SIAHA, 18 Thlazoh, 2023, Chutynoh – Atanoh dawh 12:45 Pm kha ta MADC Library O tlô thiehpa cha Puhpa M. Laikaw, Hon’ble CEM, MADC ta zawpi hmâ thei awpa a pahy.
He Library O tlô thiehpa he College Vaih liata DIET Building parohpa a châ.
Programme he Pihnô Nazee Khaila, A&CPO, MADC ta chhihtha ta, Lorrain English School studentzy ta Mara pho hla “Thyu u la Marasaw hmialâ pangai suh vy” sapa ta pahyna hla ama sa.
Rev. Dr. FC. Beicho, New Siaha biatuhpa cha thlahchhâna daihti hmâpa ta Library châta byhnâ awna hnei ta, Puhpa K. Laitha, Research Officer & Librarian ta ama department hmahlana report a pie.
Khichhai laipa Puhpa M. Laikaw, Hon’ble CEM ta biereina daihti chyupa hmâh ta, “Khazohpa ta pachutuh awpa ta athai viapazy miah pie ta, athai viapazy châ rohpa tawhta Khizaw thaisona kyh eimâ chu tyhpa a châ. Krizyhpazy pi ta nohchareih eima nie awpa cha Khazohpa bie a châ. Chahawh pyly ta khizaw thaina sona asosâh lymâpa liata eima pahnona zy a kawh lymâ thei nawpa ta Library he chhaichhi peimawh ngaitapa a châ.”
“Chipho asosâh viapazy ta Library he ama pachâ peimawh lymâ. Keimo Marasawzy chhao pi ta châbu eima rei chiehpazy cha mo hropazy châta byhnâ eima châ thei nawpa ta Library liata donate (pie) lymâ ei suh u.”
“Art & Culture Department ry liata Library he vaw y ta, Marasawzy pi ta MADC eima hmôna chhâpa peimawh ngaitapa cha Art & Culture he a châ; eima Art & Culture he chipho ta miah taotuhpa, eima identity/ngiana peimawh kawpa a châ.”
CEM chata atanoh liata Lorrain English School hawtizy ta Library pahyna hla châta Mara Pho hla “Thyu u la Marasaw hmialâ pangai suh vy” tahpa ama sapa cha reithai tlâh ama châ tah ta, hawtizy hleikhô ta ama Principal nata a hrialâhpazy hnoh ta alynabie reih ta, atanoh liata pahypa Library O thiehpa he Marasaw châta byhnâ vaw châ lymâ awpa ta khokheina nata byhnâ awna bie a reih.
Daihti chhâna liata Puhpa HC. Lalawmpuia, AA&CPO ta vote of thanks reih ta, zawpi ta Bei Zisu thlahchhâ pachupa reiparaohpa ta programme he pachhâsapa a châ.
He Programme liata Teacher zy hleikhô ta MSO Gen. HQ, Mara Writers Club nata Chhimtuipui Academy of Letters leader zy hleikhô ta hruaeih hropazy ta amâ hlao.
Siaha District Library he Mizoram sawhkhâ ta kô 1972 pa ta a paduapa châ ta, kô 1994 liata MADC ku liata hlâpa ta he rakha tawhta MADC Art & Culture Department ry liata mohôh lymâpa a châ.
He Library O tlô thiehpa he DIET Building parohpa he, DIET Building thiehpa, Siahatlâh vaih lâ ta pasiepa a châ hapa vâta a parohpa he Puhpa M. Laikaw, CEM zachhihpa nata Department atotuhpa Puhpa K. Hrahmo, Hon’ble EM i/c Revenue hmahlana ta atliata liata MADC lâ hlâ pakhua hapa a châ.
CEM zachhihpa he ta Library pahy hlâ liata MADC Art & Culture Department Museum a tly pâ hra.
(Source: I & PO, MADC. PRESS RELEASE NO.104/2023)