CHAKHEI, 2 Pachawh, 2024, Hriaheinoh – Chakhei Zone Football Association (CZFA) ta ama pachhuapanohpa Running Cup Final Tournament 2024 cha CZFA Playground, Chakheitlâh liata atanoh tawhta akhaih pathaopa châ ta, he liata Puhpa Beirôkhu Beitâ, I & PO, MADC cha khichhai laipa ta hruapa a châna hawhta pahyna programme hmâkhei ta, atanoh my dawh 10:30 AM pa ta ribbon chakiepa ta kick off hneipa a châ.
Puhpa C. Beirosia, Vice President, CZFA ta pahyna programme he chhihtha ta, Puhpa AZ. Machei, Awnano Hyutuhpa ta Devotion a hmâh. Laihsa Z. Meledi, Siasi ta thai kawpa ta mopakha hlasana a hnei.
Khichhai laipa Puhpa Beirôkhu Beitâ, I & PO ta biereina daihti a hmâna liata atanoh noh nata daihti phapa a pietuhpa Khazohpa lâ alynabie reih ta, Chief Guest châta a hruatuhpa CZFA nôpawpazy hnoh ta alynabie a reih. CZFA ôna chhôh liata Club nôpawzy nata Club member zydua – pawpi ri hmosai piepa a hlâtuhpa zydua hnohta alynabie reih ta, ano azituhpa Puhpa S. Zerusalem, VCP Chakhei-I, a lahpinô Pihnô TT. Vangôpawki nata Puhpa T. Pabua, Cameraman, I & P Department, MADC zy hnoh ta alynabie a reih.
Puhpa Beirôkhu Beitâ chata Player-zy hnoh ta pasyuna bie reih ta, Pari theipa tawhta asohsi chyu awpa zy, Sports chyhsazy cha Discipline pha kawpa nata apathaih kawpa akhaih awpa zy, sasyh asohsi awpa zy, palôh chhyu kawpa hneipa ta tlô achhuah awpa zy, hnabeidy leipabta taochhailaina a peimawh zie zy reih ta, player-zy ta amâ khailâhpa team member-zy za thai awpa byuh ta, âmo ama y lei khiatala Tournament liata akhailâh awpa hnei aw vei ei – team hropazy amâ peimawh raihrie tahpa my lei awpa tah ta, officials & authority zy cha zathai kaw awpa nata ama bie chakhia lei awpa ta pasyuna bie pha kawpa a reih. Talent hnei pha kaw hra u la, nama hriapasa leipa ta a châ khiata la yzie hnei aw vei tahpa Football player mopathâhpa Cristiano Ronaldo ta “Talent without working hard is nothing” a vaw tahpa bie tawhta a pasyu hra ei.
“Â ngia kawpa ta akhaih u la, hniehnôh pha leipa siesai tlâ lei awpa châ sa la. He tournament chhôh ta sapa hnatlâna phapa hnei u la, achhu adaih, apahlei pabaih tlâ leipa ta apalâ kawpa ta he Tournament he patlô chyu awpa ta khokheina sâh chaipa ei chahlâ ei.” tahpa ta player-zy hnoh ta pasyuna bie nata khokheina bie reih ta, zâpati pahâh kawpa a taopatuhpa CZFA leader zy hnoh ta alynabie a reih.
Atahmâ CZFA Running Cup Final Tournament 2024 liata Club sâ 5 tawhta Team 8 vaw pua ei ta, Club sâ 5 tawhta Veteran Team 5 zy ama vaw pua hra. Atanoh tawhta pathaopa ta Final he târi 5.4.2024, Chutynoh liata akhai patlô thei awpa ta hnabeiseihpa a châ.