SIAHA, 10 Chhiepa, 2022, Chutynoh (MNN) –Atanoh dawh 1:00 Pm pa ta Puhpa H. Malvina, CEM, MADC zachhihpa ta atakô 2022 MBSE ry liata HSLC (Class-X) nata HSSLC (Class-XII) Exam hneipa liata Mararâh moh papha tuhpa, ary liata palâsapazy hnoh ta MADC nata Mararâh zawpi vyuhpa ta alykheina nata thopi dolâhna a hnei.
- Singokhai Chozah,
D/o C. Thahe,
New Siaha
Top 2, HSSLC
- Lalramzawnsangi,
D/o George Lalawmpuia,
New Siaha
Top 6, HSLC
Alykheina he CEM’s office chamber liata Programme chyupa taopa châta, Puhpa K. Chhihrau, Executive Secretary, MADC ta chhihtha ta, Puhpa N. Viakhu, Chairman ta Biehrai Biesozy 15:1-3 reina nata thlahchhâna hnei ta, Puhpa H. Malvina, CEM nata Puhpa Nahlô Solo, EM i/c Rev. etc. zy ta biereina hnei ei ta, Singôkhai nata Lalramlawmsangi chhôhkhazy vyuhpa ta Puhpa C. Thahe ta alynabie reina nata biereina chyupa a hnei hra.
Puhpa C. Thahe ta a sawnah pasyuna bie a tapazy reih ta, ngâchhih awpa nata teacher tawhta mo hropa khokheina a y pathlei hapa chhao ta uahva lei awpa zy, exam hall liata amopâ leipa ta question avypa maih sasyh thaina tawh cheingei ta achhy khai awpa zy, result vaw pua ti ta viasa hropa ama vaw thai via hapa chhao ta palôh pasa lei awpa zy ta ama pasyu tyhzie a reih.
Singokhai Chozah he ta IFS (Indian Foreign Service) châ a chhuah ta, Lalramzawnsangi ta IAS châ â chhuah tahpa Puhpa C. Thahe ta a reih pâhra.
Atanoh alykheina liata Puhpa H. Malvina, CEM zachhihpa biereina chyupa a hneipa liata a bierei tlâhpi viapazy:-
- Atanoh alyna daihti eima hmâ theipa he Khazohpa khokheina vâ châ ta, ahmiatuata Abeipa hnoh ta alynabie reih na ta, MADC liata ei hrialâhpa nôpawpazy, officials miah ahlao theipazy hnoh ta alyanbie reih na ta, eimâ lykheipazy y vei hra ei sa la, âmo vyuhpa ta ama chhôhkha nah miah amâ hlao thei vâta ama hnoh ta alynabie ei reih.
- Eima sawnahzy châ amâ chupa mokhei tah, amâ chunazy pahno khei awpa he apeimawh kawpa ta pahno na ta, sawnahzy khokhei hmeiseihpa ta hlaotlohna lâpi liata amâ chhih thei nawpa ta mokhei awpa he hmo rairu kawpa a châ no ta, atanoh liata eimâ lykheipa nô nata paw zy he reithai tlâh ama châ hmeiseih tah na ta, alynabie ei hlâ ei.
- Atanoh eimâ lykheiapzy he eima chi nata pho thâ papha tuhpa châ ei ta, atanoh liata âmo nata amâ chulâhpa Marasaw achu haipa zydua hnoh ta bietana ei hnei khoh kawpa ei cha, achuna he chi nata pho, râh pabohsana chhaichhi peimawh kawpa châ ta; achuna eima pasâhsa leipa khiah chi hropazy ta miah ama disao aw tahpa he achu haipazy ta ama my leipa ta achuna liata theina zydua papua khai awpa ta ei châ haw ei.
- Atahmâ cha sawhkhâ liata apahnieh lai kaw bâ pi ta, sawhkhâ liata biehneituhpa châ awpa ta cha châthaipa eima peimawh, MCS nata IAS competitive exam liata hlaotloh thei awpa ta Marasawzy tiama eima papua via lymâ awpa apeimawh hmeiseih.
- Khâpa hmo rai tao ei si la, Khazohpa hmia pasahna he hlaotlohna châ ta, hriapasana ta eima tao pazi awpa cha chyhsapa tovyuh a châ. Hriapasana liata Khazohpa ta hlaotlohna miah a pie cheingei aw. Keima bawlaw chhao kô 17 hlei chhôh tlai hnabeidy leipa ta politics liata ei vaw tao hualuana cha Khazohpa ta pahno thlâh ha ta, atanoh liata CEM taihta châ theipa ta hlaotlohna ei vaw topa a châ.
- Achuna lia dei châ leipa ta sôhpaliena nata nietluana to lia chhao hriapasana he apeimawh tahpa pahno heih chyu awpa ta eimâ pasyu hmeiseih.
- Singôkhai nata Lalramzawnsangi zy, hmialâ nama sie lymâ nawpa liata chhôhkha châ, Mararâh châ nata Khazohpa khinarâh châta chyhsa hmâtlâpa châ lymâ awpa ta khokheina asâh chaipa ei cha hlâ ei.
Singôkhai nata Lalramzawnsangi zy he lykheina châta Ryuchâ nata Cash Award Rs.50,000/- raihrie piepa châ ei ta, Puhpa H. Malvina, CEM ta Singôkhai Chozah vyuhpa ta Puhpa C. Thahe hnoh ta hlâ ta, Puhpa HC. Lalmalsawma Zasai, Dy. CEM ta Lalramzawnsangi vyuhpa ta a nôhnai Zualbawihi hnohta a hlâ hra. Singôkhai nata Lalramzawnsangi zy he achuna vâta Siaha tawhta sie ha ei ta, chavâta âmo vyuhpa ta ama chhôhkha nah ta ama vaw daopa a châ.
Atanoh alykheina liata MADC nôpawpazy tawhta Puhpa HC. Lalmalsawma Zasai, Dy. CEM, Puhpa N. Viakhu, Chairman, Puhpa M. Manasia, Dy. Chairman, Puhpa Nahlô Solo, EM i/c Rev. etc., Puhpa J. Beikiasa, EM i/c SW etc., Puhpa N. Lalrosanga, Vice Chairman (Plg.) zy ahlao ei ta, official lâ tawhta Pihnô S. Lalmuanpuii, Dy. Secy. (Fin.) nata Puhpa Beirôkhu Beitâ, I & PO zy amâ hlao.
(Source: I & PO, MADC)