SIAHA, 4 Phiapi, 2023, Pachynoh – Atanoh liana khata MSO General Headquarters, Siaha pachhuapanohpa ta MSO Raising Day ei – 58th na cha, LAILA Hall College Vaih liata aly kawpa a hmâpa a châ.
Programme he Puhpa Elson Eliasah Notlia ta a chhihtha ta, Rev. KC. Thangchinh, ECM Laty Biatuhpa ta 58th MSO Raising Day Abeipa lâta hlâna a hnei. MSO Branch, Thosai zyta Opening Song phakawpa ama hnei.
MSO Branch, Maraland Academy zy tawhta Awhkhypa lâ mo phakawpa zawpizy miah pamosa eita, zawpi chhao mopha ama takaw sai.
Chief Guest châ ta, Prof. Abdul Hannan Barbhuya, Principal, Government Saiha, College, Siaha châta, MSO ta Achuhaipazy châta daihti phapa eima pachhuah panohna kyh liata apeimawhpa nata College duasu nata Achuhaipazy châta hmo peimawhpa hlupi reina a hnei.
Motivational speech reih awpa Laihsa Ellen Hlychho, Coord. S. Mission, ECM Assembly, Siaha ta, Achuhaipazy hnota, Kheihawhpa lia raita y sila, Mara represent na eima châ’ tahpa palôh hneina chôta nata Marapa thisai eima châ khiatacha, Marapa Chi nata pho a boh nawpa nata Politics liata lâchakâna a dopa eima chhih thei nawpa nata Achuhaipazy châta hmo peimawhpa hlupi reina a hnei.
Puhpa T. Jb. Rona President chhaota, MSO ta hmalahna peimawh kawpazy nata hmoto liata riapha kawpata sie awpata pasyuna ahnei hra…
58th MSO Raising Day pachhyh pata Mara râh liata MSO Branch zy tawhta Best Teacher Award raih awpata proposal ama vaw taopa tawhta apha patlupazy palyupalihna hneipa châta MSO Raising Day Best Teacher Award raipazy cha:
High School tawhta:
Pihnô MS. Dawngliani
Headmistress
New Colony High School
Middle School tawhta:
Puhpa C. Lalchhuanawma
Headmaster
Gov’t Middle School Lobo
Primary School tawhta:
Puhpa N. Ni – uh
Headmaster
Gov’t Primary School -1, Iana zy ama châ…
Pihnô MS Dawngliani he a service chhô zydua attendance phakawpa châta, Vyuta pakiasa beileipa pachuna he khazohpa byhnâ a châ tahpa pahnopasia kawpa châta, Students riethei viapazy pachâ kawpa abyuna liata students zy châta apiepasa kawpa achâ hleikhôta, School Building nata Campus chhao abyuna hawhta avaw khâsia hleikhôta, ama School tawhta result phakawpa students zy ta ama to tyh… Ano zawzita ama Students zyta District level nata State level liata Quiz Competition liata zy hlaotlona ama vaw to tyh.
Puhpa C. Lalchhuanawma he eikha hnâta tlâlei no chhaota vyuta pakiasa beileipa châta, ama khih nata tlâh liata NGOs zy nata achuna hmasiena liata hriaparaona phakawpa vaw hnei tyh ta, School Building nata chhao phakaw pata mohôh ta, MSO zy nata achuna kyh liata hriaparaona phapa a hneihleikhôta, a subject liata students zyta hlaotlona phakawpa hnei eita, achuhaipa riethei viapazy châta a theina hawhta loh papua tyh ta, a students zyta District level ataopasuana liata hlaotlona thata ama vaw to tyh hra.
Puhpa Ni – uh he Students zy kypachâ kawpa châta, eikha hmâta vyuta so rai leipa Abeipa byhnâ apiepa pachuna liata apie kawpa châta, abyuna liata Free tution nata a saita tlaita hawhti na zy ky a pachâpa vâta pachuna vaw hnei tyhta. Ahlao tawhta Achuhaipazy châta abyuna hawhta Pencil, Châbu etc zy chaleipa tyhpa châta, Khih tlâ liata achuna hma asie via thei nawpata, MSO zy nata hriaparaona phakawpa hnei ta, ama school building chhao aphakaw pata avaw mohôh tyhpa châta, khih nata tlâh liata chyhsa hmâtlâh a châ kawpa a châ hleikhôta, a students zyta a no Subject liata hlaotlona phakaw vaw to tyh eita, students zyta a subject lana kyh liata ama palô atlâh hleikhôta, amâ thôkhei kaw tyh.
Best Teacher Award MSO ta hlâ pazy he chyhsa amopâ tlâ a châ kawpa ama châ hleikhôta, Government School liata regularised teacher kô 10 tawhta a chôlâ vaw service hapazy ama châ.
He hleikhôta hena zy heta Programme phaviapa nata hlaotlo viapata eima hmâ thei nawpata hlasana ama hnei.
B. Priskili
Fc. Nipari
Suna Chanô
Candice T. Vango
Rosy Bohia zyta hla sana ama hnei.
He khai tawhta FC. Hrualai ta Programme ahlaopazy hnota alynabie reina hnei daihti pachhâpa a châ.
Puhpa Ferdinand Nohro nata achhôkha zy ta, Sofa Set miah ama pahmâoa vâta alynabie eima reih .
MSO Branch, New Colony ta abyuna liata miah ama baopa vâta ama chö liata alynabie eima reih.
MTP Branch, College Vaih ta Hall miah ama pahmâpa vâta ama chô liata alynabie eima reih hra…
Puhpa Solomon Beihlotha, AGS MTP Gen. HQ ta Red Carpet miah pahlie ta a chô liata eimâ ly hmeiseih.
Issued by: MSO General Headquarters, Siaha