TIPA, 11 Chhiepa, 2022, Pachynoh – Atanoh dawh 1:00 PM kha ta 12th Term MADC General Election liata Tipa-1 bia tawhta atlypatlohpa MDC Puhpa S. Lalremthanga, EM i/c PWD etc. alykheina hneipa a châ.
Programme he ECM T. Salem Awnano Hall liata hneipa châ ta, Machâ T. Vannghinga ta chhihtha ta, Machâ S. Zaluaia, Awnano Hyutuhpa, ECM T. Salem ta Hlazy 37, Mathai 7:12 nata Ephesi Mozy 2:10 tawhta Khazohpa Biehrai Pathaihpa reina nata reipakawhna hneipa ta pavaosana thlahchhâ a hnei.
Chairman ta Puhpa S. Lalremthanga biereina nata alynabie reina daihti hmâ awpa hrua ta, ary liata palâsapa he a bierei tlâhpi viapazy a châ:-
Atanoh Abeipa lâ alynabie reina programme miah ahlaopazy hnoh ta palôh hmeiseihpa ta alynabie ei reih.
Khazohpa ta hmoto châta daihti a rao vâta, hlaotloh daihti, hlaotloh lei daihti a y tyh. Hlaotloh awpa khopa ta tiama papua chyu pi ta, achuhaipa nata ku raihriapazy chhao, eima lâpi chyu liata hlaotlohna a tei chyupa eima châ.
Kei chhao râh chhihthana kyh liata hlaotlohna teipa ta lâpi rairu kawpa a vaw chhih lymâ na ta, chahawhna chô chata kô 10 tlai râh chhihthana liata ei vaw pahâ hapa a châ.
Hlaotlohna ahneituhpa deikua Khazohpa châ ta, Ano ta na chhihtha lymâ ta, atahmâ 12th Term liata hlaotlohna eina piepa a châ; Abeipa hnohta alabie ei reih chanei.
Party to ta Election daihti liata Khazohpa aly tlâh a châ leipa eima tao tlamawpa hmozy a y ngyu thei; khih/vaih thokha lia cha ziza pha kawpa ta Election zy eima hnei thei nawpa ta Awnanopazy ta election chy ta Salvation camping & crusade zy miah taopa ei ta, reipasaona vâta Awnanopa ta tao awpa nata tao lei awpazy miah ama pachu/chhohiapazy cha election daihti liata hmâ arairu kaw tyhpa a châ.
He alyna programme he Chhôhkha lâ tawhta tao patoh awpa khoh kaw taraw pi ta, anodeikua Siaha (HQ) liata sawhkhâ hmo tao awpa a y chielie vâta atanoh ataopa châ pi ta, pachâthaina eimâ hawpa a châ.
Atanoh Abeipa lâ alynabie reina daihti lia he ta eima bia liata kyhpachâna chôta vote sôh kawpa nâ pie tuhpa bia zawpi zydua hnohta alynabie reih na ta, Unit & party worker zy, thapasana chôta achhô azâ nâ buakhei tuhpa zydua hnohta alynabie reih na ta, thlah khâ nâ chhâkheituhpa Awnanopazy hnoh ta alynabie ei reih.
Election vaw chhâ ta, Khazoh ngiachhiena vâta MDC châta atlypatlohpa ngâlâh dei châ leipa ta ryureina dyuchai rônah kawpa liata atyuh thei hra awpa ta EM châna nâ pie tuhpa Khazohpa hnoh ta alynabie ei reih.
MADC ryureina liata ei tyudua daihti lia he ta Khazohpa liata apahnieh lymâ aw na ta, ryureih awpa ta thaina sona ahnei leipa ei châ vâta, Khazohpa liata thlah na chhâ khei awpa ta ei châ haw ei.
Ti nata râh châta keih chakâ tah, hmialâ eima sie lymâ nawpa liata zawpi zy deichhyna peimawh na ta, eima ti nata râh châta hmo phapazy pachâ khoh ei si la, eina pasopakâ lymâ awpa ei chi ta bia zawpizy châ haw ei na ta, ei cha hrua hmeiseih ei.
Election daihti liata reikah ei saomâ lei vâta bia zawpizy palôh eimâ pasasa hapa hluhpi a y chielie aw, Khazohpa moh ta pachâthaina ei châ haw hmeiseih ei.
Eima bia hmahsie nawpa châta ei theina hawhta hria lymâ achhuah na ta, MDC Fund chhao apha thei chaina hawhta hmâ ei chhuah lymâ aw.
Mo pakha, chhôhkha, Awnanopa nata khitlâh ta Khazohpa liata eimâ pahnieh awpa he apeimawh hmeiseih, eima khitlâh hro a vaw pha via heih thei nawpa ta kô kha liata ei kha chhâ Thyutliazy châ ta Salvation Camping pachhuahpanoh tyh awpa he ei thlahchhâna a châ.
Political Party apanoeihna he eima râh, khitlâh nata chhôhkha a parao kawpata ei pahno tyh, chavâta he hawhpa hmo he eima zydua ta pahlei eimâ chhuah awpa he apeimawh hmeiseihpa a châ.
Political Party MDC nata EM châ leipa na ta, a râh pôpalôhpa leader hawhta nâ pyh u la, abyuhna liata eina pasopakâ khai awpa ei chi ta ei châ haw ei.
Puhpa S. Lalremthanga he Puhpa Nahlo Solo, EM i/c Rev. etc., ta zi ta, MADC PWD liata officers & staff nata, MADC I & P Department tawhta I & PO nata staff zy ta ama chakaochahlâ thei hra.
Puhpa Nahlo Solo, EM i/c Rev. etc. nata Puhpa S. Lalrokhuma, Secretary, MNF District HQ, Siaha zy ta biereina daihti ama hmâh.
Puhpa F. Lalrintluanga nata Puhpa C. Chawngthantluanga zy ta hlasapa ta zawpi ama palôhpahawh.
He alyna programme liata Zawpi thlahchhâna hneipa châ ta, daihti chhâna lâ liata Puhpa T. Lalzidinga ta vote of thanks a rei khai tawhta Zisu Krista thlahchhâna ta alyna programme he pachhâsapa châ ta, chhôhkha lâ tawhta alyna kyhchhi amâ chhuanohpa cha aly kawpa ta dôh chyupa a châ.
(Source: I & PO, MADC)