Goshen moh y-zie tlâhpipa – Rev. B. Beilua
(Goshen Local Church moh bietuhpa: Rev. B. Beilua, Moderator Elect chhopasiana khaihna tawhta – 14.02.2021)
Goshen (Gen.45:10) tahpa he Mongyuh reih ta cha: “Land of comfort and plenty” tahna zy châ ta. Izi râh liata Goshen he chhaohlei phana râh (fertile land) a châ.
Zawsi & Phirao siepahliepa ta Khazohpa ta A chyhsa, Israel saw nah pahrâna awpa ta a pie eih-hrâhpa râh a châ. Mara reih lâta Goshen tahpa yzie zy cha:-
Râh phapa, râh khochhihpa, ngiaryh chhihpa râh, thlahlôh chhihpa râh, vânohsahlâh tohna râh, sawteih-nawhteih phana râh, Izi hriena hrita a ôpha leihna râh (Ex.8:22-24; 9:26), sibie panyuhna & thlihua phana râh, hmipha sâseihna râh, chicheih bialo phana râh etc. tahpa zydua he a pahly khai thei aw.
Zawsi ta a paw Zakaw nata, a uhnawh, chhôhkha zy Goshen râh liata a pahrâsana chhâpa zy cha (Gen.45:10-11):
- “Ano kiahpâh liana tlai ta a pa y-sa khoh vâ ei ta”
- “Ano ta a pasa, mohôh khoh vâ ei ta”
- “Rietheipa ta ama y pathlei lei n’awpa ta”
Tanoh, keimo châta thlahpa lâ liata Goshen râh duasu & yzie awpa cha: “Khazohpa kiahpâh liata y peimawhna zy; Khazohpa vaina, pasana & mohôhna to awpa peimawhna zy nata, thlahpa hro chakâh leina” tahpa zy a pahly khai tah thei’pa a châ.
Goshen moh phaotuhpa awnanopa manôh zy ta, ama moh phaona chhápa hawhta Abeipa ta khâ y pâ ei sa la, tha patlô ei se! 🙏🙏🙏