SIAHA, 28 Thlarâh, 2023, Pobienoh – MADC Social Welfare Department ta MTP zy ta chhienoh phanoh liata ama hmâ awpa MTP Theme Colour (MTP Flag rôh hawhta taopa) Tarpaulin rai awpa ta ama patohpatiapa cha atanoh my dawh 11:00 Am kha ta Puhpa T. Seido, Hon’ble EM i/c Social Welfare etc. ta raipapuana a hnei.
Raipapuana he E&F Conference Hall, MADC Complex liata programme chyupa taopa châ ta, Pihnô Patricia T. Azyu, Social Welfare Officer ta chhihtha ta, Rev. George B. Solo, Director, FH&CC, ECM ta Luka 4:18-19 reipapuana nata reipawhna hneipa ta devotion daihti hmâh ta, Laihsa Clara K. Melita, 1st runner up, Mara Idol 2021 ta hlasapa ta zawpi a palôpahawh.
He Tarpaulin raipapuana daihti liata Puhpa T. Seido, Hon’ble EM chata biereina chyupa daihti hmâh ta, atanoh liata MTP Branch nôpawpazy, he programme pachâ peimawhpa ta a vaw hlaopa zydua hnoh ta alynabie reih ta, Elected Office Holders, MJA Siaha, MADC Officers, MTP & MSO Gen. HQ nôpawpa, he programme liata ahlao awpa hruana pachâ peimawh ta avaw hlaopazy hnoh ta alynabie a reih.
“Khazohpa ta ryureina eihrâhp miah pie ta, MADC ry liata manôh 2000 hlei tlai nietluana sawhkhâ rai eima hria; atanoh he Mizoram sawhkhâ ry liata aypa châ si la, he manôh 2000 hlei nahzy he ta sawhkhâ rai ama hmô nahta angia vei. Chavâta byhnâ eima tona hnawh MADC he Marasawzy ta eima pasô awpa apeimawh hneiseih.”
“Chahawhta, MADC Social Welfare Department he Department chynawh kawpa châ hrasala Marasawzy châta atanoh taihta a theina rakha ta byhnâ vaw châ lymâ ta, Machâ hlao eima raipa bawlaw chhao he ta byhnâ a châ hmeiseihpa a châ. Sôhnawh eima hmôpa chyh kaw hra sala kô 10 asie hapa liata chi hropazy ama taopa eima vaw hmô tawhta khopasana ei vaw hnei hapa cha atanoh liata Abeipa ta eima thlahchhânazy hlao miah patloh ta, MTP Flag rôh cheingei ta Tarpaulin he Mararâh liata MTP order-pa ta eima vaw patohpatia theipa a châ. He he â zawhna lia maih ta MTP Activity vaw palâsa aw ta, Marapazy pillar peimawh kawpa a vaw châ aw.”
“Programme tao khi chhao a châ leipa a châ taraw no ta MTP he Marapazy vyuhpa ta aduahpa châ ta, he MTP Flag eima rai awpa he Mararâh liata eimâ pahnieh chaipa Thyutliapazy nama pahniena Flag a châ hapa vâta keimo Department ta cha eima pachâ peimawh kaw; chavâta he hawhta daihti acha-ie kawna hry liata programme eima vaw taopa a châ tahpa reih ta, MADC Social Welfare Department he ta Mara Thyutliazy tha patlô via lymâ â chhuah” tahpa a reih.
Puhpa Pakhaw Chozah, President, MTP Gen. HQ chhao biereina daihti piepa châ ta, MADC tawhta he hawhta MTP zy hnoh ta anoeihta baona ama vaw hmô heihpa he â lyzie reih ta, paritheipa adyuhna kyh liata MADC nata MTP cha hriaparaoh lymâ awpa a khohzie zy reih ta, MTP Branch zy hnoh chhao ta VC nata EM zy chakachalina zie ta y leipa ta khitlâh châta hrialâh phapa châ lymâ awpa ta pasyunabie a reih.
He khai tawhta Tarpaulin raipapuana hneipa châ ta, Puhpa T. Seido, EM hleikhô ta atanoh liata a vaw hlao hrapa Puhpa Beirahmô Syhly, EM i/c RD, Puhpa C. Chehnei, Dy. Chairman, Puhpa Beihu Nohro, Dy. Chief Whip zy ta MTP Branch zy hnoh ta Tarpaulin he hlâ ei ta, Puhpa Beirôkhu Beitâ, I&PO, Puhpa T. Beihronga, Secy. i/c A&C, MTP Gen, HQ nata Laihsa Clara K. Melita, Artiste zy ta MTP Branch zy hnoh ta ama hlâ hra.
Tarpaulin he MTP Flag rôh hawhta taopa châ ta, Mararâh liata MTP Branch zydua hnohta rai khai awpa châ ta, atanoh liata Siaha Town nata a chheipâh Branch zy rai tuapa ama châ.
(Source: MADC I & P Deptt. PRESS RELEASE NO.137/2023)