SIAHA, 3 Pamih, 2022, Pobienoh (MNN) – Puhpa K. Chhihrau, Executive Secretary (ES), Mara Autonomous District Councl (MADC) ta atanoh dawh 1:30 PM kha ta Mizoram Journalist Association (MJA) Siaha District zy thopi do kheipa ta, apakyhna a hnei.
Puhpa K. Chhihrau, ES chata ano ES a vaw châ tawhta daihti rypaoh tua chaipa liata MJA Siaha District nahzy thopi do lâh ta, apakyh awpa â chhuah tyh tarawpa ta Programme nano nanopazy nata rai nano nanopazy vâta daihti ruapa vaw hmô thei leipa ta, atanoh liata he hawhta daihti rypaohpa a vaw ypa cha â ly hleikhô ta ama daihti sôh kawpa aparua tuhpa MJA Siaha District OB nata member nahzy hnoh ta alynabie a reih.
Puhpa K. Chhihrau chata MADC he atakô liata Golden Jubilee (1972-2022) eima tlô hapa vâta kô 50 chhôh miah chhihtha tuhpa Khazohpa hnoh ta alynabie reih ta, Golden Jubilee pachhaipadaipa ta MADC ta motto “Arise, Shine” (Thyu la, khaih teh) tahpa cha Executive Committee, MADC ta â py khei tahpa reih ta, atahmâ tawhta MADC motto châta “Arise, Shine” (Thyu la, khaih teh) tahpa hmâ lymâ pa a châ bâ aw tahpa a reih.
Ano ES a vaw châ tawhta a theina hawhta MADC Administration chhao apha viapa ta siekhei awpa a khopa hawhta atahmâ he officer & staff ACR sianôpa roh awpazy, Disciplinary Action Committee padua hapa kyh zy, Office chhôh liata châhna mei pazy pasai leipa nata hmo zua pasai leipa zy nata Office hours chhôh liata Officer nata Staff zy ta apha kawpa ta office eima pahrâ chyu thei nawpa ta hmahlana siekhei haipa a châzie zy reih ta, he hleikhô ta MADC ry liata sawhkhâ rai hriapa zydua, hâta ei kha liata ei kha – Pakhynoh maih liata Mara atobina ta atobi awpa tahpazy nata 12th Term MADC General Election phuah hlâ – March 5 nata 15 likawh liata MADC Golden Jubilee Opening Function hnei a chhuahpa a châzie zy MJA Siaha District zy hnoh ta a reih.
He hleikhô ta MADC RE 2021-2022, Mizoram sawhkhâ lâta eima hiapa zi hlâta chyh via syulyu piepa vâta ano nata Pihnô S. Lalmuanpuii, Dy. Secretary(Fin.) ta Mizoram sawhkhâ azâ daohpa ta ama hia baichhipa cha Khazoh baona vâta hlaotlohna ama topazy a reih.
MJA Siaha District lâ tawhta Puhpa V. Pawhla, Vice President, Puhpa B. Dawpho, Editor (The Times of Maraland) nata Puhpa Jeffrey Khara, Editor (Moonlight) zy ta biereina chyupa hnei ei ta, ES thiehpa Puhpa K. Chhihrau hnoh ta khokheina bie hlâ ei ta, he hawhta thopi dolâhna taona châh a pahnopa vâta alynabie ama reih hleikhô ta MJA Siaha District nata MADC Information & Publicity Department ta ama peimawh kawpa nata amâ ngiah kawpazy ES thiehpa hnoh he ta tlôkhei pâ ei ta, hlaotlohna khochhihpa chhao ama hmô awpa ama hnabeiseihzie ama reih.
Pihnô S. Lalmuanpuii, Dy. Secretary(Fin.) nata Puhpa Beirokhu Beita, I & PO zy ta biereina chyupa hnei hra ei ta, daihti chhâna lâ liata Puhpa K. Chhihrau, ES ta MJA Siaha District lâ ta alynabie reih ta, ano ES a châ daihti chhôh liata hrialâh phapa châ lymâ awpa ta MJA Siaha District hnoh ta ahawna nata hruana a tao.
He thopi do lâhna liata official lâ tawhta Pihnô S. Lalmuanpuii, Dy. Secretary(Fin.), Puhpa K. Machhua, Under Secretary (GAD) nata Puhpa Beirokhu Beita, I & PO zy ta Puhpa K. Chhihrau, ES ama chaku chavei.
MJA Siaha District tawhta Puhpa V. Pawhla, Vice President , Puhpa Lalnunkima Pisa, Treasurer nata members Puhpa B. Dawpho, Editor (The Times of Maraland), Puhpa Jeffrey Khara, Editor (Moonlight), Puhpa Beichhuatha Hlychho, Editor (Maraland) zy amâ hlao.
(Admin, MNN. Source: I & PO, MADC)