CHAKHEI, 27 Phiata, 2022, Pobienoh (MNN) – Atanoh dawh 1:00 Pm kha ta Gov’t Chakhei PS-I Siku O liata Chakhei khihsawzy ta atakô MPSC ry liata Mizoram Information Service (MIS) Topper Laihsa K. Ngosai, D/o Puhpa K. Hrahmô, MDC (Chakhei biatuhpa) cha alykheina ama hnei.
Siaha tawhta atanoh Chakhei akaw ngiapa Laihsa K. Ngosai he Chakhei liata All NGOs zy ta Chakhei nata Chheihlu râhrina su liata vaw dy ei ta, khichhôh amâ ngia tawhta Gov’t Chakhei PS-I angiana tlyhmia School tlâh liata Welcome Gate taopa ta pawpi ri chhao ta arônah kawpa dypa a châ.
He khai tawhta Gov’t Chakhei PS-I O chhôh liata programme ahmâ pazipa a châ.
Programme he chhaih 2 lâta ahmâpa châ ta, chhaih 1-na liata Puhpa CL. Khaichô, VC Member, Chakhei-I ta chhihtha ta, chhaih 2-na liata St. FC. Daose, Fin. Secy. MSO Sub HQ: Chakhei nata Ls. Mandy Chozah, Secy. i/c Edu. MSO Sub HQ: Chakhei zy ta ama chhihtha.
Daihti thaona liata Rev. C. Josia, ECM Chakhei biatuhpa ta devotion daihti a hmâh.
St. FC. Daose, host ta hmosai piepa hlâna daihti chhihtha ta, he liata Chakhei liata VC sâ 3 ypa tawhtazy, MTP Branch sâ 3 nata MTP Sub HQ: Chakhei tawhta zy, MSO Branches nata MSO Sub HQ: Chakhei tawhta zy, MCHP Branch sâ 3 tawhta nata MCHP Sub HQ: Chakhei tawhta zy, Village Organisation tawhta zy alykheina hmosai piepa (poh, muffler, citation etc.) ama hlâ chyu.
Puhpa FC. Nâhlô (All VCs vyuhpa), Puhpa K. Hietlô (All Teachers vyuhpa), Pihnô C. Sâme (All NGOs vyuhpa) zy nata Puhpa TT. Sazi, Adviser, MSO Sub-HQ : Chakhei zy ta alykheina nata biereina chyupa hnei ei ta, chhôhkha lâ tawhta Pihnô B. Ngiaso (m/o Ls. K. Ngosai) ta alynabie reina nata biereina chyupa hnei ta, laihsa K. Ngôsai, MIS Topper chhao alynabie reina nata siku hawtizy hnohta pasyunabie pha kawpa reina a hnei hra.
He alykheina liata Chakhei tawhta hlasa thaipa Laihsa FC. Suna Chanô, Top 5, Mara Idol 2021, AZ. Vabeihruasa, Top 20, Mara Idol 2021, Laihsa K. Zairi, Top 20, Mara Idol 2014, St. Eliuda Z. Beivâhra zy ta alykheina hla sapa ta zawpi palôhpahawh ei ta, Deseli & Friends zy nata Chakhei UPS tawhta alykheina châta hla patlapa ta lâh ei ta, saiso thaipa Puhpa K. Thatha sawchapawpa K. Marapha ta saiso hlasapa ta zawpi a palysa.
Daihti chhâna lâ liata Puhpa Elvis Khaimeichho, President, MSO Sub HQ, Chakhei ta vote of Thanks reina daihti a hmâh.
Chhaih 1-na liata Machâ K. Mosia, Headmaster, Gov’t Chakhei H/S ta daihti khawna thlahchhâna hnei ta, chhaih 2-na liata zawpi ta Zisu thlahchhâ pachupa reiparaohpa ta programme khawpa a châ.
Chakhei khitlâh nôpawpazy ta Seih nata Vao ta alyna kyhchhi amâ chhuanohpa ta a khi zawpi ta aly kawpa ta dôh chyupa a châ.
Laihsa K. Ngôsai he M.Sc (Agri.) â chu patlô khai tawhta Siaha BDO ry liata sawhkhâ rai hria tua ta, a raihriapa nata Abeipa tawhta thaina sona a hneipazy cha â phuhpa ta a pahno leipa vâta a rai châ bâsaipa ta Competitive Exam he a vaw pahaopa châ ta, a ei 1-na liata MIS lia he â roh patloh thei vâta â lyzie reih ta, Abeipa ta â ryh a tah khiah MCS zy chhao roh via â chhuahzie a reih hra.
Laihsa Ngosai alykheina liata Siaha tawhta a nô nata chhôhkha sanawhzy ta kaw zi ei ta, Chheihlu liata chhôhkha nahzy chhao ahluhpi ama kaw zi hra. (A paw deikua thohna â mohôh ngâhaipa vâta a kaw zi thei leipa a châ.)
(Admin, MNN)