SAIKAO, 26 Thlarâh, 2023, Hriaheinoh – Atanoh dawh 1:00 Pm pa ta THYLAI HLYCHHO Memorial Lôbô Saikao liatapa cha, Rev. Az. Beirakaw, General Secretary, CCI (M) ta apahy.
Pahyna Programme he Machâ C. Siacho, Local Chairman, CCI(M) ta chhitha ta, Rev. K. Vabeinochô, ta Abeipa lâta pavaosana Thlahchhâna daihti a hmâh.
THYLAI HLYCHHO Memorial Lôbô cha Rev. Az. Beirakaw, General Secretary ta Aly kawpa ta pahy ta, CCI(M) KTP Branch, Saikao Hlapy ta, Hla ta chakaona ama hneipazi.
Pinô L. Merry, Finance Secretary Thylai Hlychho Lôbô Board tawhta Technical report piepa ta nathliepa a châ.
Moh palâsapazy: Rev. Az. Beirakaw General Secretary, Rev. Phosâ Chozah, ECM Moderator, Machâ N. Zakhai Advisor to CEM, Puhpa L. Beihruakhai, MDC Saikao Biatuhpa nata Machâ I.P Junior zy tawhta Biereina hnei chyupa ta nahthliepa a châ.
He Progamme liana heta Shri Beirahmô Syhly, MDC Laty Biatuhpa chhao â vaw hlao thei hra.
Machâ S. Râlua, Chairman, Thylai Hlychho Lôbô Board tawhta zawpi nata khichhai lâ tawhta, he Programme ahmâkhei awpa ta â vypazy lâta Alynabie reina hnei ta, Programme Chairman ta Thlahchhâna ta daihti pachhâpa a châ.
CCI(M) Local Church, Saikao ry liata Thylai Hlychho Lôbô Board paduapa châ ta, he Board hmahlana vâta pahy theipa a châ.
Kô 1907 Thlarâh, Târi 26 Zâlâ dawh 4:00pm chhaichhyh liana khata, Lakher pioneer Missionaries Rev. R.A. Lorrain nata a lapihnô ta Mararâh liata chhâzaw hrona Thâtihpha chho awpa ta Saikao kaw tlô ei ta, Saikao Beipa Thylai Hlychho ta Chhâzaw hrona Thâtihpha cha Mara sawzy liata chho awpa ta a Ti nata Râh avaw pasaih ta, a vaw pa-ysa ei.
Lorrain ta Mararâh liata Thâtihpha a chho thei n’awpa ta a vaw pasaituhpa /Ochhi a vaw pahytuhpa Saikao beipa Thylai Hlychho áthei thlâh n’awpa ta he Lôbô he pachhuahpanohpa nata pahypa a châ.
Lôbô Pahyna daihti a chhâ tawhta Hrua eihpa zydua châta alyna kyhchhi dôhkhohpa a châ.
(Source: Thylai Hlychho Lôbô Board, Saikao)