SIAHA, 3 Pamih, 2023, Chutynoh – Târi 2, Pamih, 2023 liata Puhpa M. Laikaw, CEM, MADC nata Satlia Delson Nôtlia, BJP National Secretary, Minority Affairs zy atlâboh kawpa ta New Delhi ama tlôpa cha Indira Gandhi International Airport, New Delhi su liata MSO Joint Headquarters, Delhi zy ta CEM zachhihpa he pawpi chhao ta arônah kawpa ta ama vaw y dy.
Pamih 4, 2023 he ta Puhpa M. Laikaw, CEM, MADC ta MSO Joint Headquarters, Delhi zy châta pati nie achhuanohpa aw ta, apakyhna daihti chhao ama hnei aw.
Pamih 1, 2023 pa khata Puhpa M. Laikaw, CEM, MADC nata Satlia Delson Notlia zy ta Assam Chief Minister Puhpa Himanta Biswa Sarma cha a pahrâna O, Guwahati liata ahmô ei ta, Guwahati liata Mara Tribal Hostel nata House sa nawpa râh zy reikhei ei ta, Assam Chief Minister ta thlai ta he hmo he pasia awpa â chhua zie a chho ei.
Guwahati liata ama châh chhôh ta Puhpa M. Laikaw, CEM ta MSO Guwahati Branch zy thopi dokheina hnei ta, apakyhna daihti pha kawpa amâ hmâ khai tawhta MSO Branch Guwahati hnohta baona a chyhta hlâ pâ ei.
Hmypi 28, 2023 pa ta MSO Joint Headquarters Aizawl chhihthatupazy chhaota Puhpa M. Laikaw ahmô ei ta, ama hmo byuhpazy ama tlôkhei hleikhô ta, MSO Joint HQ: Aizawl ta Puhpa M. Laikaw nata Satlia Delson Notlia hnohta hmosai piena ama hnei.
MADC CEM zachhihpa Puhpa M. Laikaw he BJP Headquarters, New Delhi zy ta ama awna hawhta, atahmâ he Delhi liata a y ngâno châ ta, he daihti he hmâ pahnaipa ta Central Minister nano nanopa zy â daoh pâ aw.
(Source: I & PO, MADC)