SIAHA, 19 Thlazoh, 2023, Pachynoh – Atanoh kha Siaha District Basketball Association (SDBBA) pachhuapanohpa 1st Inter School Basketball Tournament closing ceremony cha Siaha College campus liata ahmâpa châ ta, he liata Puhpa MH. Tiabi, Hon’ble Executive Member i/c School Education (Middle) cha Chief Guest châpa ta programme â hlaokhei.
Guest of Honour châta Puhpa T. JB. Rona, President, MSO Gen. HQ hruapa châ ta, a hrialâhpa Puhpa John Tennyson Tlapyu, Fin. Secy. nahta amâ hlao thei hra.
Programme he Pihnô Rebecca Kompa, Fin. Secy. SDBBA ta chhihtha ta, Brother Kyrbasius SDB, Vice Principal, Don Bosco School, Siaha ta devotion hmâh ta, Puhpa H. Vabeitha, President, SDBBA ta welcome speech a reih. Samuel T. Rochamliana, Asst. Match Commissioner ta Technical Report pie ta, H. Lalrinkima, Match Commissioner ta vote of thanks a reih.
Atanoh liata Chief Guest Puhpa MH. Tiabi, Hon’ble EM bierei tlâhpi viapazy:
- Atanoh nama hmia liata ei vaw dua thei vâta he liata avaw hlaopa, nama zydua chô liata alynabie reih na ta, khizaw hmahsiena achadai lymâpa ta eima râh liata a ei kha nawpa ta Inter-school Basketball Tournament eima patohpatia theipa he aly achhih hmeiseih ta, ei 1 eima tao ha tawhta cha a heihpa a y cheingei aw tahpa sia ta, hmahsiena lâpi eimâ chhih lymâ aw tahna a châ.
- Siku hawtizy achuna liata abao thei awpa palôru lathli hmâna liata Sports he apeimawh kawpa a châ. Achuhaipazy ta sâkhana liata Khazohpa nama chi kaw awpa a châ. Achu haipazy cha châchu nama tiama awpa a châ. Classroom liata eima teacher nahzy ta miah ama pachupazy cha thai khai awpa nata, pahno khai thai awpa châ tyh vei – O lâ liata achu tiama awpa apeimawhpa a châ.
- Kei he MA, Economics Subject a lapa, athai lei kawpa ei châ. Anodeikua thata achu na ta, achuna bu zydua tiama kawpa ta ei chu vâta, text book chhôh liatahpa zydua cha avao khai na ta, Final exam liata question avypa hry liata ei thai leipa rai y vei – ei rei khohpa cha, keimo hawhta chyhsapa châbu – text book taopa he, eimâ chu khiah thai khai theipa a châ tahpa he a châ. Athai thei kawpa, achu hoh tlôh leipazy hlâta cha, hmo hrohriapa pachâ lei tah, châ achu hoh kawpazy he hlaotlohna ama to tyh. Chavâta ahy hmahta hlaotloh lei awpa y v’ei chi – achu tiama awpa na a peimawh chai. Tiama leipa ta hlaotlohna y vei tahpa deikua pahno awpa a châ.
- Kei he, chhôhkha khihsa riethei kawpa tawhta avaw puapa châ na ta, châ abu awpa khoh tlôh hra na ta, Khazohpa liata khâ apahniehpa ta atanoh duasu liata a kaw duah theipa ei châ. Jehova Jire “Abeipa cha nâ vaih tuhpa châ ta, aphahla aw vana” tahpa pahno thlâhna chô ta, Khazohpa abôchhâpazy châta cha khatino rai ta Khazohpa cha keimo ahnia kawpa liata a y lymâ. Hlaotloh awpa nama khoh hmeiseihpa ta nata nama tiama hmeiseihpa ta a cha khiah Khazohpa chata byhnâ a chapie aw ei.
- SDBBA Chhituhpazy chhao Khazohpa ta ypâ ei sala, SDBBA ta namâ ngiahpazy liata eima tao theipa a y khiatala MADC chhao eima thlâh hra na tahpa ei rei khohpa a châ. He Basketball Tournament he ta eima râh liata Thyutliapazy Hmahsiena tlôkhei awpa ta khokheina ei cha hlâ ei.
1st Inter School Basketball Tournament liana he ta school sâ 8 tawhta team 10 pua thei ei ta, atanoh liata Ardee Diamond HSS nata Lalchhuanawma Memorial School Team zy ta Final akhai ei ta, Ardee Diamond HSS team zy ta ama champion.
(Source: I & P Deptt. MADC PRESS RELEASE
NO.106/2023)