SIAHA, 14 Chhiepa, 2022, Hriaheinoh – Atanoh dawh 12:00 Noon kha ta Saikao Bazar Shed liata Saikao Bia tawhta 12th Term MADC General Election liata atlypatlohpa MDC Puhpa Beihruakhai, Executive Member i/c Agri. etc. cha Saikao khihtlâh ta alykheina nata palyupalihna ama hnei.
Puhpa Beihruakhai nata a lahpinô Pihnô Angely Hlychho zy hleikhô ta MADC Officials nata MNF District Headquarters, Siaha tawhta azipa zydua, Pawpi ri pa-ao khaipa ta arônah kawpa ta vaw dy ei ta, “SAIKAO (TLÔSAI) KHIHSAW ZYDUA TA
EIMA CHÂ VAW LY” tahpa nata “Mararâh châta, na theina zydua na hmâ lymâ awpa ta
khokheina eima cha hlâ” tahpa châbiezy banner liata ropa ta Saikao khih liata amâ vaw lyna nata khokheina zy ama vaw palâsa.
Public meeting liata Programme pha kawpa taopa châ ta, Kmc. Az. Beirarôna, Chairman, Joint VC Saikao ta chhihtha ta, Rev. Z. Hrohmô, CCI (M) Saikao Biatuhpa ta Biehrai pathaihpa Athaona 49:10 tawhta reina nata thlahchhâna hneipa ta programme pavaosana a hnei.
Kmc. NT. Thatlua, Ex-MDC & GS, MNF District HQ, Siaha ta hmia pahnosana hnei ta, he khai tawhta Puhpa Beihruakhai biereina hnei awpa ta daihti piepa châ ta, ary liata palâsapa he a bierei tlâhpi viapazy a châ:-
- Atanoh liata noh nata daihti pha kawpa miah pie tuhpa eima Beipa Khazohpa hnoh ta alynabie ei reih.
- Programme pha kawpa avaw patohpatia tuhpa khitlâh nôpawpa – Saikao Joint VC zy hnoh ta alynabie reih na ta, avaw hlao theipa Pastor & Awnano nôpaw zy, VC zy nata NGO zy hnohta alynabie reih na ta, Teachers, Health workers, Nurse nata School hawtizy hleikhô ta he alykheina su liata avaw hmaohpakhypa zawpi zydua hnoh ta alynabie cha hlâ ei na ta, he hawhpa palyupalihna he ei phuh leipa, hrochhôh ei tyh khao vâ ma tah thei awpa a châ, ei châ ly hmeiseih ei.
- MADC officials,
Party liata hrialâhpazy, Tipa, Lawngtlai nata Rulkual khih lâ tawhta avy theipazy hnoh ta alynabie reih na ta, Saikao Welfare Committee, Siaha nôpawzy hnoh ta alynabie ei reih. - Election no ta party to ta eimâ phana rakha ta vaw campaign chyu pi ta, keimo eima duahmo nata khihsanazy pachâpa ta cha, aru tah na ta, election chatôh awpa kha ei ngiaroh kaw; anodeikua vâhnei chhih kawpa ta keima he vaw tloh na ta; ei tlohna chhâpa cha Khazohpa vâ deita a châ.
- Kei he palôh charâ kawpa chyhsa ei châ; ei lahpinô nata ei nô & paw zy thata ei na chhorei tyh ei. He hawhta ei duahmo a châ vâta ei tloh leina hluhpi liata na deichhypa ta eina pasopakâ lymâ awpa ei chi ta ei bia zawpizy ei châ haw ei.
