SIAHA, 27 Thlarâh, 2022, Hriaheinoh – Atazâ dawh 8:00 Pm liata Puhpa K. Chhihrau, Executive Secretary, MADC ta Ls. AM. Rosefealin Music Video Album “Khazoh Bieru” tahpa cha NSV Studio, New Colony, Siaha liata a palâhâh.
He programme he Mara Hlasa Py General Headquarters: Siaha chhihthana ta hmâpa châ ta, St. N. Beichhotha, GS ta pahnie kawpa ta a chhihtha. K.Machâ K. Vabeitha, President ECM KTP Headquarters ta Devotion hmâh ta, Puhpa AZ. Zese, Asst. Secretary, MHP Gen. Headquarters ta Album Preview daihti a hmâh.
Puhpa John Beizachhi Phuto, President MHP Gen. Headquarters ta Biereina hnei ta, Revd. NC. Vabeilua ta Byhnâ awna thlahchhâna ta daihti a khaw.
He programme liana heta Hlasa thaipa Ls. Clara K. Melita, Mara Idol Season-6 1st Runner up, Ls. B. Beihruaki zy ta hlasana hnei ei ta, Ls. AM. Rosefealin ta Presentation pha kawpa nata hlasana a hnei pâ hra. Zawpi amâ ly ngaita.
Khichhailaipa Puhpa K. Chhihrau, Executive Secretary, MADC ta Music a peimawhzie nata a rôhna zie thai kawpa ta reih ta, Awnanopa Apahrana Thlâpâ liata he “Khazoh Bieru” tahpa Album palâhâh theipa a châpa he a rôhna a tahzie a reih; hla phituhpa nata hlasatuhpazy he eima palôh liata kha châh tyh ei ta, Music heta chyhsa eima hro liata tha ta y zie hneita, alyna maniah pietuhpa a châzie a reih.
Puhpa Jeffrey Khara, Editor, Moonlight chhao programme ahlaopa ta biereina chyupa hnei ta, Puhpa NB. Sila, Vice President, MATC chhao ahlaopa ta Ls. AM. Rosefealin hnoh ta hmosaipiepa a hlâ hra.
‘Khazoh Bieru’ Music Video album liana heta hla 10 y ta, Puhpa John Beizachhi Phuto, President, MHP Gen. HQ (9485496238) nata Ls. AM. Rosefealin, Artiste (93628360956) zy liata ta Rs.250/- ta chalei theipa a châ.
(Source: I & PO, MADC)