SIAHA, 12 Thlarâh, 2022, Hriatuanoh – Atanoh kha târi 6.9.2022 pa ta Tipi Ferry khihsaw bâlu lana – khih tawhta Km. 10 a hlapa Beinô Chavah liata apiepasi hapa St. B. Rozamliama ri cha noh 7 chhôh tluapa a châ tawhta hmôpa a châ lei vâta pachhâsapa ta akhawna daihti hmâpa a châ.
Khawna programme he Puhpa B. Lalhmingliana (F/o Rozamliana ‘L’) O, Tipi Ferry liata hmâpa châ ta, Puhpa H. Beiralua, President, MTP Sub HQ: Amôtlâh ta a chhihtha.
Machâ K. Zosanga, Awnano Hyutuhpa, ECM Tipi Ferry ta Devotion hmâh ta, Puhpa C. Rorelliana, President, MTP Branch: Tipi Ferry ta ri tluana dâh tlâhpipa report a pie.
He khai tawhta taokheina châta aduah hmah ta minute sâkha achalihpa a châ tawhta Machâ C. Biaksanga, Local Chairman, ECM Tipi Ferry ta thlahchhâna a hnei pazi.
Puhpa T. Beikhokhei, GS, MTP Sub HQ: Amôtlâh tawhta ari tluana dâh tlâhpipa report nahthliepa châ ta, mo pakha nata py moh ta baona angiapa zydua nata Siaha nata Lawngtlai District zy tawhta nohchareih ri tlua awpa ta avaw tlôpazy report sianô kawpa pie ta, baona, sôh lâta avaw ngiapa zydua Rs.1,90,350/- liata Rs.86,480/- cha hmâpa châ ta, alaipa Rs.1,03,870/- cha Laihsa Eden Khuhly, Treasurer, MTP Branch: Tipi Ferry ta athihpa chhôhkhazy hnoh ta a hlâ.
He liata biatuhpa MDC Puhpa HC. Lalmalsawma Zasai, Hon’ble Dy. CEM, MADC, Siaha ta biereina chyupa nata taokheina bie reina hnei ta, Puhpa F. Lalrothanga, Vice President, CYLA, Lawngtlai nata Puhpa PP. Zalena, President, MTP Gen. HQ: Siaha zy ta biereina chyupa hneipa ta taokheina bie ama reih chyu hra.
Athipa chhôhkha lâ tawhta Puhpa B. Lalhmingliana, F/o St. B. Rozamliana (L) ta athipa thâtih tlâhpipa reih ta, alynabie reina daihti a hmâh.
Machâ PS. Ngohra, Secretary, ECM Tipi Ferry & VC Secretary ta Awnano nata khitlâh zawpi vyuhpa ta alynabie reina chyupa âki kawpa ta a reih.
Atanoh he biatuhpa MLA Dr. K. Beichhua, Minister MoS vyuhpa ta a viasanô Dr. H. Zochhuanawmi ta he khawna programme he hmâkhei ta, baona sôh Rs. 10,000/- a vaw hlâ.
Puhpa M. Manasia, Dy. Chairman, MADC, Siaha, Puhpa N. Chakhai, Working President, MPCC Siaha nata Lawngtlai nata Siaha tawhta Officers nata Party nôpaw hluhpi ta he daihti he hmâkhei awpa ta ama sie chyu hra ei ta.
MTP Gen. HQ tawhta Puhpa PP. Zalena nata a viasa, a hrialâhpa zy ta khawna progranme he ama hmâkhei hra.
MTP Sub HQ: Phura nata Saikao ôna chhôh liata Beinô ahniapa liata ypa Branchzy MTP veiseih palôhahna biepipa chabapa ta Beinô kao lia ri tluapa, atanoh taihta pahno thei awpa ta social media siepahliepa ta, nama raihria hmô theipa ta y ngâthlâhpa he ta Mara Thyutlia Py cheihchalo ta, MTP Gen. Headquarters tha a patlô hmeiseih; MTP Gen. HQ tawhta nama y na chyu liata Atanoh closing programme he thlachhana ta hmâh tah, khaw chyu awpa ta eimâ pahnosapa hawhta eima tao chyupa vâta MTP Gen. HQ mohta alynabie eima cha hlâ.
(Source: BeiRôkhu Beitâ, Secretary i/c Information & Publicity, MTP Gen. HQ: Siaha.)