SIAHA, 9 Thlarâh, 2022, Chutynoh – Atanoh kha MTP Gen. HQ, Siaha tawhta vyuhtuapa Gen. HQ OB pa 3 nata Executive Member pakhazy ta Beinô Chavah liata apiepasi hapa St. B. Rozamliana ri tluahaipazy atyuduakhei awpa ta Tipi Ferry lâ ama sie.
He nahzy hleikhô ta atanoh ri tluana lâ sie awpa ta MTP Gen. HQ tawhta ahawpa Siaha Town MTP Branch – Meisavaih East, ECM Vaih nata New Colony-III zy tawhta chhituhpazy nata member zy pahlypa ta manôh 20 hlei sai ri tluana lâ he sie thei khai hra ei ta, Tisôpi Branch, Old Tisopi Branch nata Thosaih Branch zy tawhta vyuhtuapazy ta veiseih palôhâh kawpa ta ama sie chyu thei hra.
MTP Gen. HQ OB tawhta Puhpa C. Mochônô, AGS, Ls. Golden Mary Solo, Treasurer, St. BeiRôkhu Beitâ, Secy. i/c Information & Publicity, Puhpa H. Vabeikhai, Executive Member zy sie ei ta, Tipi Ferry liata ama peimawhpa Dal Bag 1, Dispo. cup tlai 10, kâchhao râhpa 2kg, Alôh 4kg, Tea leaf 5 pack, Frooti 2 case nata Mineral water 2 case zy MTP Gen. HQ moh ta ama hlâ pâ hra.
MTP Gen. HQ nôpawpazy he ta Puhpa B. Lalhmingliana (St. B. Rozamliana Paw) pahrâna O liata thlahpalôhna biereina nata thlahchhâna daihti ama hmâh hra.
Atanoh pyly he ta Siaha INC Working President Puhpa N. Chakhai nata a hrialâhpazy ta zâ tydua khei hra ei ta, MSO Gen. HQ: Siaha tawhta Puhpa JB. Rôna, President nata a hrialâhpazy ta azâ tyuduakhei hra ei ta, CYLA tawhta Vice President nata a hrialâhpazy hleikhô ta Chawnhu YLA Branch President nata ahrialâhpazy ta Tipi Ferry khichhôh liata MTP RV taopa lâ vaw tlypa ta amâ vaw tyuduakhei hra.
NGOs zy hleikhô ta private ta asiepa hluhpi y ei ta, cha hry liata Puhpa A. Thazi, Ex-President, MTP Branch: Siaha, Puhpa KT. Beimokhai, President, MTP Branch: Council Vaih nata ama viasazy ta deichhyna hmosai piepa chhao ta ama zâ tyudua khei thei hra.
St. B. Rozamliana ri tluana he MTP Sub HQ: Amôtlâh nata MTP Branch: Tipi Ferry zy chhihthana ry liata siekheipa châ ta, MTP Dâh & Chhihthana 2016 bie hawhta noh 7 tlua awpa châ ta, atanohpa chhao ta noh 5 tlua hapa a châ.
Atanoh liata MTP Sub HQ: Amôtlâh ôna chhôh liata Thiahra MTP Branch tawhta manôh 50 zy ta ri tluana lâ za siepa ta ato zabuakhei ei ta, RV liata Tipi Ferry Branch nôpawpazy nata Amôtlâh Sub HQ nôpawpazy rai chhao Thiahra MTP zy he ta baokhâpa ta ama chakuchavei pâ khai hra.
Ri tlua ngâhaipa he hmôpa a châ thei nawpa ta Awnanopazy ta thlahchhâna liata athei chyu awpa ta eimâ haw hmeiseih.
Sd/- SECRETARY
i/c Information & Publicity
MTP Gen. HQ: Siaha.