydua hnoh ta alynabie a reih.
Akhohpa châta biereina hnei awpa ta Chairman ta daihti payh ta, Puhpa K. Hrahmô, EM i/c Education nata Puhpa B. Dawpho, Editor, The Times of Maraland zy ta alykheina nata khokheina bie ama reih hra.
Miss Zirsangpuii he Mara zawpi vyuhpa ta alykheina châta Puhpa N. Zakhai, CEM ta pawpi (bouquet) hlâ ta, Puhpa H. Sahlo, Chairman ta Ryuchâ a hlâ.
MJA Siaha District members – Puhpa M. Baithai, Editor (Chhim Aw), Puhpa B. Dawpho, Editor (The Times of Maraland) nata Puhpa Jeffry Khara, Editor(Moonlight) zy chhao he alykheina liata amâ hlao hra.
COVID-19 hriaiah a chareina daihti a châ vâta he alykheina liata MADC Elected Office Holders nata Official thokha ngâlâh hruapa ama châ.
Miss Zirsangpuii he atanoh myrâh liata MCHP General Headquarters Opi liata alykheina hneipa châ hra ta, he liata MCHP Gen. HQ, MTP Gen. HQ nata MSO Gen. HQ tawhta alykheina châta hmosai piepa hlâna hneipa a châ hra.
Tisi liata a paw unawhpa saw lahpinô hnei awpa ahlao awpa ta Aizawl tawhta akhypa Miss Zirsangpuii Syuhlo he Miss Teresa Syuhlo, Miss Mara 2019 ta alykheina lia zy ta zipa ta a chaku chavei hra.
(Admin, MNN. Source: I & PO, MADC)