SIAHA, 15 Khihpa, 2023, Pachynoh – Atanoh dawh 3:00 PM khata DMS Hall, District Hospital, Siaha liata District Hospital, Siaha ta Kayakalp 2022-2023 ataopasuana liata 1st Prize nata Kayakalp 2022-2023 Eco-Friendly ataopasuana liata sânona lymâ lana alyna programme liata Puhpa M. Laikaw, Chief Executive Member, Mara Autonomous District Council cha khichhai laipa (chief guest) châpa ta programme â hmâkhei ei.
Programme he Laihsa H. Vanlaltluangi (VLi) ta chhihtha ta, Rev. P. Riabi, Chaplain, DHS ta devotion â hmâh.
Puhpa M. Laikaw, CEM, MADC chata, Mawrâh pôhpalôhpa Kayakalp ataopasuana liata District Hospital, Siaha ta sâkhana (1st Prize) eima la theipa he ei ly hmeiseih, tahpa ta a reih.
“District Hospital, Siaha liata hriapa Dawhty, Staff zydua nata Siaha District zawpi hriaparaohna vâta he lymâ a la theipa châ pi ta, ei ly hmeiseih,” tahpa ta CEM ta a reih.
“Mongyuh bieso ta “Prevention is better than cure” a tahpa hawhta âvaihna hnei phapa he peimawh kaw ta, hriaparaohna phapa hneipa chhao a peimawh ngaita kaw. Chahnaihta, Awnanopa, NGOs, MADC zy heta pathaihna kyh lia heta tiama papua via lymâ ta, pathaihna eima pachâ peimawh via lymâ awpa he a peimawh ngaita kaw,” tahpa ta CEM ta a reih.
CEM chata, “Zawpi châta nâma hriapasana he tiama papua ta, nama hria via lymâ heih awpa ta châ haw ei na ta, Kayakalp liata lymâ nama la pazao heihpa a châ khiahta la, MADC ta alyna programme eima cha taopa aw ei,” tahpa ta a reih.
Dr. K. Beichhua, MLA, guest of honour chata, pasyunabie pha kawpa reina hnei ta, District Hospital, Siaha ta pathaihna ataopasuana liata sâkhana (1st Prize) eima la theipa he aly â chhih hmeiseih, tahpa ta a reih.
“Kô 30 a khô hapa liata eima duasuzy za sai paliepa ta, Khazohpa ngiachhiena vâta he hawhpa duasu liata eimâ vaw duah theipa he aly â chhih hmeiseih,” tahpa ta guest of honour ta a reih.
Dr. C. Lalrosanga, DMS chata, report piena hnei ta, pathaihna, etc (Kayakalp) ataopasuana liata District Hospital, Siaha ta 1st prize eima la theipa he staff zy hriapasana vâ nata Siaha District zawpizy hriaparaohna phapa vâ deita na a châ e, tahpa ta a reih.
Pihnô P. Chaki, President, MCHP HQ, chata, biereina hnei hra ta, Mawrâh pôhpalôhpa liata sâkhana lymâ eima vaw la thlâh hapa he aly â chhih hmeiseih, tahpa ta a reih.
“District Hospital, Siaha liata hriapa zydua nama hriapasana liata alynabie ei cha hlâ hmeiseih ei, tahpa ta President ta a reih.
Pihnô P. Chaki chata, MCHP, HQ vyuhpa ta District Hospital, Siaha ta Mawrâh chhôh liata pathaihna ataopasuana liata sâkhana ama lapa alykheina châta sôh a hlâ pâ hra ei.
Laizaitinthangi, Rambawiha nata B. Priskili zy ta pahnie kawpa ta hlasapa ta zawpi ama palôhpahawh.
Dr. Jeremy V. Pachuau ta vote of thanks reina a hnei khai tawhta daihti pachhâsapa a châ.
Source: I & PO, MADC