SIAHA, 21 Di, 2022, Pakhynoh – Atanoh my dawh 11:00 Am pa ta Environment & Forests (E & F) Department’s Conference Hall, MADC Complex liata atakô chhôh châta MADC ry liata Office zy khawna “Closing Programme” daihti ahmâpa a châ.
Puhpa K. Chhihrau, Executive Secretary, MADC ta chhihtha ta, Puhpa P. Tluasa, SE (PWD) ta Bible Reading & Prayer daihti a hmâh.
Puhpa N. Viakhu, Hon’ble Chairman, MADC ta Biereina daihti hmâh ta, “thla 6 chhôh MADC nôpawpazy ta MADC ry liata sawhkhâ rai ahriapazy palôh pachhiena nata zawpi palôh eima pasasanazy liata ngiathai ahawna châ haw ei na ta, kô asie hapazy my hapa ta Christmas & Kôthiehpa apha ngaita kawpa ta hmâ thei awpa ta achhuanoh chyu awpa ta khokheina ei cha hlâ ei” tahpa a reih.
Hon’ble Chairman chata MADC ry liata officers & staff zy cha aparao tuhpa châ leipa ta, ataopathi tuhpa châ achhuah chyu awpa ta pasyuna bie reih ta, department to liata Discipline & amohôhna ama siekheipa kyh liata reithai tlâh ama châzie reih ta, avy heih, vawh heih atahpa Executive zy he a guide tuh phapa châ achhuah chyu awpa ta ahaw ta, Phusâ hmâna kyh liata asohsi ngaita kaw awpa ta ahaw ta, Mararâh châta raihriana kyh liata MADC ry liata officers & staff zy ama peimawhzie reih ta, MADC he atahmâtahpa hlâta apha viapa ta sie thei awpa ta phahnai ngiah kawpa ta hria achhuah chyu awpa ta ahawna a tao.
Ziza pathaih kawpa ry liata Christmas & Kôthiehpa hmâ thei awpa a hnabeiseih vâta â ly zie reih ta, Christmas & Kôthiehpa alypa nata thapha kawpa ta hmâ chyu awpa ta MADC ry liata sawhkhâ rai hriapa zydua khokheina a hlâ.
Atanoh liata office khawna programme ahmâpa a châ tarawpa ta sawhkhâ hmo peimawhpa tao byuhpazy cha amaohphaohna chabapa departmentzy ta abyuhna nata ângiahna hawhta office kia awpa ta Puhpa K. Chhihrau, Executive Secretary tawhta pahnosana taopa châ ta, mylâ târi 22.12.2022, Pobienoh he Office kia khai awpa ta pahnosana bie a phuah hra.
Closing Programme ahmâpa liana he ta Zawpi thlahchhâ paraohna hnei pâpa châ ta, akhawna châta zawpi ta Abeipa thlahchhâna reipa ta closing programme he pachhâsapa a châ.
MADC ry liata office zydua pahyna châta târi 9 Nawh, 2023, Hriatuanoh liata official Opening Programme ahmâ heihpa châ aw ta, office deikua târi 6 Nawh, 2023, Chutynoh tawhta kia pathao awpa a châ.
Source: BeiRôkhu Beitâ, I & PO, MADC