TIPA, 30 Thlarâh, 2023, Pachynoh – Atanoh my dawh 11:30 Am kha ta Tipa Bazar Shed chô (Hall) liata MTP zy ta chhienoh phanoh liata ama hmâ awpa MTP Theme Colour (MTP Flag rôh hawhta taopa) Tarpaulin, MADC Social Welfare Department ta ama pachhuapanohpa cha department totuhpa Puhpa T. Seido, Hon’ble EM ta raina a hnei.
Pihnô Patricia T. Azyu, SWO, MADC ta programme chhihtha ta, Puhpa TT. Vakhai, President, MTP Branch: Siatlai ta devotion a hmâh. Laihsa Clara K. Melita, 1st runner up, Mara Idol 2021 ta hlasapa ta zawpi a palôpahawh.
Puhpa T. Seido, Hon’ble EM chata biereina chyupa daihti a hmâpa liata Programme ahlaopazy hnoh ta alynabie reih ta, ama programme chynawh kaw hrasala pachâ peimawhpa ta avaw hlao/tlô theipa zydua hnoh ta alynabie a reih.
“He Tarpaulin â zawna liata cha MTP ngiana vaw châ lymâ aw ta, râh nata râh adyuhna liata pahniena ngiana châta Flag ama taw tyhpa hawhta he Tarpaulin he MTP zy chipho châna ngiana nata pahniena ngiana châta a vaw châ aw. Marasawzy apahniehna cha MTP nama châ tahpa thyutliazy ta my khah u.”
“Atanoh liata programme he nawh kaw hra sala, Mara chi nata pho ngiana miah taotuhpa a châ hapa vâta keimo MADC Social Welfare Department ta cha eima pachâ peimawh hmeiseihpa a châ.”
“Manipur buana he keimo Marasawzy châta achu awpa a y – chipho buana a châ. Eima chipho châna liata amohpsia si la, amôpazy eima y khiatala ahrana châta hmâh si la, Mararâh a lei ha khiah keimo chhao eima lei ha aw. Chavâta Mara chi nata pho palaiseihsa tah, hmialâ tôh lymâ si la, pahniena flag a chaba lymâ suh vy” tahpa ta pasyuna nata khokheina bie pha kawpa a reih.
Puhpa Beihu Nohro, Dy. Chief Whip, MADC nata Puhpa C. Vabeirathie, President, MTP Sub HQ: Tipa zy ta pasyupalina nata biereina chyupa daihti hmâh ei ta, âmo pano nata Pihnô Nunthangi, VCP, Tipa ‘D’-I, Laihsa Clara K. Melita, artiste zy ta MTP Branch zy hnoh ta Tarpaulin raina ama hnei.
Târi 28.9.2023 kha ta Siaha nata a chheipâh liata MTP Branch zy hnoh ta raina hnei hapa châ ta, atanoh liata Tipa nata a chheipâh liata MTP Branch zy hnoh ta raina hnei hrapa a châ.
(Source: MADC I&P Deptt. PRESS RELEASE NO.138/2023)