- Election pai ha ta, party party tah khao leipa ei si la, MNF Party ngâlâh dei tah hra leipa ta, Saikao bia châta ei theina hawhta rai hria aw na ta, nôpaw hmiatuapazy rai chhâhchabâhpazy hria pazao lymâ ei chhuah. Khitlâh nôpaw VC nahzy chhao, party party tah leipa ta VC to ta Saikao khih hmahsie nawpa ta keih chakâ khoh awpa cha hrua ei na ta, NGO nah zydua nahta chhao, khitlâh pha nawpa tahpa ta apha kawpa ta hrialâh awpa he ei khopa châ ta, ei bia chhôh liata MTP Branch, office ahnei leipazy chhao ama vaw hnei chyu thei nawpa ta mokhei lymâ a chhuah na ta, MCHP & MSO zy chhao ei theina hawhta baokhâ lymâ ei chhuah.
- Saikao bia liata Sawhkhâ rai hriapa zydua, Saikao bia hmahsie nawpa châta coordination pha kawpa tao lymâ a chhuah na ta, Education hmahsie via nawpa pachâpa ta School building zy chhao, a pha viapa eima hnei thei nawpa ta ei theina hawhta hmah la lymâ ei chhuah.
- Awnano lâ chhao ta, athlachhie leipa ta na chhorei u la, bia châta raihriana kyh liata Khazohpa khozie hawhta lâpi dopa ei chhih thei nawpa ta thlahchhâ eina bao lymâ awpa ei chi ta ei châ haw ei.
- Saikao pangaina Lâpi he pha lei kaw ta, he vâta Puhpa Zoramthanga, CM ta miah taopa awpa ta bie â taihpa hapa hawhta Aizawl lâ alaichadaipa ta ei theina hawhta hmah la lymâ ei chhuah.
- Bia hmahsie lymâ nawpa kyh pachâpahmaoh tah, reikhoh awpa ta Thla 1 liata ei 1 chhâ ei bia tly lymâ ei chhuah aw.
- Saikao zawpi, nama ngiachhiena nata kyhpachâna zy he my beih leipa aw na ta, hmialâ ei sie lymâ nawpa liata nama deichhyna nata thlahchhâ kheina ei ngia lymâ awpa vâta rie einâ vaw thei lymâ awpa ei chi ta châ haw ei na ta, nama zydua hnoh ta palôh hmeiseihpa ta alynabie ei cha hlâ chanei ei, ei châ ly kaw ei.
Chairman ta biereina chyupa daihti pahy ta, Saikao khih zawpi vyuhpa ta Revd. JR. Sanga ta biereina chyupa hnei ta, MNF District HQ, Siaha vyuhpa ta Puhpa C. Lawbei, Ex-MDC & Adviser ta biereina chyupa daihti a hmâh.
Puhpa Beihruakhai, EM nata a lahpinô châta Rev. AZ. Beirôna, General Secretary, CCI (M) HQ : Saikao ta luh chahnaopa ta Khazohpa lâ pavaosana nata byhnâ hiana Thlahchhâ kheina a hneipa ei.
NT. Vabeido nata Saron H. Priskilla, Artiste zy ta hlasapa ta zawpi ama palôhpahawh.
Machâ JH. Rachhua ta Vote of Thanks reina hnei ta, Machâ K. Hakhai, Chairman CCI (M) Lorrainville ta Programme khawna thlahchhâna a hnei. He khai tawhta azi lâ tawh nata chhôhkha lâ tawhta Vao sâ 5 ta alyna kyhchhi amâ chhuanohpa cha aly kawpa ta dôh chyupa a châ.
Puhpa Beihruakhai he MADC Officials tawhta Puhpa Vabeikhaihmo Solo, SCO, Puhpa JH. Beihnai S&YO, Puhpa Robertson B. Khithie, AHO, Puhpa Beirôkhu Beitâ, I & PO, Puhpa T. Beihronga, ASCO, Pihnô Teresa Syuhlô, PA to EM(Agri), Puhpa T. Pabua, Cameraman, I&PD zy ta zi ei ta, MNF District HQ, Siaha tawhta nôpaw hluhpi ta zi ei ta, Saikao Welfare Committee, Siaha nôpawzy hleikhô ta, Tipa, Lawngtlai, Rulkual tawhta chhôhkha nata party nôpawpazy ta ama vaw zi chyu hra.
(Source: I & PO, MADC)