SIAHA, 1 Pachawh, 2024, Pobienoh – Paritheipa adyuhna tournament ei 1-na liata Tisopi Village Council team ta ama champion pa cha târi 1 April, 2024 pa ta Tisopi khih lia alyna programme pachhuapanohpa châ ta, Chief Guest châta Puhpa Joshua Chozah Under Secretary (LAD), MADC hruapa a châna hawhta programme â hlaokhei.
He daihti liata Chief Guest Puhpa Joshua Chozah ta biereina chyupa daihti hmâh ta, Sports he kô 1,000 hlei asie hapa tawhta râh hmahsie tuapa zy tawhta vaw pathao hapa châ ta, mo pakha nata py ta ataopasuana vaw hnei tyhpa a châna nata sapa nata palôhrupa châta thatlôna, hri-iah pathaihna, hro alyna, viasa ataona nata akaona châta peimawh kawpa nata phahnai kawpa châ ta, tahmâ ta nama champion-na he â daih tah thlah ha leipa ta, District Level, State Level, National Level lia taih ta akhai thei awpata khâ a practice tah, sapa thatlôna nata palôrupa paraotuhpa paritheipa sahma nata drugs tawhta sasyh apabohsapa ta adyuh lymâ ta, chhôhkha, khitlâh nata râh châta chyhsa hmâtlâh châ awpa ta hro avao pahnie chyu awpata pasyuna bie a reih.
Beireina ‘short speech’ daihti ama piepa liata Puhpa C. Mochono, Asst. LAO ta tiamana a peimawh zie reih ta, Puhpa M. Hniedo, ASO ta pathaihna a peimawh zie a reih hra. Puhpa Pawkhu T. Azyu chhao ta Sports lâ liata hmahsie via lymâ tah, paritheipa nata hmopha leipa tawhta asohsi ta hmâtlâh châ awpa ta khihsawzy a pa syu.
Champion alyna programme a chhâ tawhta alyna kyhchhi cha thapha kawpa ta dôhpa a châ.
Puhpa Joshua Chozah he Puhpa C. Mochono, Asst. LAO, Puhpa M. Hniedo, ASO, Puhpa Pawkhu T. Azyu nata LAD Staff thokha hleikhô ta hlasa thaipa John Beizachhi Phuto, Esban Maraduakhei, Gospel nata a lapinô, sawnah nata viasa thokhazy ta ama chakaochahlâh.
Issued by: LAD, MADC, Siaha.