SIAHA, 29 Thlarâh, 2022 – MSO Gen. HQ, Siaha ta a pachhuahpanohpa nata Samagra Shiksha & Education Department, MADC ta a sponsor-pa Inter-School Quiz Competition cha atazâ (29.09.2022) dawh 7:00pm khata NSV Studio, New Colony liata Live Telecast ta pahyna daihti hmâpa a châ. He daihti he T. John Tennyson, Finance Secy, MSO Gen. HQ ta chhihtha ta, Rev. KT. Beizanga, Biatuhpa, New Colony Pastor Bia (CCIM) ta pavaosana daihti a hmâ khai tawhta pathaopa a châ.
T. JB. Rona, President ta zawpi â hlaopazy alypangiana bie reih ta, Aldrin Laihlei Hlychho, Secy i/c SW ta MSO Gen. HQ liata chhihthatuhpazy hmiapahnosana daihti a hmâh pazi pâ hra. He khai tawhta Quiz Competition pahytuhpa nata Khichhai Laipa Pp. H. Vabeitha, Deputy Commissioner of State Tax tawhta biereina nahthliepa châ ta, MSO Gen. HQ ta Achuhaipazy châta phahnai awpa Quiz Competition nama pachhuahpanohpa he alypa châ ngaita ta, he Quiz Competition he Achuhaipazy ta châ amâ chuna nata Achuna kyh liata hmahsie n’awpa châta hmâhpa ta ama lâpi peimawh kawpa a châ cheingei na ta ei pangiasa. UPSC Inter-College Quiz Competition liata Gov’t Saiha College, Siaha cha sânona châ ei ta, alypa a châ ngaita, nâmo he competition liata â hlaopazy chhochhi cha College nama kia tita Mizoram liata sâkhana châ cheingei awpa ta châ hnabeiseih aw pi ta, tiama papua via lymâ muh vy… tahpa ta pasyuna bie pha kawpa a reih.
He daihti liana heta Pinô Nazee Khaila, Sr. Education Officer, MADC tawhta biereina pha kawpa nahthliepa a châ hra. MSO Inter-School Quiz Competition lia heta School sâhrawh-hleisarih (17) High School tawhta 12 nata Middle School tawhta 6 zyta â hlao thei ei ta, Quiz Competition pahnie kawpa ta maniah achhituhpa he Monalisa Zawtha, Exec Cmte Member, MSO Gen. HQ a châ.
Source: MSO Gen. HQ, Siaha